បទពិសោធន៍ដាំដំណាំសណែ្តកដី

កសិករ​​​​​​​​​​​​​​​​​​​​​ ​សុន ​​​​ស៊ីន រស់នៅភូមិត្រពាំងបួនឃុំស្វាយ​  សុ្រកសាមគ្គីមានជ័យ  ខេត្តកំពង់ឆ្នាំង ។ គាត់ជាកសិករ ដែលសហការ

ជាមួយគំរោង​ បក្សីភ្នំរីករាយ​ តាំងពីឆ្នាំ​២០០៨ មក។ គាត់មានបទពិសោធន៍ដាំសណែ្តកដីរយៈពេល ៤ ឆ្នាំមកហើយ។ នៅលើផ្ទៃដី ២.១០០មែត្រការ៉េ (២១អា) គាត់ប្រមូលផលបាន ៤.០៥០​​​គីឡូក្រាម។​​ ការដាំសណែ្តកដីនេះ ធ្វើឲ្យជីវភាពរបស់គាត់បានធូរមួយកំរិតដែរ។ ចំពោះបទពិសោធន៍ ដែលគាត់បានអនុវត្តន៍មានបង្ហាញជូនដូចខាងក្រោម៖

១-ការជ្រើសរើស និងត្រៀមពូជដាំ

​     ក្នុងការត្រៀមពូជដាំ គាត់បានជ្រើសរើស   សណ្តែកដែលមានគ្រាប់ពេញល្អនិងគ្រាប់ធំយក ទៅហាលថ្ងៃឲ្យស្ងួត រួចប្រឡេះយកសំបកចេញ​ដាក់ត្រាំទឹកទុក

មួយយប់ ទើបយកគ្រាប់ទៅដាក់ដាំ។គាត់ដាំនៅដើមខែមេសា​ និងប្រមូលផលនៅ​ខែមិថុនា​។

២​-ការរៀបចំដី និងការដាំ

• ​​​​​​​​​​​​​​​​​​​​​​​​​​​​​​​​​​​​ការរៀបចំដី គាត់បានភ្ជួរដីចំនួន ២​​-៣​ ដង ដោយភ្ជួរលើកទី ១ ទុកដីចោលរយៈពេល១សប្តាហ៍ ឲ្យស្មៅងាប់អស់ ទើបធ្វើការភ្ជួរលើក ទី២ ទុកចោល ១សប្តាហ៍ទៀត  ទើបយកជីកំប៉ុស្តទៅដាក់ទ្រាប់បាត (ជីកំប៉ុស្ត២រទេះស្មើនឹង ២០០​គីឡូក្រាម) ​រួចភ្ជួរលុប​។
• ការដាំ ក្រោយពីភ្ជួររួច គាត់យកគ្រាប់សណ្តែកដាក់ដាំនៅតាមគន្លង។​

  

  ចន្លោះពីគន្លងមួយ​ទៅមួយមានប្រវែង ៣តឹក និងពីរណ្តៅមួយទៅមួយមានប្រវែង ២តឹក។ បន្ទាប់មកយករនាស់ទៅរាស់ដីឲ្យស្មើដើម្បីលុបគ្រាប់ ។

• ការថែទាំ​​​​ ​​​​​​​​​​​​​​​​ ក្រោយពីដាំបានរយៈពេល ១៥ថ្ងៃ គាត់បានធ្វើស្មៅ និងពូនគល់ដើម្បីឲ្យសណ្តែកលូតលាស់ និងចុះមើមបានល្អ មិនតែប៉ុណ្ណោះ គាត់បានដាក់ជីកំប៉ុស្តជ្រុំនៅតាមចន្លោះរង។
• ការប្រមូលផល​​​ ​ ជាទូទៅដំណាំសណ្តែកដីមានរយៈពេល ៣ខែកន្លះ ទៅ ៤ខែ ។

បើគាត់ដាំលក់ទុកត្រឹមរយៈពេល ៣ខែកន្លះ។ បើធ្វើពូជទុកដល់រយៈពេល៤ខែ

ក្រោយពីដាំទើបគាត់ប្រមូលផល​។ ក្នុងមួយរដូវ គាត់ប្រមួលផលបាន ៤.០៥០គីឡូក្រាម (គិតទាំងពូជ) ដោយក្នុង ១គីឡូក្រាម លក់បានតំលៃ ១.០០០ រៀលទៅ ១.២០០រៀល។ ក្នុងមួយរដូវគាត់អាចរកចំណូលបានពីការ ដាំសណ្តែកដី គឺបានប្រហែល៣.៥០០.០០០រៀល  (៣​,៥ លានរៀល) សំរាប់ផ្គត់ផ្គង់ជីវភាពគ្រួសារ ។

សរុបមក បច្ចេកទេសសំខាន់ៗក្នុងការដាំសណ្តែកដីមាន​​​​​​​​​

• ធ្វើការភ្ជួររាស់ និងហាលដីឲ្យបានស្ងួតល្អ
• ថែទាំបោចស្មៅ និងពូនគល់ដើម្បីឲ្យសណ្តែកចុះមើមបានល្អ
• ដាក់ជីកំប៉ុស្តទ្រាប់បាតនិងដាក់ជីបំប៉ននៅចន្លោះរងដើម្បីឲ្យសណ្តែកមានមើមថ្លោសល្អ
• ទុកពូជសណ្តែកដោយដកនៅអាយុ ៤ខែដើម្បីឲ្យសណ្តែកចាស់ល្អ​៕

លោក ជួប  សុនិវត្ត