បទពិសោធន៍បណ្តុះកូនអំពិល

អ្នកមីង សួង ពិសិដ្ឋ រស់នៅភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ គាត់មានបទពិសោធន៍ល្អក្នុងការបណ្តុះកូន​អំពិលយកស្លឹកសម្រាប់បរិភោគក្នុងគ្រួសារ។ លើផ្ទៃដីសរុបប្រមាណ ១,៥ម៉ែត្រ គឺគាត់អាចបេះត្រួយអំពិលបានរាល់២ថ្ងៃម្តង ប្រសិនបើក្នុងគ្រួសារមានតម្រូវការបរិភោគឬអ្នកជិតខាង។ចំពោះបច្ចេក​ទេស និងបទពិសោធន៍នៃការដាំដុះមានបង្ហាញជូនដូចខាងក្រោម៖

១-ការរៀបចំបណ្ដុះគ្រាប់

យកអំពិលទុំមកបកសំបកចេញ សំដិលថ្ងៃ រួចយកមកប្រឡះគ្រាប់ចេញឲ្យស្អាត។ យកគ្រាប់អំពិលទៅហាលសំដិលថ្ងៃ ១ ទៅ ២ថ្ងៃ បន្ទាប់មកយកគ្រាប់អំពិលមកផ្អាប់មួយយប់ ទើបយកគ្រាប់អំពិលទៅបណ្ដុះ។

២-ការរៀបចំដី   

កាប់ដីហាលថ្ងៃរយៈពេល ២ទៅ៣ថ្ងៃ បន្ទាប់មកយកលាមកសត្វមកច្របល់ជាមួយដីឲ្យ​សព្វ ជ្រុំដីលើកជារង រួចយកគ្រាប់ទៅកប់ដាំ និងលុបដីស្តើងៗពីលើ និងកុំឲ្យញឹកពេក បន្ទាប់គឺយកដីលុបពីលើឲ្យជិត។ ស្រោចទឹកពីលើឲ្យជោគមួយថ្ងៃម្តងទៅពីរដង តាមលក្ខណៈអា​កា​សធាតុ។ ក្រោយពីបណ្ដុះកូនបានរយៈពេលពី ៤ទៅ៥ថ្ងៃ គ្រាប់នឹងដុះពន្លកចេញសន្លឹក២។

៣-ការប្រមូលផល

ក្រោយពីកូនអំពិលដុះបានអាយុ ១០ថ្ងៃឡើងទៅ គឺអាចចាប់ផ្តើមកាត់ស្លឹកយកមកបរិភោគបាន។ ការប្រមូលផលត្រូវធ្វើឡើងដោយប្រើកន្ត្រៃ មិនត្រូវយកដៃបេះទេពីព្រោះកូនអំពិលនៅតូចងាយនឹងរលើងគល់ផុតពីដី និងអាចបណ្តាលឲ្យងាប់ដើម និងអាចប្រឈមនឹង​ការកើតមេរោគផ្សិតក៏មាន។

ចំណាំ បើសិនកូនអំពិលមានអាយុចាប់ពី ៣០ថ្ងៃឡើង គឺការប្រមូលផលអាចប្រើដៃក៏បាន មិនមានបញ្ហាដល់ការលូតលាស់ឡើយ។

សរុបមក បច្ចេកទេសសំខាន់ៗក្នុងការបណ្ដុះកូនអំពិលមាន៖

• យកគ្រាប់អំពិលហាលសំដិលថ្ងៃរយៈពេល ១-២ថ្ងៃ រួចត្រាំទឹក៣យប់ ស្រង់ផ្អាប់ ១យប់ ទើបយកទៅដាំ
• រៀបចំដីដោយលើកជារង និងរោយជីកំប៉ុស្តកប់ចូលក្នុងរង
• យកគ្រាប់កប់ដាំរាក់ៗ និងព្រាចដីស្តើងៗពីលើ
• ថែទាំស្រោចទឹកបោចស្មៅជាប្រចាំ៕

ប្រភព ទស្សនាវដ្តីកសិករ

សហគមន៍សម្បូរសប្បាយ