Home / កសិកម្ម / បទពិសោធន៍ចិញ្ចឹមមាន់តាមគោលការណ៍ធម្មជាតិ

បទពិសោធន៍ចិញ្ចឹមមាន់តាមគោលការណ៍ធម្មជាតិ

បងស្រី ស៊ឹម ទូច ជាសិស្សយុវសហគ្រិនរស់នៅភូមិត្រពាំងចក ឃុំត្រាំកក់ ស្រុកត្រាំកក់ ខេត្តតាកែវ។ នៅឆ្នាំដំបូងគាត់បានដាក់ចិញ្ចឹមមេមាន់ចំនួន ៥ក្បាល និងបាចំនួន ១ក្បាល។ គាត់ចាប់ផ្តើមចិញ្ចឹមពីខែ៩ ឆ្នាំ២០១០មក។ គាត់លក់មាន់សាច់ជារៀងរាល់ខែ ដោយក្នុងមួយខែលក់បានចំនួន៣០ទៅ៤០ម៉ឺនរៀល។ ចាប់ពីខែតុលា ឆ្នាំ២០១០រហូតមក ខែមេសា ឆ្នាំ២០១១គាត់រកបានប្រាក់ចំណូលសរុបប្រមាណជាង៣លានរៀល​។ ពីមុនមក គាត់មិនធ្លាប់បានទទួលប្រាក់ចំណូលពីការលក់មាន់នេះទេ ក្រោយពីបានអានទស្សនាវដ្តីកសិករ ឃើញបទពិសោធន៍របស់កសិករ ដែលចុះផ្សាយក្នុងនោះគាត់មានការចាប់អារម្មណ៍ក៏ចាប់ផ្តើមចិញ្ចឹមមាន់រហូតមក។

ទិដ្ឋភាពថែទាំកូនមាន់នៅក្នុងទ្រុង

ចំពោះបទពិសោធន៍ការចិញ្ចឹមមាន់របស់គាត់មានបង្ហាញជូនដូចខាងក្រោម៖

១-ការរៀបចំទ្រុង

ទ្រុងសម្រាប់ចិញ្ចឹមមាន់ គាត់រៀបចំផ្សេងៗពីគ្នា គឺទ្រុងបង្ខាំងមាន់តូច និងទ្រុងមាន់ធំ គាត់ធ្វើរបងព័ន្ធជុំវិញទីធ្លាសម្រាប់ឲ្យមាន់ដើររកចំណីស៊ី។

– ការរៀបចំទ្រុងសម្រាប់មាន់តូចដេក ទ្រុងសម្រាប់មាន់តូចដេកមានទំហំ ១,២ម៉ែត្រ  កំពស់ ០,៥ម៉ែត្រ ធ្វើពីឫស្សី និងសំណាញ់ក្រាលពីក្រោមឫស្សីកុំឲ្យជើងមាន់ធ្លាក់ចុះក្រោម ដែលអាចបណ្តាលបាក់ជើង។

– ការធ្វើទីធ្លាឲ្យមាន់ដើរ រៀបចំទីធ្លាដោយធ្វើរបងព័ន្ធជុំវិញទ្រុង   នៅក្នុងទីធ្លាមានជីករណ្ដៅដាក់សំរាមស្លឹកឈើសម្រាប់មាន់កាយ។

  – ការជ្រើសរើសពូជមាន់   គាត់ជ្រើសរើសមាន់ដែលមានមាឌធំជើងរមៀត     រោមពណ៌ក្រហមដែលមានពណ៌ទាក់ទាញ និងមានទម្ងន់ ១,៣គីឡូក្រាមឡើងទៅ និងមិនជាន់ឈាមគ្នា។

២-ការថែទាំមាន់

– កូនមាន់ នៅពេលកូនមាន់ញាស់ភ្លាម គាត់បានទុកមិនឲ្យមាន់ស៊ីចំណីរយៈពេល ២៤ម៉ោង។ បន្ទាប់ពីញាស់ភ្លាមយកមកដាក់នៅក្នុងឡាំងភ្លាម ដោយបិទគំរបមិនឲ្យជិតពេកទេ គឺទុកប្រហោងខ្លះ ដើម្បីឲ្យកូនមាន់ដកដង្ហើម។ ក្រោយពីញាស់រហូតដល់ ១០ថ្ងៃ គាត់ប្រើចំណីផ្សារ និងប្រើស្ករត្នោតលាយជាមួយទឹកធម្មតាដាក់ឲ្យកូនមាន់ផឹក ដោយស្ករត្នោតមួយចុងស្លាបព្រាបាយ លាយជាមួយទឹក ១០លីត្រ ដាក់ឲ្យមាន់ផឹកមួយថ្ងៃម្តង។ ក្នុងរយៈពេលបីថ្ងៃម្តង គាត់ដាក់កូនមាន់ឲ្យដើរនៅលើដីម្តង ដើម្បីឲ្យកូនមាន់ឆាប់រឹងដៃរឹងជើង។

– មាន់អាយុ១៥ថ្ងៃ នៅពេលមាន់មានអាយុ ១៥ថ្ងៃឡើង  គាត់ឈប់ដាក់ចំណីផ្សារឲ្យស៊ីទៀតហើយ គឺប្រើចំណីដូចជា កន្ទក់ ត្រកួន និងបបរបាយ។ មាន់ចំនួន ១០០ក្បាល ប្រើកន្ទក់ ១,៥គីឡូក្រាម បបរ២កំប៉ុង ត្រកួន២ទៅ៣ដៃ ឲ្យស៊ីក្នុងមួយថ្ងៃ។

– ថ្នាំការពារមាន់ឈឺ នៅរដូវក្តៅ គាត់បានដាក់ឲ្យមាន់ផឹកទឹកថ្នាំដើម្បីការពារជំងឺឆ្លង។ ប្រភេទ​

ថ្នាំដែលគាត់បានត្រាំ មានប្រភេទថ្នាំប៉ារ៉ា ដោយថ្នាំប៉ារ៉ា១គ្រាប់លាយជាមួយទឹកធម្មតា ១លីត្រ។ ក្រៅពីការប្រើថ្នាំសម្រាប់ការពារ គឺត្រូវធ្វើការផ្លាស់ប្តូរអា-កាសធាតុ ដោយត្រូវស្រោចទឹករាល់ថ្ងៃនៅក្នុងទីធ្លាដើម្បីកុំឲ្យមាន់ចាញ់នឹងអាកាស​ធាតុក្តៅ។

  – ការសំអាតទ្រុង ដើម្បីកុំឲ្យមាន់កើតនូវជំងឺផ្សេងៗ ត្រូវធ្វើការសំអាតទ្រុងមានដូចជា ការបោសសំអាត កើបប្រមូលលាមកមាន់ជាប្រចាំ។ លាងទ្រុងឲ្យស្អាតបន្ទាប់ពីប្រមូលមាន់លក់១សាៗ។ បន្ទាប់មកយកដីខ្សាច់ទៅចាក់បន្ថែមពីលើដីទីធ្លា និងស្រោចទឹកពីលើ។ ការធ្វើដូចនេះ គឺការពារមិនឲ្យមាន់កើតជំងឺ។

ទិដ្ឋភាពមេមាន់ពូជសំរាប់លក់

៣-ការលាយចំណី

ប្រភេទចំណី ដែលគាត់បានលាយឲ្យមាន់ស៊ីដូចជា   កន្ទក់   បបរ   ត្រកួន។  សម្រាប់មាន់ចំនួន

១៥០ក្បាល  គាត់បានដាក់ចំណីឲ្យស៊ីប្រមាណ  ៤គីឡូក្រាម។  ចំណី  និង ទឹក  គឺត្រូវដាក់នៅក្នុងបំពង់

ឫស្សី (ស្នូកទឹក ស្នូកចំណី)។

៤-លទ្ធផលទទួលបាន

ក្នុងការរៀបចំទ្រុងចិញ្ចឹមមាន់នេះ គាត់ចំណាយអស់ ១៣០.០០០រៀល ទៅលើការទិញដែកគោល និងសំណាញ់ ចំណែកឫស្សីមានស្រាប់នៅក្នុងភូមិ។ ចំណែកការទទួលផលវិញ គឺបានពីការលក់មាន់សាច់ កូនមាន់ និងមេមាន់ពូជ។

ក្រោយពីការចិញ្ចឹមបានរយៈពេល ៥ខែ   គាត់ទទួលបាននូវប្រាក់ចំណូលប្រមាណ  ៤០  ទៅ

៥០ម៉ឺនរៀល ពីការលក់មាន់សាច់ ដោយក្នុង១គីឡូក្រាមលក់បាន ១៥.០០០រៀល (មាន់រស់)

។    ក្រៅពីនេះគាត់  និងក្រុមគ្រួសារមានមាន់សម្រាប់បរិភោគគ្រប់គ្រាន់តាមតម្រូវការទៀតផង។

ចំពោះការលក់មេមាន់វិញ គាត់អាចលក់ម៉ៅដោយក្នុងមេមាន់ ១ក្បាល លក់បានប្រមាណ ៥

ទៅ ៦ម៉ឺនរៀល។

ចំពោះកូនមាន់វិញគាត់អាចលក់បាន ១ក្បាលចំនួន ៤.០០០រៀល។

ទិដ្ឋភាពកូនមាន់ និងមាន់សាច់សម្រាប់ត្រៀមលក់

សរុបមក បច្ចេកទេសសំខាន់ៗក្នុងការចិញ្ចឹមមាន់៖

  • រៀបចំទ្រុងសម្រាប់មាន់តូច និងមាន់ធំដាច់ដោយឡែកពីគ្នា
  • រៀបចំធ្វើរបងព័ន្ធជុំវិញទីធ្លាឲ្យមាន់ដើរ
  • ជ្រើសរើសពូជមាន់ដែលមិនជាន់ឈាមមាឌធំ ជើងរមៀតមកចិញ្ចឹម
  • ផ្តល់ចំណី និងទឹកឲ្យបានទៀងទាត់ និងគ្រប់គ្រាន់
  • ថែទាំបោសសំអាតទ្រុង និងទីធ្លា ស្នូកទឹក ស្នូកចំណី
  • ប្រើថ្នាំធម្មជាតិការពារជំងឺមាន់៕

 

អំពី សេង រង្សី

សេង រង្សី
ខ្ញុំបាទ សេង រង្សី ជាអ្នករចនាគេហទំព័រ សហគមន៍សម្បូរសប្បាយ (ស៣) ហើយក៏ជាអ្នកសរសេរអត្ថបទសម្រាប់ការចែករំលែកនៅលើគេហទំព័រផងដែរ។

អត្ថបទពាក់ព័ន្ធ

អណ្តើកមាស, កណ្តូបអង់តែនវែង, កន្ទុំរុយ, ខ្មូតដី, ពីងពាង, ស្រឹងទឹក

អណ្តើកមាស (សត្វល្អិតមានប្រយោជន៍ចំពោះដំណាំ) អណ្តើកមាសមាន ពីរប្រភេទ៖ ប្រភេទទី១. រាងមូលពងក្រពើ មានសម្បុរភ្លឺថ្លាក្រហមរលោង។ ពួកអណ្តើកមាសនេះច្រើនធ្វើសកម្មភាពនៅពេលថ្ងៃក្នុងរដូវក្តៅ និងស្រែវស្សាទាំងមេទាំងកូន។