Home / កសិកម្ម / ចរិត ការរស់នៅ ចំណី និងប្រភេទត្រីអណ្តែង

ចរិត ការរស់នៅ ចំណី និងប្រភេទត្រីអណ្តែង

ការចិញ្ចឹមត្រីក្នុងរណ្តៅ ឬអាង គេជ្រើសរើសត្រីប្រភេទណាដែលមានលក្ខណៈធន់នឹងមជ្ឈដ្ឋានរស់នៅធន់នឹងជំងឺ និងងាយរក​ពូជ​សំរាប់ចិញ្ចឹម។ ការចិញ្ចឹមត្រីក្នុងរណ្តៅក្រាលកៅស៊ូ ឬអាងនេះ គឺមិនមែនគ្រប់ប្រភេទត្រីទាំងអស់ក៏អាចដាក់ចិញ្ចឹមបាននោះទេ គឺមានតែប្រភេទត្រីមួយចំនួនប៉ុណ្ណោះ ដូចជា ត្រីអណ្តែង ត្រីដំរី ត្រីក្រាញ់ ត្រីកន្ធរ ត្រីរឿងក្រហម ដែលអាចចិញ្ចឹមរបៀបនេះ ដោយសារត្រីពពួកនេះវាមានប្រព័ន្ធដកដង្ហើមរង អាចរស់នៅធននឹងមជ្ឈដ្ឋានទឹក និងអាចរកពូជត្រីបាននៅតាមមូលដ្ឋានចិញ្ចឹម​ឬតំបន់នៅក្បែរ។ ដូចនេះ យើងគួរជ្រើសរើសប្រភេទត្រីណា ដែលមានលក្ខណៈជីវសាស្ត្រអាចចិញ្ចឹមក្នុងរណ្តៅ ឬអាងបានដូចជាត្រីអណ្តែងនេះជាដើម។

ចរិតរបស់ត្រីអណ្តែង

ត្រីអណ្តែងជាប្រភេទត្រីកាច (ស៊ីសាច់ជាអាហារ) រស់នៅស្រទាប់បាត ពីព្រោះវាមានព្រុយពុក​មាត់ (សំរាប់ស្រង់ក្លិន) និងជាប្រភេទត្រីស៊ីចំណីចំរុះដូចជា កូនសត្វល្អិតៗ កំពឹស កូនត្រីតូចៗ កូនកង្កែប ក្អុក ខ្យង លាមកសត្វ កន្ទក់ ចុងអង្ករ កាកសំណល់ផ្ទះបាយ សំណល់ពីសត្តឃាដ (សំណល់ពីសត្វគេសំលាប់) កាកសំណល់ពីឡជីវឧស្ម័ន។ល។ ជំរៅទឹកដែលត្រីអណ្តែងរស់នៅបានល្អគឺចាប់ពី ០,៨ ទៅ ១ម៉ែត្រ។ រស់នៅធន់នឹងមជ្ឈដ្ឋានទឹក ដែលមានអុកស៊ីសែនរលាយក្នុងទឹកទាប ធន់នឹងកន្លែងចង្អៀត។ បើចិញ្ចឹមរយៈពេលពី៣ ទៅ ៤ខែ បានទំងន់ពី ៣-៥ខាំក្នុង ១ក្បាល។

ត្រីអណ្តែងកូនកាត់ (ត្រីអណ្តែងបង្កាត់)

សព្វថ្ងៃនេះ អ្នកចិញ្ចឹមត្រីចាប់អារម្មណ៍លើការចិញ្ចឹមត្រីអណ្តែង ហើយភាគច្រើនជាប្រភេទត្រីអណ្តែងកូនកាត់ ឬហៅថា ត្រី​អណ្តែងបង្កាត់ (បង្កាត់រវាងត្រីអណ្តែងឈ្មោលអាហ្រ្វិច ជាមួយត្រីអណ្តែងទន់ញីក្នុងស្រុក)។ ត្រីអណ្តែងកូនកាត់នេះ គឺចិញ្ចឹមឆាប់ធំធាត់ និងឆាប់បានហូប ឬលក់។​

ត្រីអណ្តែងទន់ (Broadhead Catfish) ប្រភេទត្រីក្នុងស្រុក

ជាប្រភេទត្រីទឹកសាបក្នុងស្រុករស់នៅតាមវាលស្រែ បឹងបួរ ប្រឡាយ ត្រពាំង ព្រែក ព្រៃលិចទឹក​។ល។ គេប្រទះឃើញច្រើននៅកន្លែងណាដែលមានដីមមោក ឬស្មៅត្រឹប (ស្មៅទន់ៗដុះនៅកណ្តាល​បឹង) ជាពិសេសតំបន់ណាមានបឹងបួរធំៗ។

ត្រីអណ្តែងរឹង (Walking Catfish) ប្រភេទត្រីក្នុងស្រុក

ជាប្រភេទត្រីទឹកសាបក្នុងស្រុករស់នៅតាមវាលស្រែ ប្រឡាយ ស្រះ ត្រពាំង។ គេប្រទះឃើញត្រីអណ្តែងរឹងនេះរស់នៅតាមវាលស្រែ ជាពិសេសតំបន់មិនសូវមានបឹងបួរជាដើម។

ការកត់សំគាល់ក្បាលត្រីអណ្តែងរឹង ត្រីអណ្តែងទន់ ត្រីអណ្តែងបង្កាត់ និងត្រីអណ្តែងអាហ្វិ្រច

ប្រភព ទស្សនាវដ្តីកសិករ

កែសម្រួលដោយ រក្សា ខ្មែរ

សហគមន៍សម្បូរសប្បាយ

 

អំពី sambosabay

Avatar
សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

វិធីធ្វើទឹកខ្ញី (សំរាប់អ្នកចង់បង្កើតសិប្បកម្មធ្វើទឹកខ្ញី)

មានបងប្អូនជាច្រើនក្នុងមួយថ្ងៃៗ គឺបានខិតខំគិតរកមុខរបរចិញ្ចឹមជីវិត ក្នុងនោះក៏មានការកែច្នៃផលិតផលផងដែរ។ នៅ​ពេលនេះ​ សហគមន៍សម្បូរសប្បាយ បង្ហាញនូវអត្ថបទមួយដែលនិយាយអំពីការធ្វើទឹកខ្ញី មានក្បួនខ្នាតត្រឹមត្រូវ ពិសេសត្រូវនឹងអ្នកមានបំណងបង្កើតសិប្បកម្មធ្វើទឹកខ្ញីនេះ។