Home / កសិកម្ម / អ្នកស្រី ញ៉ែម សុវណ្ណរី ម្ចាស់ពានរង្វាន់លេខ១ មេគោក្រមុំ ៣ក្បាល

អ្នកស្រី ញ៉ែម សុវណ្ណរី ម្ចាស់ពានរង្វាន់លេខ១ មេគោក្រមុំ ៣ក្បាល

អ្នកស្រី ញ៉ែម សុវណ្ណរី អាយុជាង៤០ឆ្នាំ រៀនថ្នាក់ទី៩ រស់នៅភូមិពោធិព្រះសង្ឃ ឃុំតាភេម ស្រុកត្រាំកក់ ខេត្តតាកែវ​។អ្នកស្រី​បានគាំទ្រដោយ​អង្គការសេដាក ទាក់ទងនឹងបច្ចេកទេសកសិកម្មតាមគោលការណ៍ធម្មជាតិ ជំនាញការរៀបចំសហគមន៍ ការគ្រប់គ្រងដឹកនាំ និងការអភិវឌ្ឍខ្លួននៅឆ្នាំ២០០៤។

ដោយការខិតខំប្រឹងប្រែងមិនចេះ​នឿយហត់ និងមានសមត្ថភាពក្នុងការគ្រប់គ្រង អ្នកស្រីបានសហការជាមួយសមាជិកក្រុមគ្រួសារ ធ្វើការអភិវឌ្ឍគ្រួសាររហូតទទួលបានជោគជ័យ ​និង​មានភាពល្បីល្បាញ​នៅក្នុងស្រុក និងតាមបណ្តាខេត្តផ្សេងៗគួរឲ្យ​កោតសសើរ។​ ខាង​ក្រោម​នេះ គឺជាការកត់សម្គាល់នូវភាពរីកចម្រើនរបស់ក្រុមគ្រួសារអ្នកស្រី៖

  • ផ្ទៃដីធ្វើស្រែសរុបមានចំនួន១៥០អា ដំបូងទទួលបានផល ២តោន បច្ចុប្បន្នទិន្នផលកើនបានជាង ៥តោនក្នុង ១ឆ្នាំ គាត់អាចរកចំណូលពីការលក់ស្រូវបានចំនួន ៦,២លានរៀល។
  • ចំណូលពីកាដាំបន្លែចំរុះនៅវាលស្រែដូចជាត្រសក់ ល្ពៅ ឪឡឹក សណ្ដែកខៀវ ដំឡូង ម្រះ ត្រឡាច ផ្ទី​… ក្នុង១ឆ្នាំបាន ៦​ លានរៀល។
  • ចិញ្ចឹមមាន់សាច់ចំនួន ២៥០ក្បាល ក្នុង ១ឆ្នាំ​លក់បាន ២​,៤លានរៀល។
  • មានគោសម្រាប់ធ្វើជាកម្លាំងអូសទាញ និងលក់ចំនួន៩ក្បាល។ គោមានសារៈសំខាន់ណាស់ក្រៅពីជួយជាកម្លាំង គឺវាផ្ដល់ជាលាមកសម្រាប់ធ្វើជីធម្មជាតិបានយ៉ាងល្អប្រសើរ។
  • មានលុយសន្សំនៅក្នុងក្រុមចំនួន១០លានរៀល ហើយបានដកវិនិយោគលើកសិកម្ម និងកូនរៀនជាបន្តបន្ទាប់ ដែលកូនម្នាក់បានរៀនចប់មហាវិទ្យាល័យ។ បច្ចុប្បន្ននៅសល់លុយសន្សំ ២លានរៀល។
  • នៅឆ្នាំ២០១៣ អ្នកស្រីទទួលបានរង្វាន់លេខ ១ ទូទាំងប្រទេស គឺពានរង្វាន់សេដាក ដោយ​ទទួល​បានមេគោក្រមុំចំនួន ៣ ក្បាល ដោយគាត់បានអនុវត្តប្រព័ន្ធប្រពលវប្បកម្មស្រូវ​តាមគោលការណ៍ធម្មជាតិលើផ្ទៃដី៣០អា ទទួលបានផលសរុបចំនួន ២.២០០គីឡូក្រាម (ឬ ៧,៣៣ ​តោន ​ក្នុង ១ហិកតា)។
  • ដោយសារភាពល្បីល្បាយក្នុងការធ្វើកសិកម្ម នៅឆ្នាំ២០១៤ អ្នកស្រីបានទទួល​ទស្សនកិច្ចសិក្សារចំនួន ៦១ដង ទាំងក្នុង និងក្រៅប្រទេសដែលមានអ្នកមក​ទស្សនកិច្ចចំនួន ៦៦៦នាក់ (គិតត្រឹមឆ្នាំ២០១៤)។
  • បានទទួលចំណូលពីសេវាកម្មទស្សនកិច្ចសិក្សាចំនួន ៨៦ម៉ឺនរៀល នឹងចំណូលពីការរៀបចំអាហារចំនួន ៥លានរៀល។

ផែនការសំខាន់ៗត្រូវសម្រេចរយៈពេល ៥ឆ្នាំខាងមុខ (២០១៥-២០១៩)

  • បង្កើតឲ្យមានកសិដ្ឋានសរីរាង្គចម្រុះដ៏ល្អមួយ សម្រាប់ផ្ដល់ជាអាហារដ៏មានគុណភាព
  • សន្សំលុយនៅក្នុងក្រុមសន្សំឲ្យបាន ១០០ លានរៀល
  • ចិញ្ចឹមគោឲ្យបាន ១២ក្បាល
  • ធ្វើប្រព័ន្ធប្រពលវប្បកម្មស្រូវតាមគោលការណ៍ធម្មជាតិលើដី ៣០អារ ឲ្យបានផលស្រូវយ៉ាងហោចណាស់ ៣តោន
  • រៀបចំឲ្យមានស្រះ និងពង្រីកការដាំដុះបន្លែសម្រាប់ផ្គត់ផ្គង់មកផ្សារកសិផលធម្មជាតិសេដាក ឲ្យបានពី ១០-២០ លានរៀលក្នុង១ឆ្នាំ
  • ចិញ្ចឹមមាន់ឲ្យបានចំណូលប្រមាណ ៥លានរៀលក្នុង១ឆ្នាំ។

គាត់ចាប់អារម្មណ៍ថា បច្ចុប្បន្ននេះគាត់​មាន​ជីវភាពធូរធាច្រើន មានកេរ្តិ៍ឈ្មោះ មានគេ​រាប់​អានទាំងអ្នកក្នុងភូមិនិងអ្នកខាងក្រៅ​ មាន​គំនិត​ច្នៃប្រឌិត មានភាពក្លាហាន និងមាន​សមត្ថភាព​​​លើ​បច្ចេកទេសកសិកម្មតាមគោលការណ៍ធម្មជាតិ។ គាត់បានឲ្យជាយោបល់​សម្រាប់​កសិករផ្សេងៗថា ដើម្បីឲ្យកសិករក្លាយជាអ្នកមាន កសិករត្រូវខិតខំប្រឹងប្រែងឲ្យត្រូវរបៀប យកចិត្តទុកដាក់ផ្ដោតអារម្មណ៍លើការងារ  គិតវិជ្ជមាន គិតធ្វើអ្វីត្រូវធ្វើឲ្យបាន ដាក់ផែនការ​ហើយត្រូវតែធ្វើ (ធ្វើថ្ងៃមិនគ្រប់ធ្វើយប់បន្ថែម)​។

ជាងនេះទៀតការធ្វើកសិកម្មដើម្បីឲ្យទទួលបានជោគជ័យ កសិករត្រូវត្រៀមលក្ខណៈឲ្យបានល្អដូចជា៖

  • ជ្រើសរើស បន្សុទ្ធ និងទុកដាក់ពូជឲ្យបានល្អ
  • ត្រៀមកម្លាំងពលកម្មឲ្យបានគ្រប់គ្រាន់
  • ត្រូវមានប្រភពទឹក និងត្រៀមទឹកឲ្យបានគ្រប់គ្រាន់
  • ត្រៀមជីកំប៉ុស្តទឹក កំប៉ុស្តគោក លាមកសត្វ ជីស្រស់ឲ្យបានគ្រប់គ្រាន់
  • ត្រូវមានឡជីវឧស្ម័ន ដែលផ្ដល់ជីយ៉ាងល្អបំផុតសម្រាប់ដំណាំ
  • យកចិត្តទុកដាក់លើផែនការឲ្យបានល្អ
  • ដើម្បីឲ្យដំណាំទទួលបានផលច្រើន ត្រូវចិញ្ចឹមសត្វ ដើម្បីបានលាមកទុកធ្វើជី
  • មានទំនាក់ទំនងផ្សារភ្ជាប់ជាមួយទីផ្សារឲ្យបានល្អ។

តាមរយៈលទ្ធផលខាងលើបានបញ្ជាក់យ៉ាងច្បាស់ថា ការយកចំណេះដឹងទៅប្រើប្រាស់ គឺ​ពិតជាទទួលបានប្រាក់ចំណូលយ៉ាងច្រើន និងបានពីច្រើនប្រភព ដែលជួយលើកស្ទួយជីវភាព​​គ្រួសារ​របស់អ្នកស្រី ញ៉ែម សុវណ្ណរី មានមុខមានមាត់ ទទួលបាននូវការគោរព ស្រឡាញ់​ពីសមាជិកសហគមន៍៕

ប្រភព ទស្សនាវដ្តីកសិករ

សហគមន៍សម្បូរសប្បាយ

អំពី sambosabay

Avatar
សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

ហេតុអ្វីបានជាយើងចាំបាច់ចិញ្ចឹមត្រីក្នុងរណ្ដៅ ឬក្នុងអាង?

កសិករភាគច្រើនមានទំលាប់ជីករណ្ដៅដាក់សំរាម កាកសំណល់ ឬដាក់ជីលាមកសត្វនៅតាមផ្ទះតែគាត់មិនបានគិតដល់ការដាក់ត្រីចិញ្ចឹមក្នុងរណ្ដៅនោះទេ។ តែបច្ចុប្បន្ននេះ យើងជំរុញឲ្យកសិករមានការ​គិតគូរជីករណ្ដៅ ឬធ្វើអាងចិញ្ចឹម ការផ្ដល់់ចំណី និងរបៀបកែប្រែគុណភាពទឹក ដើម្បីឲ្យត្រីមានការលូតលាស់ និងធំធាត់លឿន។