Home / ព័ត៌មាន / ធ្វើស្រែធ្វើឲ្យល្អ ផលកើនបន្តរៀងរាល់ឆ្នាំ

ធ្វើស្រែធ្វើឲ្យល្អ ផលកើនបន្តរៀងរាល់ឆ្នាំ

លោក សំ រឿន ជាកសិកររស់នៅភូមិត្រពាំងជ្រៃ ឃុំត្រពាំងធំខាងត្បូង ស្រុក​ត្រាំ​កក់ ខេត្តតាកែវ។ គាត់មានអាយុជាង ៥០ឆ្នាំ រៀនបានថ្នាក់ទី៨ថ្មី។ គាត់មានតួនាទី​ជា​ប្រធាន​សមាគមអភិវឌ្ឍន៍កសិកម្មភូមិ​ត្រពាំងជ្រៃ ដែលសមាគមនេះកើតនៅថ្ងៃ​ទី​១០ ខែតុលា ឆ្នាំ២០០៥ ដោយមានការគាំ​ទ្រ​​ដំបូងពីអង្គការសេដាក។ សមាគមនេះ​ចាប់ផ្តើម​ដំបូងមានសមាជិកចំនួន១២នាក់ បច្ចុប្បន្នមានសមាជិកចំនួន៤៦នាក់។ ទុន​សន្សំដំបូង​មានចំនួន១២ម៉ឺនរៀល បច្ចុប្បន្ន​ទុនសន្សំកើនបាន ១២លានរៀល។ ភូមិត្រពាំងជ្រៃ មាន​គ្រួសារសរុបចំនួន​១២០គ្រួសារ ក្នុងនោះមាន៣៣គ្រួសារ បាននឹងកំពុងដើរតាម​ផ្លូវ​ដូច​លោក សំ រឿន យ៉ាងពិតប្រាកដ ដែលធ្វើឲ្យជីវភាពធូរធារតាមរយៈការធ្វើស្រែយកផលស្រូវ​​ដ៏​សន្ធឹកសន្ធាប់នោះ។ ក្នុងចំណោម ៣៣គ្រួសារនេះ ពួកគាត់បានសហការចងក្រងជាក្រុម​ផលិត​ស្រូវ​សរីរាង្គពូជក្រអូបលក់ជាសហគមន៍ដែលមួយឆ្នាំៗលក់បានចំនួន ១០០តោន ដោយ​មានការត្រួតពិនិត្យគុណភាព និងទទួលស្គាល់ពីស្ថាប័នចំនួន ៣ គឺ៖

  • ប្រព័ន្ធត្រួតពិនិត្យផ្ទៃ​ក្នុងទទួលស្គាល់ដោយអង្គការសេដាក
  • ក្រុមហ៊ុនប៊ីស៊ីអេស (BCS) មកពីប្រទេសអាល្លឺម៉ង់ ដែលជាក្រុមហ៊ុនបញ្ជាក់​គុណភាព​ផលិតផលសរីរាង្គធំជាងគេក្នុងពិភពលោក។ ការទទួលបាន​ការបញ្ជាក់គុណភាពនេះ ធ្វើឲ្យស្រូវសហគមន៍កើនតម្លៃលើសពីធម្មតា ១០ភាគរយ
  • ស្ថាប័នពាណិជ្ជកម្ម​យុត្តិធម៌ (Fair Trade) បានផ្តល់នូវតម្លៃថ្លៃខ្ពស់ជាង​ពាណិជ្ជកម្មធម្មតា ៤,៥% នៅពេលនាំចេញផលិតផលទៅលក់នៅប្រទេសអាមេរិក ​និង​សហភាព​​អឺរ៉ុប។
  • ភូមិនេះមានអ្នកចាប់អារម្មណ៍យ៉ាងច្រើនក្នុងការចូលរួមជាមួយសហគមន៍ម៉ាស៊ីន​កិនស្រូវ (ស.ម.ស.) ដែលមានចំនួន ២០នាក់ មានទុន ១០លានរៀល។

សូមស្លេះត្រឹមនេះទាក់ទងនឹងព័ត៌មានសមាគមភូមិ។ យើងសូមធ្វើការស្វែងយល់​ពី​ស្ថានភាពគ្រួសាររបស់គាត់ តាមរយៈផលិត​កម្មស្រែខ្លឹម។ គាត់បានរៀបរាប់ថានៅឆ្នាំ២០០៥  គាត់មានដីស្រែចំនួន១ហិកតា ទិន្នផលស្រូវទទួលបាន ១,៨តោន មានគោ៦ ក្បាលជាកម្លាំងអូសទាញ និងសម្រាប់លក់ដូរ។ ដោយការខិតខំ​ប្រឹងប្រែងមិនខ្លាចនឿយហត់ គួបផ្សំនឹងជំនឿថា ធ្វើស្រែឲ្យបានល្អផល​នឹងកើនបន្តជា​រៀងរាល់​​​ឆ្នាំ បច្ចុប្បន្នទិន្នផលកើនដល់៣តោនក្នុង១ហិកតា ដែលធ្វើឲ្យជីវភាពរបស់គាត់​កាន់​តែ​ប្រសើរ​ឡើង​ជា​លំដាប់។ តើអ្វីដែលសម្គាល់ថា ជីវភាព​គ្រួសារ​គាត់​ប្រសើរ​ឡើង? គិតត្រឹមពេលនេះគ្រួសាររបស់គាត់មានធនធាន​ជាច្រើន​តាមរយៈ​ការលក់​ស្រូវខ្លឹមដូចជា ៖

  • •មានដីស្រែសរុបចំនួន ៤,៣ហិកតា ក្នុងនោះដីស្រែ ០,៥ហិកតា ផលិតសម្រាប់​ហូប ​និង ៣,៨ហិកតា ផលិតសម្រាប់លក់ ទិន្នផលស្រូវជាមធ្យមទទួលបាន៣តោនក្នុង១ហិកតា
  • •មានគោចំនួន៦ក្បាល ទិញសម្រាប់ប្រើជាកម្លាំងពលកម្ម និងលក់ដូរធ្វើ​ពាណិជ្ជកម្ម
  • •មានទុនសន្សំក្នុងសមាគមចំនួន២ ក្នុងភូមិ២ផ្សេងគ្នាចំនួន១០លានរៀល
  • •គាត់បានដាក់ទុនវិនិយោគក្នុងសហគមន៍ម៉ាស៊ីនកិនស្រូវចំនួន ៣,៤លានរៀល
  • •គាត់ឈប់ប្រើប្រាស់ជីគីមីតាំងពីឆ្នាំ២០០៦មកម្លេះ ដែលជាហេតុធ្វើឲ្យការ​ចំណាយលើការធ្វើស្រែមានចំនួនតិចបំផុត។

គាត់បានបញ្ជាក់យ៉ាងលម្អិតពីការចំណាយ និងចំណូលក្នុងការធ្វើស្រែខ្លឹមលើផ្ទៃដី​ស្រែ១ហិកតាដូចតារាងខាងក្រោម៖

ល.រ. មុខចំណាយ ចំណាយ សរុប
ជួលគេស្ទូង ៣០ នាក់ X ១ ម៉ឺនរៀល ៣០ ម៉ឺនរៀល
ជួលគេដកសំណាប ៥ ម៉ឺនរៀល
ជួលគេភ្ជួរ ២ ដង ៤០ ម៉ឺនរៀល
ជួលគេច្រូត ២០ ម៉ឺនរៀល
ជួលគេរែកដីដំបូក ៦ ម៉ឺនរៀល
ជួលគេដឹកកណ្តាប់ (ដឹកខ្លួនឯងខ្លះ) ៩ ម៉ឺនរៀល
  សរុបចំណាយក្នុង ១ ហិកតា   ១,១៩ លានរៀល

ទិន្នផលស្រូវក្នុង ១ហិកតា ដែលទទួលបាន ៣.០០០គីឡូក្រាម X ១.៦០០រៀល = ៤,៨ លានរៀល។ តាមលទ្ធផលខាងលើមាន​ន័យថា ចំណូល ៤,៨លានរៀល ដកចំណាយ ១,១៩លានរៀល គឺនៅសល់ ៣,៧លានរៀល ក្នុង១ហិកតា ជាទឹកប្រាក់ដែលគ្រួសារគាត់ចំណេញពីផលិតកម្មស្រូវ។ ដោយសារគ្រួសារគាត់មានដី ៣,៨ហិកតា ដូច្នេះគាត់បានចំណេញសរុបចំនួន ៣,៨ហិកតា X ៣,៧លានរៀល = ១៤,០៦លានរៀល ពីផលិតកម្មស្រូវ។ ដើម្បីកាន់តែច្បាស់យើង​សាកល្បង​គិតតាមរូបមន្តថ្លៃដើមដូចខាងក្រោម៖

ថ្លៃដើម = ចំណាយលើការទិញនិងជួល
ផលិតផលដែលផលិតបាន
ថ្លៃដើម = ១.១០០.០០០ រៀល = ៣៦៧ រៀល
៣.០០០ គ.ក.

តួលេខខាងលើបញ្ជាក់ថា លោក សំ រឿន ផលិតស្រូវក្នុង ១គីឡូក្រាម អស់ថ្លៃដើម​ចំនួន ៣៦៧រៀល គាត់លក់ជាសហគមន៍បានតម្លៃចន្លោះពី ១.៥០០រៀលទៅ ១.៧០០រៀលក្នុង ១គីឡូក្រាម។ ដូច្នេះផលចំណេញក្នុងការផលិតស្រូវ ១គីឡូក្រាម ស្មើនឹងថ្លៃលក់ ១ ៦០០រៀល ដកថ្លៃដើម ៣៦៧រៀល = ១.២៣៣រៀល។

តើហេតុអ្វីបានជាគាត់ទទួលបានផលចំណេញយ៉ាងច្រើនពីការធ្វើស្រែ ?

  • គាត់ប្រើប្រាស់តែជីធម្មជាតិ (ជញ្ជ្រាំង ជីស្រស់ លាមកសត្វ ដីដំបូក) ដែលមានក្នុង ភូមិរបស់គាត់
  • ទុកពូជ ជ្រើសរើសនិងបន្សុទ្ធពូជស្រូវដោយខ្លួនឯងជារៀងរាល់ឆ្នាំ
  • ប្រើប្រាស់កម្លាំងពលកម្មក្នុងគ្រួសារខ្លះ និងជួលអ្នកខាងក្រៅខ្លះ ពេលមានតម្រូវការ​ចាំបាច់
  • អត់មានចំណាយលើការទិញជីគីមីយកមកប្រើប្រាស់នៅក្នុងផលិតកម្មស្រូវទេ។

លទ្ធផលខាងលើបង្ហាញឲ្យឃើញថា ការធ្វើស្រែដោយធ្វើឲ្យប្រាកដនាំឲ្យបានផលច្រើនតែ​​អ្វី​ដែលកសិករត្រូវយកចិត្តទុកដាក់បំផុត គឺត្រូវផលិតតាមគោលការណ៍ធម្មជាតិ ផលិតតែ​ពូជ​ដែលមានតម្លៃថ្លៃ និងមានតម្រូវការលើទីផ្សារ ដូចជាពូជផ្កាម្លិះជាដើម បើកសិករផលិត​ពូជ​ធម្មតាៗ តម្លៃទទួលបានធម្មតា គឺតែ ៨០០ទៅ ១.០០០រៀលប៉ុណ្ណោះក្នុង១គីឡូក្រាម បើ​ផលិតពូជស្រូវក្រអូបតាមគោលការណ៍ធម្មជាតិលក់បានតម្លៃពី ១.៥០០រៀលទៅ ១.៧០០រៀល។ បើមិនជឿ​កសិករ​អាច​ធ្វើការសាកល្បងដោយខ្លួនឯង និងធ្វើការប្រៀបធៀបដោយស្រែមួយធ្វើតាមរបៀបធម្មតា ពូជ​ធម្មតា និងស្រែមួយទៀតធ្វើតាមវិធីសាស្ត្រស្រែខ្លឹម និងធ្វើពូជស្រូវ​ក្រអូប ដូច្នេះយើងនឹងទទួលនូវលទ្ធផលខុសគ្នាមិនខាន។ តាមរយៈបទពិសោធន៍នេះ គាត់អំពាវនាវដល់កសិករទូទាំងប្រទេស ឲ្យអនុវត្តបច្ចេកទេសស្រែខ្លឹម ពីព្រោះមានតែបច្ចេកទេសនេះទេ ដែលជួយឲ្យកសិករមាន​ជីវភាព​ធូរធារ ក្នុងផលិតកម្មស្រូវ ដោយសារការចំណាយលើថ្លៃដើមទាប លក់ស្រូវបានថ្លៃ និង​ធ្វើឲ្យជីជាតិដីកាន់តែល្អប្រសើរជាលំដាប់។ តាម​រយៈចំណាប់អារម្មណ៍​បន្ថែម​ពីអ្នកស្រី អុក ទូច ជាភរិយារបស់គាត់បានបញ្ជាក់បន្ថែមថា ការធ្វើស្រែខ្លឹមពិតជា​មាន​ប្រយោជន៍​មែន ដោយពួកគាត់ទទួលបានផលស្រូវកើនឡើងជាបន្តបន្ទាប់ជារៀងរាល់ឆ្នាំ និងលក់បានតម្លៃថ្លៃ។ គាត់​សប្បាយ​ចិត្តរួមគ្នាជាមួយក្រុមគ្រួសារដើម្បីបន្តការងារនេះឲ្យកាន់តែល្អ និងពង្រីកផ្ទៃដីធ្វើស្រែ​ខ្លឹមនេះបន្ថែមទៀត។

អ្វីដែលគ្រួសារគាត់ប្រថ្នាចង់ឃើញឲ្យកើតមាននៅឆ្នាំ២០២២ រួមមាន៖

  • មានដីស្រែ ១០ហិកតា ទិន្នផលស្រូវយ៉ាងហោចណាស់ឈានដល់ ៥ តោន ក្នុង១ហិកតា
  • មានគោ១២ក្បាល ចិញ្ចឹមសម្រាប់ប្រើជាកម្លាំងអូសទាញនិងលក់
  • ចំណូលពីសត្វ និងបន្លែនៅក្នុងកសិដ្ឋានរបស់ខ្លួនយ៉ាងហោចណាស់ ២០លាន​រៀល ​ក្នុង១ឆ្នាំ
  • មានប្រាក់សន្សំក្នុងសមាគមយ៉ាងតិច ១០០លានរៀល
  • មានទុនវិនិយោគក្នុងម៉ាស៊ីនកិនស្រូវសហគមន៍ចំនួន ៤០លានរៀលដោយ១ឆ្នាំ​ដាក់វិនិយោគ ៤លានរៀល។

តាមរយៈបទពិសោធន៍ជាក់ស្តែងខាងលើ ខ្ញុំសង្ឃឹមថា បងប្អូនកសិករដទៃទៀត​នឹងធ្វើ​ការសាកល្បងដោយចាប់ផ្តើមអនុវត្តនូវវិធីសាស្ត្រធ្វើស្រែខ្លឹម យ៉ាងហោចណាស់លើដី ១០អារ និងពង្រីកបន្តិចម្តងៗជារៀងរាល់ឆ្នាំ ជាងនេះទៀតការផលិតតែពូជស្រូវក្រអូបមានតម្លៃថ្លៃ មាន​តម្រូ​វការលើទីផ្សារ គឺជាចំណុចដែលត្រូវយកចិត្តទុកដាក់បំផុត។ មិនត្រឹមតែប៉ុណ្ណោះ​តាមរយៈ​​ការលក់ស្រូវ កសិករអាចទិញគោក្របីបន្ថែម ដើម្បីប្រើជាកម្លាំងអូសទាញ និងយក​លាមក​ប្រើប្រាស់ជាជីធម្មជាតិមួយចំណែកទៀត ចំណូលពីការលក់ស្រូវកសិករ​អាចកាត់​ដាក់​សន្សំក្នុងក្រុមសន្សំ និងវិនិយោគក្នុងម៉ាស៊ីនកិនស្រូវបន្ថែមជារៀងរាល់ឆ្នាំ ទាំងអស់នេះ​នឹងជួយលើកមុខមាត់កសិករជានិរន្តរ។

សូមជូនពរលោក សំ រឿន ទទួលបានជោគជ័យ និងសម្រេចនូវសេចក្តីប្រាថ្នា​ក្នុង​រយៈពេល៣ឆ្នាំខាងមុខ។ យើងខ្ញុំសង្ឃឹមថា ឧទាហរណ៍នេះ គឺជាពន្លឺមួយជួយជំរុញទឹកចិត្តកសិករនៅប្រទេសកម្ពុជាឲ្យអនុវត្តដើម្បីបង្កើនគុណភាពជីវិតឲ្យកាន់តែប្រសើរ៕

ប្រភព ទស្សនាវដ្តីកសិករ

សហគមន៍សម្បូរសប្បាយ

អំពី sambosabay

Avatar
សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

បាឋកថាអំពី «ស្រា» នៅព្រឹកថ្ងៃទី១៦ កក្កដា ២០១៩ ដោយលោកសាស្ត្រាចារ្យ អាំង ជូលាន

តាមគេហទំព័រអាជ្ញាធរជាតិអប្សរា បានឲ្យដឹងថា នាព្រឹកថ្ងៃអង្គារ ទី១៦ ខែកក្កដា ឆ្នាំ២០១៩ អាជ្ញាធរជាតិអប្សរា នឹងរៀបចំបាឋកថាស្តីអំពី «ស្រា» ដោយលោកសាស្ត្រាចារ្យ អាំង ជូលាន នៅមជ្ឈមណ្ឌលអាជ្ញាធរជាតិអប្សរា។