Home / កសិកម្ម / បទពិសោធន៍រៀបចំសួនបន្លែចម្រុះ (កសិករ កាន់ ម៉េងជាង)

បទពិសោធន៍រៀបចំសួនបន្លែចម្រុះ (កសិករ កាន់ ម៉េងជាង)

កសិករ កាន់ ម៉េងជាង រស់នៅភូមិត្រពាំងព្រីង ឃុំត្រពាំងព្រីង ស្រុកតំបែរ ខេត្តត្បូងឃ្មុំ។ គាត់បាន​សហ​ការ​ជាមួយអង្គការសេដាក​ តាំងពីឆ្នាំ២៩១២ មកម្លេះ។ បច្ចុប្បន្នគាត់មានតួនាទីជាកសិករ​បង្គោល​ក្នុង​គម្រោង បង្កើន​កម្រិតជិវភាពគ្រួសារកសិករក្រីក្រនៅក្នុងតំបន់ដីស្ងួតដែលងាយរងគ្រោះ ក្នុងខេត្តសៀម រាប និងត្បូង​ឃ្មុំ។ តាមរយៈការសហការ និងរួមផ្សំបទពិសោធន៍ផ្ទាល់ខ្លួនខ្លះៗ ធ្វើឲ្យគាត់មានបច្ចេកទេសល្អ ៗ ក្នុង​ការ​ដាំ​ដំណាំបន្លែចម្រុះដោយប្រើប្រាស់ជីធម្មជាតិ មិនប៉ះពាល់បរិស្ថាន និងសុខភាព។

១. បច្ចេកទេសរៀបចំសួនចម្រុះ

ផ្ទៃដីដែលបងប្រុសដាំបន្លែមានចំនួន ១៧អារ មានដូចជា ត្រសក់ ត្រឡាច សណ្តែកកួរ ត្រកួន ល្ហុង និងជីគ្រប់មុខជាដើម។ ក្នុងការដាំដំណាំនេះ គាត់បានបែងចែកផ្ទៃដីជាប្លង់ៗ និងធ្វើការលើកជារងទៅតាម​ប្រភេទដំណាំនីមួយៗ បើនិយាយពីប្រព័ន្ធដាំដុះមានលក្ខណៈដាំបណ្តាក់ ហើយដាំដុះគ្រប់រដូវ លើកលែងតែ​ដំណាំត្រសក់គឺ គាត់ផ្អាកដាំដុះនៅ ខែវិច្ឆិកា ដល់ ខែមករា ដោយគាត់យល់ឃើញថា នៅចន្លោះខែនេះមាន​ខ្យល់​ខ្លាំងពិបាកដាំដុះ។

២. ការរៀបចំដី និងការដាំ

គាត់បានដាំបន្លែនៅលើផ្ទៃដី ១៧អារ ដោយបែងចែងប្លង់ ត្រសក់ ១០អារ, ត្រឡាច ៣អារ, សណ្តែក​កួរ ៣អារ, ហើយបន្លែបន្ទាប់​បន្សំមានល្ហុង ត្រកួន និងជីគ្រប់មុខ ១អារ។ គាត់បានភ្ជួរដីហាលរយៈពេល ៧ទៅ១០ថ្ងៃ បន្ទាប់មករាស់ម្តងទៀតដើម្បីឲ្យដីផុសល្អ ងាយស្រួលយកស្មៅចេញ និងលើកជារងទៅតាមប្រភេទដំណាំនីមួយៗ។

  • ត្រសក់. រងនីមួយៗមានទទឹង ០,៩ម៉ែត្រ បណ្តោយ៥០ម៉ែត្រ គំលាតពីរងមួយទៅមួយមានប្រវែង ០,៥ម៉ែត្រ និងចន្លោះរណ្តៅដាំនៅលើរងមានប្រវែង ០,៧ម៉ែត្រ។
  • សណ្ដែកកួរ. រងនីមួយៗមានទទឹង ០,៩ម៉ែត្រ បណ្តោយ៥០ម៉ែត្រ គំលាតពីរងមួយទៅមួយមានប្រវែង ០,៥ម៉ែត្រ និងចន្លោះ​រណ្តៅដាំលើរងមានប្រវែង ០,៣ម៉ែត្រ។
  • ត្រឡាច. រងនីមួយៗមានទទឹង ១ម៉ែត្រ បណ្តោយ១២ម៉ែត្រ គំលាតពីរងមួយទៅមួយមានប្រវែង ១ម៉ែត្រ និងចន្លោះរណ្តៅដាំលើរងមានប្រវែង ១ម៉ែត្រ។

របៀបដាំ. ក្នុងការដាំប្រភេទដំណាំទាំង៣ខាងលើនេះ គឺប្រហាក់ប្រហែលគ្នា។ គាត់បានយកគ្រាប់ពូជ​ហាល​ថ្ងៃ រួចយកគ្រាប់ពូជនោះទៅត្រាំ​ទឹក​រយៈពេល១ម៉ោង បន្ទាប់មកស្រង់លាងសំអាតនឹងទឹកស្អាត ២ទៅ៣ដង ហើយផ្អាប់ទុក៣ទៅ៤ម៉ោងទើបគាត់យកទៅដាំ។ គាត់បានជីករណ្តៅជំរៅ ២តឹក ដោយដាក់ជីកំប៉ុស្តគោក ០,៥គីឡូក្រាម និងធ្យូងអង្កាម ០,៥គីឡូក្រាម រួចច្របល់ឲ្យសព្វ។ បន្ទាប់មកយកគ្រាប់ដាក់ដាំជំរៅ ១ថ្នាំងដៃ ដោយមួយរណ្តៅដាក់ ២ទៅ៣គ្រាប់ រួចលុបដីសើរៗពីលើគ្រាប់។ បន្ទាប់មកទៀតគាត់បានយក​កំទេចចំបើង​គ្របរងដើម្បីរក្សាសំណើមដី និងការពារកុំឲ្យខ្ទាតត្រូវពន្លកស្លឹកនៅពេលស្រោចទឹក និងធ្វើឲ្យដីមិនសូវហាប់​ពេល​មានភ្លៀងធ្លាក់។

៣. ការថែទាំ

  • ចំពោះត្រឡាចឡើងទ្រើងបានប្រវែង ១ម៉ែត្រ ទៅ ១,៥ម៉ែត្រ គាត់បានកាត់ពន្លកត្រួយដើម្បី​ឲ្យ​ត្រឡាច​បែកខ្នែងបានច្រើន។ រីឯសណ្តែកកួរវិញពេលដុះបានប្រវែង ២​,៥ម៉ែត្រ គាត់បានធ្វើការកាត់​ស្លឹក​ក្រោមចេញ ដើម្បីឲ្យការលូតលាស់បានលឿន។
  • ការដាំបន្លែនេះ គាត់បានធ្វើការស្រោចស្រពដោយប្រើទឹកស្រះ និងទឹកអណ្តូង មួយថ្ងៃស្រោច២ដង នៅរដូវប្រាំង។
  • គាត់បានប្រើធ្យូងអង្កាមសំរាប់ដាំដំណាំ ដើម្បីរក្សាសំណើមដីឲ្យផុសល្អ និងផ្តល់ជីវជាតិដល់ដំណាំ។
  • ស្រោចមេជីធម្មជាតិសំរាប់បំប៉នដំណាំឲ្យលូតលាស់ និងមានសុខភាពល្អ នៅពេលដំណាំមានអាយុ​១០ទៅ១៥ថ្ងៃ ស្រោចក្នុងមួយសប្តាហ៍ម្តង។ មេជីទឹកគាត់បានផ្សំឡើងពីទន្ទ្រានខែត្រ៣គីឡូក្រាម ដោយកាត់ជាកំណាត់ខ្លីៗផ្អាប់ទុកក្នុងធុង៧ថ្ងៃ រួចយកទៅលាយជាមួយស្កររងូ ឬស្ករត្នោតចំនួន​១​គីឡូក្រាម ទឹក១០លីត្រ រួចកូរវាឲ្យសព្វ។ បន្ទាប់មកផ្អាប់ទុករយៈពេល៣​ថ្ងៃអាចប្រើបាន។

របៀបប្រើ. យកមេជីទឹក ៣ទៅ៥ស្លាបព្រាបាយ លាយទឹក១០លីត្រ រួចស្រោចលើដំណាំ (តែ​ស្រោច​នៅពេលល្ងាច)។

  • ចំពោះសត្វល្អិត និងជំងឺ គាត់បានប្រើថ្នាំពុលផ្សំពីរុក្ខជាតិ (ស្លឹកស្ដៅ គ្រាប់ស្លែង វល្លិ៍បណ្តូលពេជ្រ ដែលមួយមុខ៣គីឡូក្រាម ផ្អាប់ទុក២ទៅ៣សប្តាហ៍ អាចប្រើបាន)។ ប្រើទឹកថ្នាំ១ផ្តិល (ផ្តិលតូច) លាយជាមួយទឹក២០លីត្រ បាញ់លើដំណាំនៅពេលមានសត្វល្អិតមកបំផ្លាញ។
  • ត្រួតពិនិត្យជាប្រចាំក្នុងការជ្រោយដី ធ្វើស្មៅនិងប្រមូលកំទេចចំបើង ស្លឹកចេក ចំបើងគ្របគល់​ដំណាំ​។

៤. ការប្រមូលផល

ក្រោយពេលបន្លែមានអាយុ ៣៥ទៅ៦០ថ្ងៃ គាត់ចាប់ផ្តើមប្រមូលផលជាបណ្ដើរៗ។ ដំណាំសំខាន់ៗ​មានចំនួន ៣មុខ៖

  • ត្រសក់ប្រមូលផលដំបូងមានអាយុកាល ៣៥ថ្ងៃ ដោយ១ថ្ងៃប្រមូលផលបានជាមធ្យម ៧០គីឡូក្រាម (តម្លៃលក់ដុំ ១គីឡូក្រាម ស្មើ ១.១០០រៀល តម្លៃលក់រាយ១គីឡូក្រាមស្មើ ១.៥០០រៀល) ហើយ​គាត់​ប្រមូលផលបានរយៈពេល២០ថ្ងៃ។
  • សណ្តែកកួរ ប្រមូលផលនៅអាយុ៦០ថ្ងៃ ដោយ១ថ្ងៃប្រមូលផលបានជាមធ្យម ៣-៥គីឡូក្រាម (តម្លៃ​លក់ដុំ ១គីឡូក្រាមស្មើ ១.០០០រៀល តម្លៃលក់រាយ ១គីឡូក្រាមស្មើ ២.០០០រៀល) ហើយគាត់​ប្រមូល​ផលបានរយៈពេល ៣០ថ្ងៃ។
  • ត្រឡាចប្រមូលផល នៅពេលវាមានអាយុ ៦០ថ្ងៃ ដោយ១ថ្ងៃប្រមូលផលបានជាមធ្យម ៣-៥ផ្លែ តម្លៃ​លក់រាយ ១ផ្លែស្មើ ១.៥០០រៀល ហើយគាត់ប្រមូលផលបានរយៈពេល ៣០ថ្ងៃ។

៥. ការវិភាគចំណូល-ចំណាយ

ដើម្បីឲ្យមានភាពងាយស្រួលក្នុងការតាមដាន រាល់ការចំណាយចំណូលនៃផលិតកម្មបន្លែខាងលើនេះ គាត់បានធ្វើតារាងកត់ត្រាចំណាយផ្សេងៗ និងចំណូលជាប្រចាំ ដើម្បីឲ្យដឹងថា ការអនុវត្តរបស់គាត់ធ្វើទៅ ខាត ឬ ចំណេញ?

ការចំណាយជាមធ្យម ចំណូលដុលជាមធ្យម
  • លើការបូមទឹក ១៥៦.០០០រៀល
  • ទិញអង្កាម ២០.០០០រៀល
  • ទិញខ្សែធ្វើទ្រើង ៣០.០០០រៀល
  • ចំណារទ្រើង ២០.០០០រៀល
  • ទិញលាមកគោ ៣០.០០០រៀល
  • ទិញពូជ ៧៩.០០០រៀល
  • ត្រសក់ ១.៦៥០.០០០រៀល
  • សណ្តែកកួរ ២១០.០០០រៀល
  • ត្រឡាច ១៨០.០០០រៀល
ចំណាយសរុប ៣៣៥.០០០រៀល ចំណូលសរុប ២.០៤០.០០០រៀល
ប្រាក់ចំណេញសុទ្ធ ១.៧០៥.០០០រៀល

៦. ចំណាប់អារម្មណ៍

ក្រោយពីធ្វើការដាំដុះដំណាំចម្រុះរួចមក បងប្រុសមានសេចក្តីសប្បាយរីករាយ ដោយទិន្នផលដំណាំ​ដែល​គាត់បានដាំដុះទទួលបានផលខ្ពស់សម្រាប់ផ្គត់ផ្គង់ក្នុងគ្រួសារ និងលក់បានប្រាក់ចំណូលបន្ថែមសម្រាប់​គ្រួសារផងដែរ ហើយការផលិតមិនប៉ះពាល់សុខភាពដល់អ្នកដាំ និងអ្នកបរិភោគ។

គាត់មានផែនការសំរាប់ដាំ និងចិញ្ចឹមសត្វ បន្តដូចជា

  • ពង្រីកផ្ទៃដីដាំដុះដំណាំចម្រុះពី ១៧អារ ទៅ ២៥អារ
  • ពង្រីកការចិញ្ចឹមត្រីចម្រុះ
  • បង្កើនការផលិតជីធម្មជាតិ (ជីកំប៉ុស្ត មេជីទឹក និងថ្នាំពុលធម្មជាតិ)
  • ពង្រីកដីដាំអំពៅ និងឪឡឹក តាមគោលការណ៍ធម្មជាតិ៕

ប្រភព ទស្សនាវដ្តីកសិករ

សហគមន៍សម្បូរសប្បាយ

អំពី sambosabay

Avatar
សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

ការធ្វើជីទឹកពីផ្លែឈើ

នៅពេលនេះ សហគមន៍សម្បូរសប្បាយ ផ្សព្វផ្សាយពីរបៀបធ្វើជីទឹក និងរបៀបប្រើប្រាស់ជីនេះ។ វត្ថុធាតុដើមដែលធ្វើជីទឹកនេះគឺផ្សំឡើងពីផ្លែឈើ និងមើមរុក្ខជាតិមានរសជាតិផ្អែម មានខ្លឹមសារដូចខាងក្រោម។