ឡជីវឧស្ម័ន និងអត្ថប្រយោជន៍ (កសិករ កង រ៉ាវី)

អ្នកមី កង រ៉ាវី ជាកសិកររស់នៅភូមិគ្រោះ ឃុំរលៀរប្អៀរ ស្រុករលៀរប្អៀរ ខេត្តកំពង់ឆ្នាំង។ ក្រោយពី​សហការជាមួយអង្គការសេដាក អ្នកមីងបានសំរេចចិត្តរៀបចំឡជីវឧស្ម័ន តាំងពីឆ្នាំ២០១១ ក្នុងគោលបំណង​ដើម្បី​ជួយសម្រាលការងារ បង្កើនសេដ្ឋកិច្ចគ្រួសារ ជីធម្មជាតិប្រើសំរាប់ការដាំដំណាំ មានភ្លើងសំរាប់ប្រើក្នុងផ្ទះ និងចម្អិនអាហារ។ ឡជីវឧស្ម័នរបស់គាត់មានទំហំ ៦ម៉ែត្រគូប ដែលចំណាយទឹកប្រាក់សាងសង់អស់​ប្រមាណ​ជា ៥០០ដុល្លារ ក្នុងនោះទឹកប្រាក់របស់គម្រោងបានផ្តល់ការលើកទឹកចិត្តចំនួន ១៥០ដុល្លារផងដែរ។ ចំពោះ​មូល​ហេតុដែលគ្រួសាររបស់គាត់បានសំរេចចិត្តសាងសង់ឡជីវឧស្ម័ននេះឡើងដោយសារ៖

• អាចជួយឲ្យក្រុមគ្រួសាររបស់គាត់សន្សំអុសបាន អាចកាត់បន្ថយពីការចំណាយទៅ​លើការទិញអុស​ជា​ប្រចាំក្នុងមួយឆ្នាំៗដែលអស់ទឹកប្រាក់ប្រមាណ ២០ម៉ឺនរៀល
• មានជីធម្មជាតិប្រើគ្រប់គ្រាន់នៅក្នុងមួយឆ្នាំសំរាប់ដំណាំស្រូវ បន្លែ ដោយប្រើជាជីទ្រាប់បាត និងប្រើ​ស្រោច​ពីលើដំណាំសំរាប់បំប៉នជាដើម
• គាត់ប្រើភ្លើងដែលបានពីហ្គាសឡជីវឧស្ម័នយកមកអម្អិតអាហារជាប្រចាំ។

វត្ថុធាតុចំបងៗដែលចាំបាច់ក្នុងការប្រើប្រាស់ពេលមានឡជីវឧស្ម័នគឺ៖

• ទំហំឡ ៦ម៉ែត្រគូប គាត់មានគោចំនួន ៤ក្បាល
• ពេលធ្វើឡជីវឧស្ម័នហើយ គឺតម្រូវឲ្យកសិករត្រូវមានលាមកសត្វគោ ក្របី ឬជ្រូកចំនួន ១តោនសំរាប់ឡ​ដែលមានទំហំ ៦ម៉ែត្រគូបដើម្បីចាក់បំពេញមុនដំបូង
• ក្រោយចាក់បំពេញឡស្តុកសំរាប់បង្កើតហ្គាសហើយ គាត់អាចបន្ថយលាមកសត្វមកត្រឹមមួយធុង ប្រមាណ៤០គីឡូក្រាម​ក្នុងមួយថ្ងៃតែប៉ុណ្ណោះ
• ក្នុងមួយឆ្នាំគាត់អាចសន្សំជីបានចាប់ពី ៣តោនឡើង ដែលកាលពីមិនទាន់មានឡជីវឧស្ម័ន គាត់អាច​ប្រមូល​ជីបានត្រឹមតែ ១តោន ឬតិចជាងនេះ។

អត្ថប្រយោជន៍ជីដែលបានពីឡជីវឧស្ម័ន

អ្នកមីងមានប្រសាសន៍ថា ក្រោយពីបានរៀបចំធ្វើឡជីវឧស្ម័នរួចមក ធ្វើឲ្យក្រុមគ្រួសាររបស់គាត់​ទទួល​បាននូវអត្ថប្រយោជន៍ជាច្រើនដូចជា៖

១. ជីដែលបានពីឡជីវឧស្ម័ន

• ធ្វើឲ្យស្លឹកដំណាំមានពណ៌បៃតងខ្ចី
• ធ្វើឲ្យស្រូវមានចំនួនដើមបែកគុម្ព
• ធ្វើឲ្យដំណាំបន្លែមានរសជាតិឆ្ងាញ់
• មិនប៉ះពាល់ដល់សុខភាពនៅពេលបរិភោគ
• ធ្វើឲ្យដីផុស ដែលធ្វើឲ្យដំណាំលូតលាស់បានលឿន
• មិនសូវមានសត្វល្អិត និងជំងឺមកបំផ្លាញដំណាំ។

២. ផ្តល់ភ្លើងសំរាប់ប្រើប្រាស់ចំអិនអាហាររាល់ថ្ងៃ

• ចំអិនអាហាររហ័សចំណេញពេលវេលា ចំណេញថវិកាមិនទិញអុសដុត
• ផ្ទះបាយស្អាតនាំឲ្យសុខភាពស្រីមេផ្ទះល្អ ដោយគ្មានផ្សែងអាក្រក់ចូលសួត។

ចំណាប់អារម្មណ៍

ជាចុងក្រោយអ្នកមីងមានចំណាប់អារម្មណ៍ថា ការរៀបចំឡជីវឧស្ម័នបានជួយដល់អ្នកមីងបានច្រើនទាំង​​សុខភាព បរិស្ថាន​ជុំវិញផ្ទះ ពេលវេលា ការដាំដុះដំណាំជាដើម។ ដូចនេះបើបងប្អូនកសិករមានចំណាប់​អារម្មណ៍​គួរសាកល្បងអនុវត្តនូវការងារនេះ ដើម្បីជួយសំរួលដល់ការងាររស់នៅជាប្រចាំថ្ងៃឲ្យកាន់តែប្រសើរឡើង៕

ប្រភព ទស្សនាវដ្តីកសិករ

សហគមន៍សម្បូរសប្បាយ