ដំណាំអូក្រា និងអត្ថប្រយោជន៍

១. សេចក្តីផ្តើម

អូក្រាត្រូវបានគេដាំតាំងពីយូរយារណាស់មកហើយ ផ្លែរបស់វាមានលក្ខណៈប៉ោងស្រោបគ្រាប់ដែលត្រូវបានគេ​ប្រើសំរាប់ធ្វើម្ហូបដូចជា សម្ល ឆា អន្លក់ និងស៊ុប។​ ផ្ការបស់អូក្រាមានលក្ខណៈស្រដៀងប្រហាក់ប្រហែលទៅនឹងផ្ការំយោល។ អូក្រាអាចមានកំពស់ ១២០​សម ឬអាចទាបជាងនេះ។ ​ប្រសិនបើដាំដុះនៅកន្លែងទូលាយមែករបស់វាអាចមានទំហំធំជាង ៩៥សម។

២. ការពិពណ៌នា

អូក្រាជាដំណាំស្ថិតនៅក្នុងតំបន់ត្រូពិច ដែលអាចដាំដុះសំរាប់ធ្វើជាបន្លែប្រចាំឆ្នាំបាន។ លក្ខណៈគ្រាប់របស់វាពេលនៅខ្ចីអាចធ្វើឲ្យម្ហូបខាប់បានដោយសារនៅក្នុងគ្រាប់ផ្ទុកទៅដោយភាពស្អិតច្រើន។ អូក្រាជាដំណាំដែលធន់​និងភាពរាំងស្ងួតខ្លាំង​ឬកំដៅខ្លាំង។ ជាងនេះទៅទៀតវាជាប្រភេទដំណាំដែលមានការពេញនិយមបំផុតនៅក្នុងបណ្តាប្រទេសមួយចំនួន ដែលមានបញ្ហាពិបាកក្នុងការដាំដុះ។

• លក្ខណៈស្លឹក. ស្លឹករបស់អូក្រាមានរាងដូចជាម្រាមដៃដែលមានឆែកចាប់ពី៥ទៅ៧។
• លក្ខណៈផ្កា. ​ផ្ការបស់វាមានពណ៌លឿង​ ស ក្រហម ឬស៊ីជម្ពូ ហើយផ្កាមាន ៥ ត្របក។

ផ្ការបស់វាគឺមានលក្ខណៈពណ៌ខុសគ្នាទៅតាមប្រភេទពូជ។ អូក្រាដែលពេញនិយមដាំដុះជាងគេនៅ

ក្នុងប្រទេសកម្ពុជា​គឺអូក្រាដែលមានផ្កាពណ៌ស៊ីជម្ពូ។

៣. សត្វល្អិត និងបញ្ហា

អូក្រាជាដំណាំមិនសូវមានការជួបប្រទះបញ្ហាបំផ្លាញពីសត្វល្អិតទេ ហើយភាគច្រើនបញ្ហារបស់វាច្រើនកើតនៅលើស្លឹក កម្រមាននៅលើផ្លែណាស់​។ ជំងឺភាគច្រើនបណ្តាលមកពីសត្វល្អិតដែលនៅស៊ីបំផ្លាញលើស្លឹកនិងដើម។ដូចនេះត្រូវធ្វើការពិនិត្យមើលមុនពេលបញ្ហាកើតឡើង។

៤. ការដាំដុះ

អូក្រាអាចដុះលូតលាស់នៅកន្លែងដែលមានការហូរច្រោះ វាដុះមិនល្អនៅលើដីដែលមានលក្ខណៈសើមស្អិត អូក្រាអាចដុះលូតលាស់ក្នុងកំរិត​ប៉េហាស​ (PH) ៦,៥ ទៅ ៧,៥។

▪  ការបណ្តុះគ្រាប់អូក្រា. គ្រាប់អូក្រាធំ និងងាយស្រួលកាន់។ មុននឹងដាំ ត្រូវយកគ្រាប់វាទៅត្រាំនៅក្នុងទឹកមួយ​យប់។ ប៉ុន្តែប្រសិនបើដាំដោយមិនត្រាំទឹក​ ត្រូវធ្វើយ៉ាងណាឲ្យដីមានសំណើមរហូតដល់គ្រាប់ពើតអាចដុះពន្លក។  អូក្រាអាចដាំដោយព្រោះផ្ទាល់ ឬក៏បណ្តុះឲ្យដុះពន្លកមុនយកទៅដាំ។ ការដាំដោយកូនដែលយកពីថ្នាលបណ្តុះដែលបានរៀបចំត្រឹមត្រូវនោះវាបង្កលក្ខណៈល្អដល់ការលូតលាស់របស់កូនអូក្រា។ ក្រោយពីបណ្តុះបានរយៈពេល ​៦ទៅ៨ថ្ងៃ គេអាចគាស់កូនទៅដាំនៅលើរងបាន។

▪  ការថែទាំ. ប្រសិនបើដីមានជីជាតិល្អ ការយកអូក្រាទៅដាំគឺមិនបាច់ប្រើជីបន្ថែមទៀតទេ។ ប៉ុន្តែបើដាំយូរទៅគេគួរបន្ថែមជីជាតិដល់ដីដោយប្រើជីដូចជា លាមកសត្វ ស្លឹកឈើលាយជាមួយសារាយសមុទ្រ ឬជីចេញពីត្រី។ ជីទាំងនេះ និងជួយបន្ថែមជីជាតិដល់ដីយ៉ាងប្រសើរ។

▪ ការគ្រប់គ្រងទឹក. នៅពេលអូក្រាដុះលូតលាស់ គេអាចស្រោចទឹកបន្ថែមគឺ ៧ទៅ១០​ថ្ងៃស្រោចម្តង។ អូក្រាមួយចំនួនគឺវារោយលំអងផ្កា ហើយពេលគ្រាប់របស់វាទុំចាស់ហើយស្ងួត គេអាចប្រមូលផលទុកជាគ្រាប់ពូជសំរាប់ដាំបន្តនៅរដូវក្រោយទៀត។

▪  ការប្រមូលផល. អូក្រាចាប់ពីពេលដាំរហូតដល់ប្រមូលផលមានរយៈពេល ៥០ ទៅ ៦០ថ្ងៃ។ នៅក្នុងកំរិតអាកាសធាតុក្តៅហើយសើម គេអាចប្រមូលផលបានពីរលើក។ អូក្រាគេតែងប្រមូលផលពេលនៅខ្ចី ហើយអាចប្រមូលផលបាន ២ទៅ៣ផ្លែក្នុងមួយដើម។

៥.​​​ សារធាតុផ្សំនៅក្នុងផ្លែអូក្រា

អូក្រា មានផ្ទុកទៅដោយសារធាតុវីតាមីនអា និងសេ ហើយសំបកវាសំបូរទៅដោយសារធាតុដែក និងសារធាតុកាល់ស្យូម​។ វាផ្ទុកទៅដោយសារធាតុខ្លាញ់ និងមានសារធាតុផ្សេងៗជាច្រើនទៀត។

សំរាប់អូក្រា ១ផ្លែដែលចម្អិនរួច	សំរាប់អូក្រា ​១ផ្លែដែលនៅឆៅ
កាល់ឡូរី ​២៥ ក្រាម ជាតិសរសៃ ២ ក្រាម កាបូនអ៊ីដ្រាត​ ៥,៧៦ ក្រាម វីតាមីនអា ៤៦០ អ៊ីយូ (IU) វីតាមីនសេ  ១៣,០៤ មីលីក្រាម ជាតិហ្វូលិកអាស៊ីត ៣៦,៥ មីក្រូក្រាម កាល់ស្យូម  ៥០,៤​មីលីក្រាម ជាតិដែក ០,៤​ មីលីក្រាម ប៉ូតាស្យូម ២៥៦,៦ មីក្រូក្រាម ម៉ាញ៉េស្យូម ២៥៦,៦​ មីក្រូក្រាម។	កាល់ឡូរី  ៣៣​​ ក្រាម ជាតិសរសៃ ២ ក្រាម ជាតិខ្លាញ់ ០,១ ក្រាម ប្រូតេអ៊ីន ២,០ ក្រាម កាបូនអ៊ីដ្រាត​ ​ ៧,៦ ក្រាម វីតាមីនអា ៦៦០ អ៊ីយូ (IU) វីតាមីនសេ  ២១ ក្រាម។

៦. អត្ថប្រយោជន៍សំខាន់ៗដែលមាននៅក្នុងអូក្រា

ដំណាំអូក្រា គឺជាដំណាំដែលមានសារៈប្រយោជន៍ច្រើនសំរាប់សុខភាពដែលមានដូចជា

• ជាតិសរសៃដ៏ល្អ ដែលអាចជួយទប់ទល់ជាតិស្ករនៅ​ក្នុងឈាមបាន​មិនឲ្យឡើង​ខ្លាំង
• ភាពស្អិតរបស់អូក្រាអាចភ្ជាប់នូវសារធាតុខ្លាញ់ និងអាស៊ីតក្នុងថង់ទឹកប្រមាត់ ដែលនាំយកសារធាតុពុលចេញ មកដោយថ្លើមជាអ្នកច្រោះ
• អូក្រាអាចជួយឲ្យពោះវៀនធំងាយស្រួលបញ្ចេញចោល។ ជាតិសរសៃរបស់វាអាចធ្វើការបឺតស្រូបជាតិទឹក និង​ធ្វើការបញ្ចេញដុំលាមកបានល្អ។ សារៈប្រយោជន៍ទាំងនេះអាចជួយការពារនូវរោគទល់លាមកបានល្អ។
• សារធាតុសរសៃដែលបានពីដំណាំអូក្រា វាជាអាហារសំខាន់សំរាប់បាក់តេរីមានប្រយោជន៍ ដែលអាចជួយ​សំរួល​ដល់សុខភាពពោះវៀនផងដែរ
• ដំណាំអូក្រាប្រើប្រាស់ជាថ្នាំសំរាប់ព្យាបាលដំបៅរលាកឲ្យជាសះស្បើយ ហើយក៏អាចការពារការឈឺ​សន្លាក់​បាន​ផងដែរ។ ក្រៅពីនេះវាជួយបន្សាបជាតិអាស៊ីតឲ្យទៅធម្មតា និងជួយការពារស្រទាប់ការរំលាយ​អាហារ​បាន​ផងដែរ
• អូក្រាជួយសំរួលដំណើរការរបស់សួត និងបំបាត់ការឈឺចាប់បំពង់ក
• អូក្រាជួយបញ្ចុះជាតិស្ករនៅក្នុងឈាម និងអាចទប់ជាតិខ្លាញ់នៅក្នុងប្រមាត់
• អូក្រាគេជឿជាក់ថា អាចការពារបានពីការរីករាលដាលនៃជំងឺមហារីក ពិសេសការកកើតនៃរោគមហារីក
• អូក្រាអាចការពារជំងឺទឹកនោមផ្អែម៕

ប្រភព. http://gardening.about.com/od/vegetables/p/Okra.htm

http://www.pyroenergen.com/articles07/okra-health-benefits.htm

សហគមន៍សម្បូរសប្បាយ