បទពិសោធន៍ផលិតជីកំប៉ុស្ត (លោកពូ សូ មាំង)

លោកពូ សូ​ មាំង រស់នៅភូមិព្រៃមូល ឃុំព្រៃមូល ស្រុក​រលាប្អៀរ ខេត្តកំពង់ឆ្នាំង។ គាត់មានបទ​ពិសោធន៍ផលិត​ជីកំប៉ុស្ត​សម្រាប់ប្រើប្រាស់លើដំណាំ ដើម្បីឲ្យទទួលបានទិន្នផលល្អ និងដីមានជីជាតិ។ ការផលិតជីនេះគឺ រក្សាទុកតែមួយខែប៉ុណ្ណោះអាចប្រើ​ប្រាស់បាន។ ចំពោះបទពិសោធន៍នៃការផលិតមានបង្ហាញជូនដូចខាងក្រោម៖

១-អាតុផ្សំ

• ទន្ទ្រានខែត្រ ២ ធុងស្ពេត្រូ
• ធ្យូងអង្កាម ២ ធុងស្ពេត្រូ
• លាមកគោ ២ ធុងស្ពេត្រូ
• កាកសំណល់ផ្ទះបាយ (ដាក់ទៅតាមបរិមាណដែលមាន)
• ស្លឹកឈើជ្រុះ ១ ធុងស្ពេត្រូ។

២-របៀបធ្វើ

លោកពូ យកទន្ទ្រានខែត្រមកចិញ្ច្រាំ រួចហើយគាត់យកសារធាតុទាំងអស់ច្របល់ចូលគ្នា បន្ទាប់មក​គាត់ស្រោចទឹកពីលើឲ្យមានសំណើម ៦០ភាគ​រយ ហើយយកតង់កៅស៊ូ ឬថង់ប្លាស្ទិកមកគ្របឲ្យជិត។ ជារៀង​រាល់ថ្ងៃ​គត់​បើកចំហ១០ទៅ១៥នាទី ដើម្បីឲ្យមានខ្យល់ចេញចូលបានល្អធ្វើឲ្យជីឆាប់កាច់រួចគ្របទៅវិញ។ គាត់គ្របទុកបានរយៈពេល១០ថ្ងៃ ទើបកាយច្របល់​វាម្តង រួចគ្របទុកជាធម្មតារហូតដល់៣០ថ្ងៃ ទើបជីកាច់​បានល្អអាចប្រើប្រាស់បាន។

៣-ការប្រើប្រាស់

ក្រោយពីរក្សាទុកបាន៣០ថ្ងៃ ជីកាច់ហើយ គាត់អាចយកទៅប្រើប្រាស់លើដំណាំជាច្រើនប្រភេទបាន ដោយប្រើជាជីទ្រាប់បាត ជីបំប៉នដំណាំបន្លែមាន ននោង ត្រកួន ខ្ទឹមស្លឹក ។ល។ ចំពោះការប្រើប្រាស់លើស្រូវ គាត់យក​ជីទៅបាចហើយភ្ជួរលុបរួចចាប់ផ្តើមស្ទួងតែម្តង។

៤-ចំណាប់អារម្មណ៍

ចាប់ពីគាត់បានប្រើប្រាស់ជីកំប៉ុស្តលើដំណាំមក គាត់មានអារម្មណ៍សប្បាយរីករាយនៅពេល​ឃើញ​ដំណាំរបស់គាត់លូតលាស់បានល្អ ហើយចំណេញប្រាក់បានច្រើន ពីព្រោះគាត់មិនបានចំណាយទៅលើការ​ទិញជីគីមី។ គាត់ចង់ឲ្យអ្នកដែលនៅក្នុងភូមិ និងអ្នកដទៃទៀតផលិត និងប្រើជីកំប៉ុស្ត ដើម្បីកាត់បន្ថយ​ការ​ប្រើ​ជីគីមី ហើយដំាណាំដែលយើងយកទៅបរិភោគមិនប៉ះពាល់ដល់សុខភាពផង៕

ប្រភព ទស្សនាវដ្តីកសិករ

សហគមន៍សម្បូរសប្បាយ