Home / កសិកម្ម / បទពិសោធន៍រៀបចំកសិដ្ឋានពហុប្រយោជន៍ (កសិករ មាស អូន)

បទពិសោធន៍រៀបចំកសិដ្ឋានពហុប្រយោជន៍ (កសិករ មាស អូន)

          អ្នកមីង មាស អូន  ជាកសិកររស់នៅភូមិ​គោក​ត្របែក ឃុំគោកដូង ស្រុកអង្គរជុំ ខេត្តសៀមរាប។ គាត់បាន​សម្រេចចិត្តរៀប​ចំកសិដ្ឋានពហុប្រយោជន៍​​ដើម្បីទទួលបានប្រាក់ចំណូលបន្ថែមជួយដល់គ្រួសារ និងកូន​ដែលកំពុងរៀន​ផង។ អ្នក​មីងអាចរកប្រាក់​ចំណូល​បានពី ៣,៥ ទៅ ៥លានរៀលក្នុងមួយឆ្នាំ ដែលបទ​ពិសោធន៍​នេះ គាត់បានចេះមកពីអង្គការ​សេដាក សហការជាមួយគម្រោង (Plant) លើកកំពស់កំរិតជីវភាព​គ្រួសារ​កសិករក្រីក្រដែល​ធន់នឹងការប្រែ​ប្រួលអាកាសធាតុនៅតំបន់ដីស្ងួត។ ផ្ទៃដីដែលគាត់បានរៀបចំមាន​ទំហំ ១ហិកតា និងដាំដំណាំចំរុះមុខ។ ចំពោះបទពិសោធន៍នៃការរៀបចំកសិដ្ឋានមានបង្ហាញ​ជូនដូចខាង​ក្រោម​។

១. ការបែងចែកប្លង់ដីសំរាប់ដាំ

នៅលើផ្ទៃដីទំហំ ១ហិកតា គាត់បានបែងចែកជាដី​សំរាប់​ដាំបន្លែចំនួន ៨០អារ ដំណាំបន្លែដែលគាត់​ដាំ​មានដូចជា ននោង ឃ្លោក ម្រះ ត្រប់ស្រួយ ត្រប់វែង ល្ពៅ និងត្រឡាច ។ ដី១០អារ​ទៀត គាត់បានដាំឈើ​ហូបផ្លែមានដូចជា ល្ហុង ក្រូចឆ្មារ និង​ស្វាយ​។ គាត់បានជីកស្រះទំហំ ១០X៨ម៉ែត្រ និងជំរៅ ៣ម៉ែត្រ។

២. ការចំណាយនិងចំណូលដែលទទួលបានក្នុងកសិដ្ឋាន

ក្នុងដំណើរការរៀបចំកសិដ្ឋាន គាត់បានចំណាយ​ថវិកា​អស់ ១.២៣០.០០០រៀល តែទៅលើការជីក​ស្រះ​តែប៉ុណ្ណោះ ក្នុង​នោះបដិភាគពីគម្រោងប្រមាណជា ៣០ម៉ឺនរៀល។ ក្នុងការរៀបចំ​កសិដ្ឋានពហុ​ប្រយោជន៍​នោះ គាត់បានចំណាយលើកម្លាំង​ពលកម្ម ថវិកាផ្ទាល់ខ្លួន និងពេលវេលាច្រើន ដើម្បីឲ្យ​ទទួល​បាន​កសិដ្ឋាន​មួយដែលមានលក្ខណៈល្អ អាចទទួលបានប្រាក់ចំណូលសំរាប់ផ្គត់ផ្គង់គ្រួសារ។ ជាក់ស្តែងសព្វ​ថ្ងៃក្នុងមួយខែ គាត់អាចទាញចំណូលពីកសិដ្ឋានរបស់គាត់បានប្រមាណ ៣០ ទៅ ៦០ម៉ឺន​រៀល។ ផលិត​ផល ​ដែលគាត់លក់ដើម្បីទទួលបានប្រាក់ចំណូលនោះមានដូចជា ននោង ឃ្លោក ម្រះ ត្រប់ស្រួយ ត្រប់វែង ល្ពៅ និងត្រឡាច ដែលដំណាំទាំងអស់នេះគាត់បានដាំបណ្តាក់គ្នា។

៣. ការប្រែប្រួលពីមុនមិនទាន់រៀបចំកសិដ្ឋាន និងក្រោយការរៀបចំ

ក្រោយពីការរៀបចំកសិដ្ឋានរួចហើយ អ្នកមីងសង្កេតឃើញថា មានការប្រែប្រួលច្រើន​ទាក់ទង​ទៅនឹង​ទិន្នផលដំណាំដូចជាដំណាំចំរុះ គាត់អាចទទួលផលបានពីការដាំបន្លែមួយចំនួន ននោង ឃ្លោក ម្រះ ត្រប់​ស្រួយ ត្រប់វែង ល្ពៅ និងត្រឡាច។ ក្នុងឆ្នាំ២០១៥ ចាប់ពីខែមករា ដល់ខែកក្កដា គាត់អាចរកបានប្រមាណ ៣,៥​លានរៀល ពីការលក់ផលដំណាំនៅក្នុងផ្ទះដោយមិនគិតពីការបរិភោគនៅក្នុងគ្រួសារ។

៤. ចំណាប់អារម្មណ៍របស់កសិករ

អ្នកមីងមានចំណាប់អារម្មណ៍ថា គាត់សំរេចចិត្តរៀបចំកសិដ្ឋាននេះគឺត្រឹមត្រូវ ដោយសារគាត់អាច​ទទួលបានផលបន្លែសំរាប់បរិភោគជាប្រចាំ និងលក់ជាប្រចាំបណ្តាក់គ្នា។ ម៉្យាងទៀតការដាំដុះនេះ​មិន​បាន​ចំណាយទៅលើការទិញជីគីមីទេ គាត់ប្រើតែ ជីកំប៉ុស្ត និងស្លឹកឈើស្រស់ប្រមូលជុំវិញកសិដ្ឋាន។ ការដាំដុះ​ដំណាំរបស់គាត់គឺមានលក្ខណៈធន់ទ្រាំទៅនឹងការប្រែប្រួលអាកាសធាតុបានច្រើន ទោះបីជាគ្មានភ្លៀងដើមរដូវ ក៏គាត់អាចដាំដំណាំបានខ្លះសំរាប់ការហូបប្រចាំថ្ងៃ និងការលក់ដូរបន្តិច​បន្តួច​នៅក្នុងគ្រួសារ។

សរុបចំណុចសំខាន់ៗក្នុងការរៀបចំកសិដ្ឋានពហុប្រយោជន៍៖

  • ជ្រើសរើសទីតាំងដែលសមស្រប មិនលិចទឹកនៅរដូវវស្សា
  • បែងចែកប្លង់កសិដ្ឋានតាមស្ថានភាពដី
  • ជ្រើសរើសទីកន្លែងសំរាប់ដាំដំណាំទៅតាមរដូវកាល (ដាំវិល)
  • ដាំដំណាំទៅតាមទិសរបស់ថ្ងៃ ដើម្បីឲ្យទទួលបានពន្លឺគ្រប់គ្រាន់
  • ប្រើជីកំប៉ុស្ត និងស្លឹកឈើស្រស់ធ្វើជាជី៕

ប្រភព ទស្សនាវដ្តីកសិករ

សហគមន៍សម្បូរសប្បាយ

Loading...

អំពី sambosabay

សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

បទពិសោធន៍ចិញ្ចឹមត្រីអណ្តែងក្នុងរណ្តៅប្លាស្ទិក (កសិករ មាស អូន)

អ្នកមីង មាស អូន ជាកសិកររស់នៅភូមិដូងវាល ឃុំក្តឿងរាយ ស្រុកកញ្ច្រៀច ខេត្តព្រៃវែង។ គាត់មានបទពិសោធន៍ល្អក្នុងការចិញ្ចឹមត្រីក្នុងរណ្តៅប្លាស្ទិក ដែលគាត់បានទទួលការបណ្តុះបណ្តាលពីអង្គការសេដាក។ ក្រោយពីចិញ្ចឹមបានរយៈពេល៣ខែ ត្រីរបស់គាត់មានទំងន់៣ខាំក្នុងមួយក្បាល ដែលអាចចាប់លក់ និងធ្វើម្ហូបបានជាបណ្តើរៗ។ ចំពោះបទពិសោធន៍មានបង្ហាញជូនដូចខាងក្រោម៖