Home / កសិកម្ម / បទពិសោធន៍ដាំត្រសក់ផ្អរបានផ្លែច្រើន (កសិករ ព្រំ សារុន)

បទពិសោធន៍ដាំត្រសក់ផ្អរបានផ្លែច្រើន (កសិករ ព្រំ សារុន)

អ្នកមីង  ព្រំ សារុន ជាប្រធានសមាគមរស់នៅភូមិត្រពាំងផ្គាំ ឃុំបន្ទាយព្រាល ស្រុករលាប្អៀរ ខេត្ត​កំពង់ឆ្នាំង។ គាត់មានបទពិសោធន៍ដាំត្រសក់បានផ្លែច្រើន ដោយលើផ្ទែដីតែ ៣៦មែត្រការ៉េ ទទួលបានផ្លែ​១៤៥គីឡូក្រាម ក្នុងរយៈពេល៤៥ថ្ងែ។ បទពិសោធន៍នេះ គាត់ចេះតាមរយៈការផ្សព្វផ្សាយរបស់អង្គការសេ​ដាក ព្រមទាំងការអានទស្សនាវដ្ដីកសិករ ដែលអង្គការសេដាបានចែកឲ្យគាត់។​ ចំពោះបច្ចេកទេសនៃការដាំ​ដំណាំត្រសក់ផ្អរ សូមបង្ហាញជូនដូចខាងក្រោម។

១-ការត្រៀមគ្រាប់ដាំ

ត្រសក់ ដែលគាត់បានដាំជាពូជត្រសក់ផ្អរ គឺគាត់បានរក្សាទុកដោយខ្លួនឯងពីរដូវមុនៗ។ មុនដាំគាត់បានយកគ្រាប់ត្រសក់ មកលាងសំអាតដោយជ្រើស រើសគ្រាប់អណ្តែតចេញ ហើយដាក់ត្រាំជាមួយទឹកក្តៅឧណ្ហ​ៗរយៈពេលមួយថ្ងៃ។ បន្ទាប់មកស្រង់ យកគ្រាប់នោះទៅផ្អាប់ទុកក្នុងត្រឡោកដូង ឬខ្ចប់នឹងក្រណាត់ក៏បាន ហើយដាក់នៅកន្លែងត្រជាក់ ឬក្នុងម្លប់មួយថ្ងៃ ដោយប្រោះទឹកឲ្យសើមៗ។

២-ការដាំ

ក្នុងការដាំគាត់បានកាប់ដីហាលរយៈពេល ២ទៅ៣ថ្ងៃ។ គាត់ចាប់ផ្តើមកាប់លើកជារងដោយមាន​ទទឹង ១ម៉ែត្រ និងបណ្តោយ រងទៅតាមស្ថានភាពដី។ នៅលើរងគាត់បានជ្រំជ្រោយដីឲ្យ​ស្អាតដោយដាក់ជី​កំប៉ុស្ត ឬជីលាមកសត្វ។ បន្ទាប់មកយកគ្រាប់ទៅកប់ដាំដោយទុកចន្លោះពីរណ្តៅមួយទៅមួយស្មើ១តឹក និង​ក្នុងមួយរណ្តៅដាំ២គ្រាប់ រួចរោយផេះពីលើការពារស្រមោចស៊ីគ្រាប់ពូជ។ ក្រោយពីកប់គ្រាប់ហើយ គាត់កាប់​កំទេចចំបើងគ្របពីលើហើយស្រោចទឹកឲ្យជោគ។

៣-ការថែទាំ

បន្ទាប់ពីការដាំបានរយៈពេល១៥ថ្ងៃ គាត់បានយកជីកំប៉ុស្ត ឬលាមកសត្វទៅដាក់បំប៉នម្តងទៀត។ គាត់​ឧស្សាហ៍ជ្រោយដី និងពូនគល់ រួចយកកូនឫស្សី ឬកូនឈើដោតធ្វើជាទ្រើងឲ្យត្រសក់វារឡើង។ ក្រៅពី​លា​មកសត្វគាត់បានស្រោចទឹកនោម ៣ថ្ងៃម្តង (ទឹកនោមមនុស្ស គោ លាយជាមួយទឹក)។ ការស្រោចទឹកជី​នេះ​ធ្វើនៅពេលល្ងាចមេឃត្រជាក់។

៤-ការប្រមូលផល

រយៈពេល៤៥ថ្ងៃបន្ទាប់ពីការដាំ ត្រសក់មានផ្លែអាចប្រមូលផលបាន។ ការប្រមូលផលធ្វើឡើង​រយៈ​ពេល២ថ្ងៃម្តង សរុបតាំងពីចាប់ផ្តើមបេះរហូតដល់អស់ផ្លែបានចំនួន ១៤៥គីឡូក្រាមលើដី ៣៦ម៉ែត្រក្រឡា។ គាត់លក់បាន ១.០០០រៀល ក្នុង១គីឡូក្រាម គិតជាទឹកប្រាក់សរុបបាន ១៤៥.០០០រៀល ដោយមិនគិតពី​ការ​បរិភោគនៅក្នុងគ្រួសារ។

សរុបបច្ចេកទេសសំខាន់ៗក្នុងការដាំត្រសក់ផ្អរ

  • ត្រាំគ្រាប់ពូជជាមួយទឹកក្តៅឧណ្ហៗ រួចស្រង់ខ្ចប់នឹងក្រណាត់ផ្អាប់ទុកមុនយកទៅដាំក្នុងរណ្តៅ
  • កាប់ដីហាលរយៈពេល៣ថ្ងៃ រួចលើកជារង
  • ដាក់ជីកំប៉ុស្ត និងលាមកសត្វនៅលើរងមុនដាំ
  • ដាក់គ្រាប់ដាំ ២គ្រាប់ក្នុងមួយរណ្តៅដោយទុកចន្លោះពីរណ្តៅមួយទៅមួយ ១តឹក
  • រោយផេះនៅរណ្តៅក្រោយពីដាំការពារស្រមោចស៊ីគ្រាប់ពូជ
  • ថែទាំធ្វើស្មៅ ពូនគល់ ដាក់ជីបំប៉ន ព្រមទាំងដោតទ្រើងឲ្យត្រសក់វារឡើងទ្រើង៕

ប្រភព ទស្សនាវដ្តីកសិករ

សហគមន៍សម្បូរសប្បាយ

អំពី sambosabay

Avatar
សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

ប្រព័ន្ធវប្បកម្មកសិកម្មតាមគោលការណ៍ធម្មជាតិ

គោលបំណងសំខាន់របស់អ្នកប្រកបមុខរបរកសិកម្ម គឺបង្កើននូវផលិតផលសំរាប់បំពេញតម្រូវការគ្រួសារ និងសំរាប់លក់យកប្រាក់ចំណូល។ ដើម្បីបង្កើននូវផលិតផលកសិកម្ម ជាទូទៅគេមានយុទ្ធសាស្រ្តសំខាន់ចំនួន២៖