បទពិសោធន៍ដាំត្រប់ស្រួយ (កសិករ មាស អូន)

អ្នកមីង មាស អូន ជាកសិកររស់នៅភូមិគោកត្របែង ឃុំគោកដូង ស្រុកអង្គរជុំ ខេត្តសៀមរាប។ កាត់បាន​សហការជាមួយអង្គការសេដាក តាមរយៈ​គម្រោងលើកកំពស់កំរិតជីវភាពគ្រួសារកសិករក្រីក្រ​ដែលធននឹង​បម្រែ​បម្រួលអាកាសធាតុនៅតំបន់ដីស្ងួតដែលងាយរងគ្រោះបំផុតនៅខេត្តសៀមរាប និងំពង់ចាម តាំងពីខែកក្កដា ឆ្នាំ​២០១២។ បន្ទាប់ពីបានចូលរួមសហការជាមួយគម្រោង គាត់បានអនុវត្តនូវបច្ចេកទេសដាំបន្លែជាច្រើនមុខ​ដូច​ជា ត្រប់ ស្ពៃ សណ្តែកកួរ ម្រេះ ។ល។ ដូចនេះ យើងសូមលើកយកនូវបទពិសោធន៍ដាំត្រប់ទទួលបានទិន្នផល​ខ្ពស់​មកបង្ហាញជូនដូចខាងក្រោម។

១-ការរៀបចំដីសំរាប់ដាំ និងការដាំ

អ្នកមីងបានជ្រើសរើសដីទួលមិនលិចទឹកនៅរដូវវស្សា ដីនោះមានទំហំ ១៥០ម៉ែត្រការ៉េ។ គាត់បានរៀប​ចំដីដោយកាប់ដីហាលចំនួន ៣លើក។ លើកទី១ ហាលរយៈពេល ៧ថ្ងៃ ដើម្បីឲ្យងាប់ស្មៅ។ លើកទី២ កាប់ដីត្រឡប់ឡើងវិញ បន្ត​ហាល​រយៈពេល៥ថ្ងៃទៀត និងលើកទី៣ គាត់បានកាប់លើកជារងដោយដាក់ជី​កំប៉ុស្តទ្រាប់​បាត។ បន្ទាប់ពីលើករងរួចគាត់បានជីករណ្តៅដែលមានទំហំ ១តឹក​បួនជ្រុង និងជំរៅមួយតឹក គម្លាតពីរណ្តៅមួយទៅមួយប្រមាណ ៦តឹក។ នៅតាមរណ្តៅនីមួយៗ គាត់បានដាក់ជីកំប៉ុស្ត ១កំប៉ុងអង្ករ រួចលុបដីតិចៗពីលើទើបយក​កូនត្រប់ទៅដាក់ដាំក្នុងរណ្តៅ។

២-ការថែទាំ

បន្ទាប់ពីដាំហើយ គាត់ស្រោចទឹកជារៀងរាល់ថ្ងៃ (ស្រោច ១ថ្ងៃ២ដង ព្រឹក ល្ងាច)។ នៅពេលត្រប់អាយុ​បាន១០ថ្ងៃ គាត់ចាប់ផ្តើមជ្រោយដី ពូនគល់ត្រប់ និងដកស្មៅឲ្យស្អាតជាប្រចាំ។ លុះដល់ត្រប់មានអាយុ១៥ថ្ងៃ គាត់ចាប់ផ្តើមកាត់បន្ថយការស្រោចទឹកឲ្យនៅមួយថ្ងៃម្តង គឺស្រោចតែពេលល្ងាច និងកាត់ស្លឹកត្រប់ចាស់ខាង​ក្រោម​ចោលពី ៣ ទៅ ៤ស្លឹកក្នុងមួយដើម ដើម្បីឲ្យដើមទទួលបានពន្លឺគ្រប់គ្រាន់ត្រប់ដុះលូតលាស់បានល្អ។

៣-ការប្រមូលផល

ក្រោយពីដាំបានរយៈពេល៤៥ថ្ងៃ គាត់ចាប់ផ្តើមប្រមូល​ផល​បណ្តើរៗ។ មុនដំបូងគាត់ទទួល​បានផល​តិច​តួចតែនៅពេលត្រប់អាយុបាន៦០ថ្ងៃ វាផ្តល់ផលបានច្រើន។ គាត់អាចប្រមូលផលបាន ពី ១៥ ទៅ ២០​គីឡូ​ក្រាម​ក្នុងមួយថ្ងៃ ដោយមិនគិតពីការបរិភោគនៅក្នុងគ្រួសារ។ នៅសល់ពីការបរិភោគ អ្នកមីងលក់បាន ១គីឡូ​ក្រាម​តម្លៃ ២.០០០រៀល ដូចនេះឃើញថា គាត់អាចរកប្រាក់ចំណូលបានពី ៣០.០០០រៀល ទៅ ៤០.០០០រៀល (នៅពេលប្រមូលផលម្តង​ៗ) ទឹកប្រាក់​ដែលគាត់ទទួលបានសរុប​ក្នុងកំឡុងពេលដាំត្រប់បាន​ប្រមាណ ៣០០.០០០រៀល ដោយមិនគិតពីការបរិភោគក្នុងគ្រួសារឡើយ។

៤-ការជ្រើសរើសពូជ និងទុកពូជ

ដើម្បីកាត់បន្ថយការចំណាយទិញពូជ គាត់បានធ្វើការជ្រើសរើស និងទុកដាក់ពូជដោយខ្លួនឯង។ គាត់​ជ្រើសរើសដើមត្រប់ណាដែលធំ បែកមែកសាខាមានសុខភាពល្អផ្លែមានរាងធំមូលរលោងមិនកំពិត ជាផ្លែលើក​ទី២ ទុកឲ្យផ្លែទុំនៅនឹងដើម។ នៅពេលផ្លែទុំល្មមហើយ គាត់បេះផ្លែយកទៅដាក់ហាលថ្ងៃទាំងទង​ទុកទាល់​តែ​វា​ស្ងួតល្អ ទើបប្រលះយកគ្រាប់ច្រកដបទុក ហើយ​រក្សាទុកនៅទីកន្លែងដែលត្រជាក់មានម្លប់។

៥-ចំណាប់អារម្មណ៍

ក្រោយពីបានអនុវត្តនូវការដាំដុះដំណាំត្រប់ដោយទទួលបានលទ្ធផលល្អរួចមក អ្នកមីងមានចំណាប់​អារម្មណ៍​​ថា ដំណាំត្រប់ងាយស្រួលដាំ មិនលំបាកក្នុងការថែទាំ ហើយទទួលបានផលច្រើន លក់បានតម្លៃ​សមរម្យ និងចំណាយទុនតិច ព្រោះគាត់​ប្រើជីធម្មជាតិ។ គាត់សប្បាយចិត្តណាស់ចំពោះការដាំត្រប់នេះ គាត់​នឹង​បន្តដាំជារៀងរហូត ព្រោះវាអាចធ្វើឲ្យគាត់បានទទួលប្រាក់ចំណូលបន្ថែមទៀតសម្រាប់ផ្គត់ផ្គង់ជីវភាពគ្រួសារ។

សរុបបច្ចេកទេសដាំត្រប់សំខាន់ៗមានដូចខាងក្រោម៖ កាប់ដីហាលចំនួន ៣លើក ដើម្បីឲ្យដីស្ងួតល្អ ដាក់ជីកំប៉ុស្តទ្រាប់បាតនៅលើរង និងនៅតាមរណ្តៅនីមួយៗមុនយកកូនទៅដាំ ស្រោចទឹក និងដកស្មៅជាប្រចាំ បេះស្លឹកត្រប់ចាស់ៗចេញខ្លះនៅពេលមានស្លឹកច្រើន ដើម្បីឲ្យពន្លឺចាំងចូលបានគ្រប់គ្រាន់ បន្ថយស្រោចទឹក និងធ្វើស្មៅ ចាប់ពីត្រប់មានផ្លែរហូតដល់អស់ផ្លែ៕

ប្រភព ទស្សនាវដ្តីកសិករ

សហគមន៍សម្បូរសប្បាយ