ការដាំដំឡូងឈាមមាន់ដោយប្រើកាកសំណល់ឡជីវឧស្ម័ន (កសិករ ហែម ពីយ៉ាន)

លោកអ៊ំ ហែម​ ពីយ៉ាន​ ជាកសិកររស់នៅភូមិខ្ជាយខាងត្បូង ឃុំដងទង់ ស្រុកដងទង់ ខេត្តកំពត។​ អ៊ំប្រុស​មាន​បទពិសោធន៍ក្នុងការប្រើប្រាស់កាកសំណល់​ឡជីវឧស្ម័នលើដំឡូងឈាមមាន់ ចាប់តាំងពីឆ្នាំ២០១១មក​ម្លេះ​។​ អ៊ំប្រុសទទួលបានការយល់ដឹងទាំងនេះតាមរយៈអង្គការសេដាក។ ចំពោះបទពិសោធន៍ក្នុងការប្រើប្រាស់កាក​សំណល់​ឡក្នុងការដាំដំឡូងឈាមមាន់ មានដូចខាងក្រោម៖

១. របៀបរក្សានូវកាកសំណល់ពេលចេញពីឡ

ឡជីវឧស្ម័នរបស់អ៊ំប្រុស​ មានទំហំ​​​៦ម៉ែត្រគូប ដែលផ្ទុកបានលាមកសត្វ​១ទៅ​២តោន។ គាត់បានដាក់​លាមកគោ ១៥គីឡូក្រាម ហើយនឹងទឹកចំនួន ១៥លីត្រដែលអាចប្រើបានរយៈពេល៥ម៉ោង។ ​​​នៅពេលដែលឡ​ដំណើរ​ការ​វា​បង្ហូរចេញ​កាក​សំណល់ប្រមាណជា ៣០គីឡូក្រាមក្នុងមួយថ្ងៃ។ នៅត្រង់កន្លែងបង្ហូរកាកសំណល់​ចេញ​​ពីឡ អ៊ំប្រុសបានជីករណ្តៅប្រមាណជា ៥ម x​​​ ៦ម​ និងជម្រៅ១ម ហើយមានប្រក់ដំបូលធ្វើពីស័ង្កសីនៅពីលើរណ្តៅ​​​​ដើម្បីធ្វើឲ្យជីនៅស្រស់ល្អ និងរក្សាបាននូវគុណភាពរបស់កាកសំណល់ផងដែរ។

២.​​​ របៀបប្រើប្រាស់កាកសំណល់ក្នុងការដាំដំឡូងឈាមមាន់

ផ្ទៃដីដាំដំឡូងរបស់អ៊ំប្រុសមានទំហំទទឹង ២ម​ និង បណ្តោយ ៥ម​។ គាត់បានដាក់កាកសំណល់ឡចំនួន ៣ដង ដែលមានទំងន់ប្រមាណជា ៥៥០គីឡូក្រាម។ លើកទីមួយនៅក្នុងការដាំ គាត់បានភ្ជួរដាស់ដីដើម្បីធ្វើឲ្យដីធូរ ហើយហាលដីរយៈពេលពី ១ ទៅ ២អាទិត្យ ដើម្បីឲ្យងាប់ស្មៅ។ គាត់បានចាប់ផ្តើមលើករង រួចជីករណ្តៅទើបយកកាកសំណល់ឡទៅដាក់ក្នុងរណ្តៅ។ កាកសំណល់ឡដែលគាត់យកទៅប្រើមិនបានលាយជាមួយជីអ្វីទាំងអស់ បន្ទាប់មកគាត់យកដើមដំឡូងទៅដាក់ដាំក្នុងរណ្តៅនោះ បន្ទាប់ពីដើមដំឡូងចាប់ផ្តើមដុះចេញស្លឹក គាត់ចាប់ផ្តើមជ្រោយដី រួចយកកាកសំណល់ឡទៅដាក់នៅក្នុងគុម្ពទាំងនោះម្តងទៀតទើបពូនគល់។ ពេលដើមដំឡូងចាប់ផ្តើមលូតលាស់បែកមែក គាត់ចាប់ផ្តើមដាក់កាកសំណល់ឡម្តងទៀតដើម្បីធ្វើឲ្យការលូតលាស់កាន់តែល្អ។

៣. ការប្រមូលផល

ក្រោយពីដាំបានរយៈពេល ៦​ខែ គាត់ចាប់ផ្តើមប្រមូលផល។ នៅលើផ្ទៃដី ១០០​ម៉ែត្រការ៉េ គាត់ទទួលបានទិន្នផលសរុបចំនួន​ ៨០០ ទៅ ៩០០ គីឡូក្រាម ដែលបានចំណូលសរុបប្រហែលជា ១.៦០០.០០០រៀល ក្នុងរយៈ​ពេល ៥ខែ។ ដោយឡែកនៅពេលដែលអ៊ំប្រុសដាំដំឡូងដោយប្រើប្រាស់ជីគីមីគាត់ទទួលទិន្នផលបានត្រឹមតែ​៤៥០ ​ទៅ ៥៥០ គីឡូក្រាមតែប៉ុណ្ណោះ។ ក្រោយពីបានប្រើកាកសំណល់ឡធ្វើជាជី លោកអ៊ំបានសង្កេតឃើញថា៖​

• ធ្វើឲ្យដំឡូងបែកគុម្ពច្រើន
• ធ្វើឲ្យមើមដំឡូងមានទំហំធំខុសពីធម្មតា
• មិនសូវមានសត្វល្អិតបំផ្លាញ
• ធ្វើឲ្យដីធូរ ហើយមានសំណើម។

៤. អត្ថប្រយោជន៍ចំពោះសុខភាព

សរុបមកបច្ចេកទេសសំខាន់ៗក្នុងការដាំដំឡូងឈាមមាន់ដោយប្រើកាកជីឡជីវឧស្ម័នមានដូចខាងក្រោម៖​ កាប់ដីហាល ១ ទៅ ២សប្តាហ៌ដើម្បីឲ្យងាប់ស្មៅ លើករងនិងជីករណ្តៅនៅលើរង យកកាកសំណល់ជី ទៅដាក់នៅក្នុងរណ្តៅ ថែទាំដាក់ជីឡបំប៉ននៅពេលដំឡូងដុះស្លឹកថ្មី និងបែកមែក។

កំណត់សំគាល់. យកល្អគួរសាកល្បងលាយកាកសំណល់ឡជាមួយធ្យូងអង្កាម ដែលអាចបានផលខ្ពស់ជាងនេះ៕

ប្រភព ទស្សនាវដ្តីកសិករ

សហគមន៍សម្បូរសប្បាយ​