កញ្ឆែត និងត្រកួនដឹកចេញពីបឹងជើងឯកទៅកាន់ទីផ្សារ គឺមិនបានលាងសំអាតទេ

នៅតាមសងខាងផ្លូវ៦០ម៉ែត្រ គឺមានបឹងតូចនិងធំជាច្រើន ហើយបឹងដែលធំនិងមនុស្សស្គាល់​ជាងគេគឺបឹងទំពុន និងបឹង​ជើង​​ឯក។ បឹងនៅទិសខាងត្បូងរាជធានីភ្នំពេញនេះ គឺជាអាងស្តុកទឹក​កង្វក់ដែលបូមចេញពីប្រឡាយ​ទឹក​ស្អុយបឹងត្របែក និងប្រឡាយទឹកស្អុយផ្សេងទៀត។ ដោយសារទឹក​កង្វក់នោះអំណោយផលដល់ការ​ដុះ​លូតលាស់ដំណាំបណ្តែតទឹកដូចជា កញ្ឆែត ត្រកួន និងកំប្លោកនោះ ទើបប្រជាពលរដ្ឋមួយចំនួន​បាននាំគ្នា​ដាំ​កញ្ឆែត និងត្រកួននៅក្នុងបឹងទាំងអស់នេះ។

អាជីវករដែលបានទៅទិញកញ្ឆែតដល់បឹងជើងឯកសុំមិនបញ្ចេញឈ្មោះបានឲ្យដឹងថា ពួកគេមិនបាន​លាង​សំអាតកញ្ឆែត និងត្រកួននេះទេ គឺដឹកចូលទៅកាន់ទីផ្សារតែម្តង ពិសេសផ្សារនាគមាស។

បណ្ឌិត យ៉ង សាំងកុមារ ជំនាញកសិកម្ម និងជាអតីតប្រធានអង្គការសេដាក កន្លងមកធ្លាប់មានប្រសាសន៍ទៅកាន់ប្រព័ន្ធសារព័ត៌មាន​ ដោយលោកពន្យល់យ៉ាងដូច្នេះ «ចំពោះអ្នកដាំបន្លែលើទឹកស្អុយបឹងទំពុន ដែលមានកញ្ឆែត និងត្រកួន មានហានីភ័យខ្ពស់ណាស់ ព្រោះ ទឹកស្អុយដែលចេញពីប្រព័ន្ធលូទីក្រុង ដែលក្នុងនោះហានិភ័យខ្ពស់បំផុតដែលខ្ញុំបារម្ភគេហៅថា លោហៈធ្ងន់ ដែលមាននៅក្នុងបន្លែ ហើយយើងហូបយូរៗទៅ វានឹងប៉ះពាល់ដល់សុខភាព។ ខ្ញុំឧទាហរណ៍ យើងបោះកាកសំណល់រឹងជាច្រើន ដូចជា ថ្មពិលជាដើម ដែលយើងបោះចោលក្នុងលូហើយវាហូរចូលក្នុងបឹងហ្នឹង ពេលហ្នឹងរុក្ខជាតិវាស្រូប វាអាចដោយលោហៈធ្ងន់មួយចំនួន ឬបឺតជាតិពុលទាំងនេះ។ ដូច្នេះ ខ្ញុំយល់ឃើញថា យើងគួរកុំដាំ និងកុំបរិភោគបន្លែរបៀបហ្នឹង»។

ក្រៅពីការដាំកញ្ឆែត និងត្រកួននៅក្នុងទឹកស្អុយ គឺបន្លែទាំងនោះក៏អ្នកដាំប្រើថ្នាំគីមីទៀតផង ដែល​អ្នកដាំ​បានអះអាងថា បើមិនប្រើថ្នាំគីមីទេ ក៏មិនអាចបានផលច្រើនដែរ។

ដូច្នេះសូមប្រជាពលរដ្ឋដែលទៅទិញបន្លែទាំងនោះមកបរិភោគ សូមលាងសំអាតសម្លាប់មេរោគ និងជាតិគីមីជាមុនសិន យក​ល្អកុំទិញបរិភោគ៕

រក្សា ខ្មែរ

សហគមន៍សម្បូរសប្បាយ