បទពិសោធន៍បេះធាងកំប្លោកច្រៀកលក់ (កសិករ ប្រាក់ លីណូ)

កំប្លោកជារុក្ខជាតិដុះនៅក្នុងបឹង ស្រះ ត្រពាំង ស្ទឹង ប្រឡាយ និងទន្លេ។ ក្រៅពីប្រយោជន៍ក្នុងវិស័យកសិកម្ម ​និងអាហាររបស់មនុស្ស កំប្លោក​​ត្រូវ​បានគេយកទៅធ្វើជាខ្សែចង ច្នៃធ្វើជាសំភារៈប្រើប្រាស់ផ្សេងៗ និងកែច្នៃធ្វើជាគ្រឿងសង្ហារឹមជាដើម។ ប្អូនប្រុស ប្រាក់ លីណូ  អាយុ២៨ឆ្នាំ (ឆ្នាំ២០១៩) រស់នៅភូមិព្រែក​តាឡុង សង្កាត់មានជ័យ ខណ្ឌមានជ័យ រាជធានីភ្នំពេញ មានបទពិសោធន៍​ល្អក្នុងការបេះធាងកំប្លោកនៅបឹងជើងឯកមកច្រៀកឆូតយកទៅលក់ ដែលមុខរបរនេះ ជីដូន​របស់​ប្អូន​​ប្រុស​ប្រកប​តាំងពីឆ្នាំ១៩៧៩មកម្លេះ ហើយក្នុងពេលនេះ (ឆ្នាំ២០១៩) កូននិងចៅក៏ប្រកបមុខរបរនេះផងដែរ​។ ចំពោះបទ​ពិសោធន៍​​​សូមបង្ហាញជូនដូចខាងក្រោម។

១-សារៈប្រយោជន៍កំប្លោកក្រៅពីវិស័យកសិកម្ម

ក្រៅពីវិស័យកសិកម្ម (ជីធម្មជាតិ ចំណីសត្វ) និងអាហាររបស់មនុស្ស (ផ្កាជាអន្លក់ ល្បោយនំបញ្ចុក) កំប្លោកត្រូវបានគេ​យក​មកធ្វើជាខ្សែចងរបស់របរផ្សេងៗប្រចាំថ្ងៃ ជាពិសេសចងកំបុតត្រីអាំង ចងសាច់ក្រក ច្នៃធ្វើជាសំភារៈប្រើប្រាស់ប្រចាំថ្ងៃដូច​ជា ស្បែក​ជើង​ កន្ត្រក កាបូប…និងកែច្នៃធ្វើជាគ្រឿងសង្ហារឹមជាដើម។

២-មធ្យោបាយ និងសំភារៈ

ទូក និងកូនកាំបិត។

៣-ការកាច់បេះយកធាងកំប្លោក និងវិធីធ្វើ

• ជិះទូកទៅកាច់បេះយកតែធាងកំប្លោកដែលមានប្រវែងចាប់ពី ៦ ទៅ ៩តឹក ប៉ុន្តែបើមិនមានខ្នាតនេះទេ គឺប្រវែង ៥ ទៅ ៦តឹកក៏បានដែរ
• កាត់ស្លឹកចេញ ប៉ុន្តែត្រូវទុកស្លឹកឲ្យនៅសល់ប្រមាណ ៥សង្ទីម៉ែត្រ (ខ្វះលើសបន្តិចបន្តូចក៏បាន)
• ច្រៀកធាងជា២ ឬ ៤ ចម្រៀកតាមតម្រូវការយកទៅហាលថ្ងៃរហូតដល់ស្លឹកដែលនៅសល់ខាងចុងនោះឡើងរាងពណ៌ស ទើបចងក្របូចខាងចុងបញ្ចូលគ្នាជាបាច់

• ពេលល្ងាច ឬពេលមេឃរកកលភ្លៀង ត្រូវប្រមូលគរទុកដោយគ្របតង់កៅស៊ូ ឬថង់ប្លាស្ទិកពីលើនិងយករបស់ធ្ងន់ (ដុំថ្ម កំណាត់ឈើ) សង្កត់ជាយតង់កៅស៊ូដើម្បីកុំឲ្យប៉ើង និងទទឹក
• នៅពេលចងក្របូចជាបាច់រួចហើយក៏ដោយ គឺនៅតែហាលថ្ងៃទៀតរហូតធាងឡើងពណ៌ស (ធាងបាត់ពណ៌បៃតង) ទើបលែងហាល (ហាលរយៈពេល២ថ្ងៃបើមានកំដៅខ្លាំង បើកំដៅថ្ងៃមិនគ្រប់គ្រាន់ទេ គឺហាលរហូតដល់៥ថ្ងៃ)។

៤-ថ្លៃឈ្នួលអ្នកច្រៀក អ្នកចងរាប់សរសៃកំប្លោក និងចំណូល

ប្អូនប្រុសបានឲ្យដឹងថា អ្នកច្រៀកកំប្លោកក្នុងមួយថ្ងៃតម្លៃ ២០.០០០រៀលក្នុងម្នាក់។ ចំណែកអ្នកចងវិញ គេយក​ឈ្នួលគិតរាប់​សរសៃកំប្លោកគឺ ១៥០សរសៃ (ដុំតូច) ១០០រៀល ចំពោះដុំធំគឺស្មើនឹងដុំតូច ១០ដង (១៥០ X ១០) = ១.៥០០សរសៃ តម្លៃ ១.០០០​រៀល។ នៅពេលរាប់ចងរួចគឺខាងប្អូនប្រុសដឹកជញ្ជូនទៅ​ឲ្យម៉ូយ និងក៏មានអ្នកទិញមកយកដល់ផ្ទះប្អូនដែរ។ ចំពោះចំណូលគឺក្នុងមួយថ្ងៃរកបានពី ៨០.០០០ ទៅ ៩០.០០០រៀល (មិនទាន់គិតលើចំណាយ)។

កត់ចំណាំ. ខែអំណោយផលល្អក្នុងការប្រកបមុខរបរនេះ គឺពីខែមករា ដល់ខែមេសា ពីព្រោះមានពន្លឺថ្ងៃគ្រប់គ្រាន់ក្នុងការ​ហាល ក្រៅពីខែនេះពន្លឺថ្ងៃមិនសូវអំណោយផលទេ។ នៅរដូវវស្សាសូមប្រយ័ត្នចំពោះបាតុភូតរន្ទះបាញ់ ពិសេសដុំពពកខ្មៅនៅពីលើសូមប្រញាប់ឡើងគោកជាបន្ទាន់ព្រោះទឹកក៏ជាប្រភពចម្លងចរន្តអគ្គិសនីមួយដែរបង្កើតជារន្ទះបាញ់បណ្តាលឲ្យឆក់សត្វ មនុស្សស្លាប់។ រីឯប្រវែងសរសៃកំប្លោកគឺមានអ្នកទិញខ្លះចង់បានទាំងវែង អ្នកខ្លះចង់បានកាត់ជា ២ ឬ ៣ កំណាត់ដើម្បី​យកទៅប្រើប្រាស់បាន​តាមតម្រូវការ។

សង្ខេបចំណុចសំខាន់ៗនៃការបេះកំប្លោកច្រៀកលក់៖

• កាច់បេះយកតែធាងកំប្លោកប្រវែងចាប់ពី ៥ តឹកឡើងទៅ
• កាត់ស្លឹកចេញដោយទុកឲ្យនៅសល់ស្លឹកបន្តិច រួចច្រៀកជា២ ឬ ៤ចម្រៀកតាមតម្រូវការ
• យកទៅហាលថ្ងៃឲ្យស្លឹកខាងចុងឡើងរាងពណ៌ស ទើបចងក្របូចផ្នែកខាងចុងជាបាច់​
• ពេលល្ងាច ឬមេឃរកភ្លៀង ប្រមូលកំប្លោកគរលើគ្នារួចគ្របតង់កៅស៊ូ ឬថង់ប្លាស្ទិកដោយសង្កត់ជើងកុំឲ្យប៉ើង
• មេឃរកភ្លៀង ពិសេសដុំពពកខ្មៅនៅពីលើ ប្រញាប់ឡើងគោកជាបន្ទាន់ ការពាររន្ទះបាញ់ត្រូវ
• ហាលបន្តទៀតទាំងបាច់នោះទាល់តែធាងឡើងពណ៌ស (បាត់ពណ៌បៃតង) ទើបឈប់ហាល
• ក្នុងការលក់គឺរាប់ចំនួនសរសៃ (ចម្រៀក) កំប្លោក និងកាត់ជាកំណាត់ៗ តាមតម្រូវការអ្នកទិញ៕

អត្ថបទ. ប៉ោ  សេដ្ឋា

សហគមន៍សម្បូរសប្បាយ