Home / កសិកម្ម / របៀបផលិតនិងថែរក្សាគ្រាប់ពូជដោយខ្លួនឯង

របៀបផលិតនិងថែរក្សាគ្រាប់ពូជដោយខ្លួនឯង

ក្នុងការដាំដុះ កសិករភាគច្រើនបានទិញគ្រាប់ពូជពីទីផ្សារមកដាំដែលមានតម្លៃថ្លៃ។ ​ក៏ប៉ុន្តែជួន​កាល​គ្រាប់​ពូជទាំងនោះច្រើនមិនសូវមានគុណភាពល្អ កម្រិតដុះទាប និងអាចនាំមកនូវជំងឺផ្សេងៗ​ មកជាមួយផង​។ល។ អាស្រ័យដោយការទិញគ្រាប់ពូជដែលមានគុណភាពអន់នេះហើយដែលធ្វើឲ្យការដាំដុះទទួល​បរាជ័យ​។ ដូច្នេះ​ដើម្បីចៀសវាង នូវបញ្ហាខាងលើ បងប្អូនកសិករត្រូវចេះដាំនិងថែរក្សាគ្រាប់ពូជដោយខ្លួនឯង។​ ខាងក្រោម​នេះជាយោបល់ណែនាំខ្លះៗ​ ដើម្បីជាជំនួយដល់បងប្អូនកសិករក្នុងការផលិតគ្រាប់ពូជ៖

ដំណាក់កាលទី១

ត្រូវពិនិត្យរកមើលតើដើម ឬគុម្ពមួយណាដែលយើងជ្រើសរើសធ្វើពូជ ហើយដាក់សញ្ញាចំណាំ​ដើម្បី​ចៀស​វាងការច្រឡំ ឬប្រមូលផល។ រីឯការជ្រើសរើសត្រូវអនុវត្តតាមកត្តាខាងក្រោម៖

  • ត្រូវជ្រើសរើសដើមណាដែលមានសុខភាពល្អ (គ្មានសត្វល្អិត និងជំងឺបំផ្លាញ)
  • ត្រូវជ្រើសរើសដើមណាដែលផ្តល់ទិន្នផលល្អ និងពណ៌ល្អ។

ដំណាក់កាលទី២

ជ្រើសរើសផ្លែណាដែលមានរូបរាងល្អ។ យកល្អចៀសវាងកុំបេះផ្លែទី១ គឺចាំបេះផ្លែទី២ ឬទី៣ ពីព្រោះយើងត្រូវចាំមើលសិនតើ ដើមនោះអាចផ្តល់ផ្លែល្អបានច្រើនដែរឬទេ? ជួនកាលដើមខ្លះ មានតែផ្លែដំបូងល្អតែផ្លែ​ក្រោយៗសុទ្ធតែអន់ ឬដើមជួបនូវការបំផ្លាញផ្សេងៗ។ នៅពេលផ្លែដែលយើងបានជ្រើសរើសនោះទុំល្អហើយត្រូវបេះទុក តែបេះនៅពេលដែលមេឃស្រឡះល្អ ចៀសវាងបេះនៅពេលមានភ្លៀង។

ដំណាក់កាលទី៣

ផ្លែដែលបេះបាន ត្រូវប្រឡេះយកគ្រាប់ហាលថ្ងៃឲ្យស្ងួតយ៉ាងឆាប់រហ័ស។ គ្រាប់ខ្លះត្រូវលាងទឹកជាមុនសិន (ឧទាហរណ៍ ប៉េងប៉ោះ ល្ហុង…) មុននឹងហាល។ ការហាលនេះគឺដើម្បីឲ្យគ្រាប់មានគុណភាពល្អគ្មានជំងឺ​។ ការហាលគឺត្រូវហាលក្រោមពន្លឺព្រះអាទិត្យនៅពេលព្រឹករហូតដល់ថ្ងៃជិតត្រង់។ ការហាលចោលនៅពេលថ្ងៃត្រង់ និងថ្ងៃរសៀលមិនល្អទេ ពីព្រោះវាក្តៅពេកហើយអាចបណ្តាលឲ្យប៉ះពាល់ដល់ជីវិតរបស់គ្រាប់។ បទពិសោធន៍កន្លងមកគេច្រើនចំណាយពេលហាលពី ៣ ទៅ ៥ម៉ោង នៅពេលព្រឹក។ សូមបញ្ជាក់ផងដែរ ការ ហាល​គឺធ្វើយ៉ាងណាឲ្យមានខ្យល់ចេញចូលបានល្អ។ បន្ទាប់ពីបានហាលគ្រាប់ស្ងួតល្មមហើយ ត្រូវសំអាតឲ្យស្អាតដោយរើសគ្រាប់ខូចចោលយកតែគ្រាប់ល្អៗ តែប៉ុណ្ណោះ។

ដំណាក់កាលទី៤

ត្រូវយកគ្រាប់ពូជទុកដាក់នៅកន្លែងស្ពាត ស្ងួត ងងឹត និងកំដៅទាប (ត្រជាក់)។ ក្នុងការទុកដាក់គ្រាប់ពូជត្រូវរក្សាទុកក្នុងដប ឬប្រដាប់ច្រក ដែលគ្មានខ្យល់ចូល។ គ្រាប់ត្រូវរក្សាទុកដោយលាយជាមួយសារធាតុមួយ​ចំនួន ដែលអាចជួយស្រូបសំណើមនិងជួយបណ្តេញខ្មូត។ សារធាតុទាំងនោះមានដូចជា ផេះស្តួត ធ្យូងស្ងួត​ជាដើម។

ដំណាក់កាលទី៥

ប្រសិនបើយើងត្រូវការទុកគ្រាប់ពូជយូរ យកល្អយើងចាក់គ្រាប់ពូជចេញ ដើម្បីយកមកហាលហើយឧស្សាហ៍ប្តូរផេះ ឬធ្យូងដែលដាក់លាយជាមួយគ្រាប់ ពូជ។ រយៈពេលហាលម្តងៗ គឺមួយព្រឹកគ្រប់គ្រាប់ហើយ។

ដំណាក់កាលទី៦

ត្រូវបិទស្លាកលើដប ឬកំប៉ុង ដើម្បីងាយស្រួលក្នុងការចំណាំទុក។ អ្វីដែលគួរសរសេរ លើស្លាកនោះមាន​ឈ្មោះដំណាំ ឬឈ្មោះពូជថ្ងៃខែឆ្នាំនៃការប្រមូលផល។ ដូច្នេះបងប្អូនកសិករគួរតែអនុវត្តនូវដំណាក់កាលទាំង​៦ខាងលើឲ្យបានល្អ ដើម្បីថែរក្សាទុកគ្រាប់ពូជដោយខ្លួនឯងសម្រាប់ដាំនៅរដូវក្រោយទៀត៕

ប្រភពពី ទស្សនាវដ្តីកសិករ

សហគមន៍សម្បូរសប្បាយ

Loading...

អំពី sambosabay

Avatar
សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

អ្នកស្រី ញ៉ែម សុវណ្ណរី ម្ចាស់ពានរង្វាន់លេខ១ មេគោក្រមុំ ៣ក្បាល

អ្នកស្រី ញ៉ែម សុវណ្ណរី អាយុជាង៤០ឆ្នាំ រៀនថ្នាក់ទី៩ រស់នៅភូមិពោធិព្រះសង្ឃ ឃុំតាភេម ស្រុកត្រាំកក់ ខេត្តតាកែវ​។អ្នកស្រី​បានគាំទ្រដោយ​អង្គការសេដាក ទាក់ទងនឹងបច្ចេកទេសកសិកម្មតាមគោលការណ៍ធម្មជាតិ ជំនាញការរៀបចំសហគមន៍ ការគ្រប់គ្រងដឹកនាំ និងការអភិវឌ្ឍខ្លួននៅឆ្នាំ២០០៤។