ការដាំដំណាំពោត

ក. លក្ខណៈទូទៅរបស់ដំណាំពោត

ដំណាំពោតអាចលូតលាស់នៅតំបន់ដែលមានអាកាសធាតុក្តៅហើយសើម សីតុណ្ហភាពដែលសមស្របចន្លោះពី ២៥ ទៅ ៣០ អង្សាសេ វាក៏ជាដំណាំដែលត្រូវការពន្លឺផងដែរ។ ដើម្បីទទួលបានទិន្នផលខ្ពស់ ពោតត្រូវការទឹកគ្រប់គ្រាន់ពេញមួយវដ្តនៃការលូតលាស់របស់វា។ ពោតជាដំណាំដែលមិនប្រកាន់រដូវអាចលូតលាស់លើដីគ្រប់ប្រភេទ។

ខ. សារៈប្រយោជន៍

ពោតផ្តល់សារធាតុចិញ្ចឹមជាច្រើនដល់រាងកាយមនុស្សនិងសត្វ ក្រៅពីធ្វើជាចំណីអាហារ ដូចជា ប្រេងចម្អិនអាហារ អាំង ស្ងោរ លីង ចៀន និងផលិតជានំផ្សេងៗ គេក៏អាចកែច្នៃធ្វើជាចំណី​សត្វផងដែរ។  ពោតអាចប្រើធ្វើជាវត្ថុធាតុដើមក្នុងឧស្សាហ៍កម្ម ដូចជា គ្រឿង​តម្បាញ សារធាតុអេតាណុល។ល។

គ. ការរៀបចំដី 

• ដើម្បីឲ្យដំណាំពោតដុះលូតលាស់ល្អនិងបានទិន្នផលខ្ពស់ត្រូវជ្រើសរើសដីផុសមិនហាប់ ដីដែលមានជីជាតិច្រើន ហើយគ្មានជាតិជូឬប្រៃខ្លាំង

• ភ្ជួរលើកទី១ ឲ្យបានជំរៅពី ១៥ ទី ២៥សង្ទីម៉ែត្រ​ (១,៥ ទៅ ២,៥តឹក)
• បន្ទាប់ពីភ្ជួរហើយត្រូវរាស់បំបែកដីឲ្យម៉ដ្ឋល្អ
• ភ្ជួលើកទី២ រយៈមួយអាទិត្យក្រោយភ្ជួរលើកទី១ រួចបាចជីលាមកសត្វ ឬ​កំប៉ុស្តទ្រាប់បាត

• រាស់បំបែកដីឲ្យម៉ដ្ឋ និងលុបជីចូលទៅក្នុងដី រួចលើករងដាំឬបុកដាំ។

ឃ. ពេលវេលាដាំដុះ  

យោងទៅតាមលក្ខណៈអាកាសធាតុ គេអាចដាំពោតបានពីររដូវក្នុងមួយឆ្នាំ

• រដូវដើមឆ្នាំ ចាប់ពីខែមេសា មិថុនា
• រដូវចុងឆ្នាំ ជារដូវទឹកសម្រកចាប់ពីខែវិច្ចិការដល់ខែមករា។

ង. ការដាំ 

• គេអាចដាំពោតតាមពីររបៀប បុកដាំ និងលើករងដាំ
• បុកដាំឬកប់គ្រាប់ពូជដាំអាស្រ័យទៅតាមរដូវ រដូវវស្សាកប់ជម្រៅ ៣ ទៅ ៥សង្ទីម៉ែត្រ រដូវប្រាំង ៥ ទៅ ៨សង្ទីម៉ែត្រ។ ដាំពីរគ្រាប់ក្នុងមួយរណ្តៅ

• ទុកចន្លោះជួរ ៥តឹក និងចន្លោះគុម្ព ២តឹក ទៅ ៣តឹក។

ច. ការថែទាំ

• ការដាក់ជីមានសារៈសំខាន់បំផុត ធ្វើឲ្យដំណាំដុះលូតលាស់ល្អ ជាពិសេសជីធម្មជាតិមាន ជីកំប៉ុស្ត លាមកសត្វ កំទេចកំទី សំរាមផ្សេងៗ

• ជីបំប៉នត្រូវដាក់ក្រោយពីដាំបានរយៈពេល ១០ថ្ងៃ ដាក់នៅឆ្ងាយពីគល់ ១តឹក រួចពូនដីលុបឲ្យជិតកុំឲ្យទឹកហូរច្រោះ និង​ទប់ដើមផង។

• ត្រូវសំអាតស្មៅក្នុងចំការឲ្យបានស្អាត រហូតដល់ពេលចេញផ្ការួច

• ជំរះស្មៅលើកទី១ ពេលពោតអាយុ១៥ថ្ងៃក្រោយពីដាំ ត្រូវជំរះស្មៅលើកទី២ ពោតអាយុ៣០ថ្ងៃបន្ទាប់ពីដាំ  លើកទី៣ ពោតមានអាយុ៥០ ទៅ  ៦០ថ្ងៃ បន្ទាប់ពីដាំ

• ការជំរះស្មៅមួយលើកក៏ត្រូវការពូនគល់ផងដែរ
• ការដកបំបែកកូន ធ្វើឡើងក្រោយពីពោតដុះបាន ១០ ឬ ១៥ថ្ងៃ ដោយទុកតែមួយដើមក្នុងមួយគុម្ព គឺទុកដើមណាដែលមានសភាពរឹងមុំាល្អជាងគេ។

ឆ. ការប្រមូលផល 

• ដំណាំពោតអាចប្រមូលផលខ្ចី និងទុំតាមសេចក្តីត្រូវការ

• ក្រោយពីដាំបានរយៈពេល ២,៥ ទៅ ៣ខែ គេអាចធ្វើការប្រមូផលដំណាំពោត

• ក្រៅពីអាយុគេអាចសំគាល់លើការប្រែប្រួលលក្ខណៈដងដើមដូចខាងក្រោម៖

១. សំបកផ្លែ ដើម ស្លឹក ស្ងួតក្រៀម

២. គ្រាប់រឹងភ្លឺរលោងសំណើមក្នុងគ្រាប់នៅសល់ប្រមាណ            ២៥ភាគរយ

• ជាទូទៅគេប្រមូផលដោយដៃ ហើយដឹកជញ្ចួនមកផ្ទះ បកសំបក និងដាក់ផ្លែពោតនោះហាល។​

ជ. ការទុកដាក់ពូជ  

• ដើម្បីទុកពូជដាំបានល្អ ត្រូវជ្រើសរើសដើមដែលល្អ មិនខ្ពស់ពេក ឬទាបពេក ពុំមានជំងឺនិងសត្វល្អិតបំផ្លាញ ពូជផ្តល់ទិន្នផលខ្ពស់

• គ្រាប់ពូជត្រូវហាលឲ្យស្ងួតដល់សំណើមក្នុងគ្រាប់នៅសល់ ១៣ ដល់ ១៤ភាគរយ

• រក្សាទុកកន្លែងដែលមានខ្យល់ចេញចូល។

សរុបបចេ្ចកទេសសំខាន់ៗក្នុងការដាំពោត ដើម្បីទប់ទល់និងបម្រែបម្រួលអាកាសធាតុ មានដូចខាងក្រោម៖

១. រៀបចំដីឲ្យបានល្អដោយភ្ជួរាស់ចំនួន ២សា  

២. ជ្រើសរើសពេលវេលាដាំដុះ និងទុកដាក់ពូជបានល្អ         

៣. មានការគ្រប់គ្រង និងប្រើប្រាស់ទឹកសមស្រប    

៤. ថែទាំ ពូនគល់ និងដកស្មៅជាប្រចាំ៕

 

ប្រភពអត្ថបទ (ទស្សនាវដ្តីកសិករជោគជ័យ បោះពុម្ពដោយអង្គការសេដាក)

សហគមន៍សម្បូរសប្បាយ