ទឹកផេះចង្ក្រានកំចាត់សត្វល្អិតបំផ្លាញដំណាំ

កសិករ និងអ្នកដាំដំណាំជាលក្ខណៈគ្រួសារ តែងតែជួបនូវសត្វល្អិតចង្រៃ មកបំផ្លាញដំណាំឈើហូបផ្លែ និងបន្លែគ្រប់ប្រភេទដូច​ជា ចៃ ស្រមោច និងសត្វល្អិតផ្សេងៗទៀត។ ដើម្បីកំចាត់សត្វល្អិតចង្រៃទាំងនោះ គឺគេយកមេទឹកផេះលាយជាមួយទឹក (បានជាទឹកផេះចង្ក្រាន) មាន​ប្រសិទ្ធភាពខ្ពស់ មិនប៉ះពាល់ដល់សុខភាពអ្នកបរិភោគ បាញ់ទៅលើដំណាំ។ វិធីធ្វើថ្នាំទឹកផេះចង្ក្រាននេះ មានបង្ហាញជូនដូចខាងក្រោម។

១- វត្ថធាតុដើម និងសំភារៈ

• ផេះចង្ក្រាន ១ គីឡូក្រាម
• ទឹក ៣ លីត្រ
• កាធុនជ័រ ឬធុងជ័រ ២
• ឈើរ ឬជ័រសំរាប់កូរ (ហាមយកដែក)
• កាសំរាប់ដួសមេទឹកផេះ ១
• ស្បៃ និងជីឡៅ ១។

២-វិធីធ្វើមេទឹកផេះចង្ក្រាន

យកទឹក ៣លីត្រចាក់ចូលក្នុងកាធុនជ័រ រួចដាក់ផេះ​ចង្ក្រាន ១គីឡូក្រាមចូលក្នុងកាធុន​ជ័រនោះទៀត ឬ (ផេះសុទ្ធ៥គីឡូក្រាមលាយទឹក១០លីត្រ) ។ បន្ទាប់មកយកឈើ ឬជ័រ​កូរ​​ល្បាយ​នោះឲ្យរលាយ​ចូល​គ្នា​ល្អ (ហាមយកដែកកូរ​ព្រោះ​វាប្រតិកម្ម) រួចទុក​ចោលមួយយប់។ ក្រោយទុចោលមួយយប់យកកា ឬអ្វីផ្សេងក៏បាន មកដួសយកតែទឹក​ថ្លា​ៗ​នៅខាងលើ (កំទេចធ្យូងធ្លាក់នៅបាត​ក្រោម) ចាក់ទៅក្នុងកាធុន ឬធុងជ័រមួយទៀតដោយមាន​ស្បៃ​ពាស​ពី​លើដើម្បីត្រងយកកំទេចសំរាមចេញ។ រួចយកទឹកដែលត្រងរួចនេះទៅប្រើប្រាស់ក្នុងពេលនោះក៏បាន ឬច្រក​ចូលក្នុង​ដប ឬប៊ីដុងជ័រទុកសំរាប់ប្រើនៅពេលក្រោយក៏បាន។ សូមទុកឲ្យឆ្ងាយពីដៃក្មេង ឬប្រាប់ក្មេង ក៏ដូចមនុស្ស​ចាស់កុំ​ឲ្យ​យក​ទឹកផេះនេះផឹក ព្រោះវាជាថ្នាំកំចាត់​សត្វ​ល្អិត​ចង្រៃ គឺមិនមែនទឹកសំរាប់ផឹកទេ។ មេទឹកផេះនេះ​អាចទុកបានរយៈពេលមួយឆ្នាំ។

៣-វិធីប្រើ

យកមេទឹកផេះ ១៥០សេសេ (កន្លះលីត្រចែកជាពីរ) លាយនឹងទឹកធម្មតា១០​លីត្រ (បានជាទឹកផេះចង្ក្រាន)។ បាញ់រៀងរាល់៣ថ្ងៃម្តង គឺបាញ់នៅពេលព្រឹក ឬពេលល្ងាចដែលអាកាសធាតុត្រជាក់។ បើយើងចង់ប្រើផេះសុទ្ធយកទៅ រោយជុំវិញគល់ដំណាំ ឬបាចពីលើស្លឹកដំណាំក៏បានដែរ សំរាប់កំចាត់​ចៃ និងស្រមោចគ្រប់ប្រភេទ៕

តាក់តែងជាអត្ថបទលំអិត ដោយលោក ប៉ោ សេដ្ឋា

ប្រភពពី Facebook របស់លោក Nak Ny (ជាវីដេអូខ្លី)

សហគមន៍សម្បូរសប្បាយ