Home / កសិកម្ម / ការអភិវឌ្ឍកសិដ្ឋានពហុប្រយោជន៍តាមគោលការណ៍ «ស៤» (បណ្ឌិត យ៉ង សាំងកុមារ)

ការអភិវឌ្ឍកសិដ្ឋានពហុប្រយោជន៍តាមគោលការណ៍ «ស៤» (បណ្ឌិត យ៉ង សាំងកុមារ)

កន្លងមកកសិករជួបនឹងភាពក្រីក្រដោយសារគាត់អាស្រ័យលើការធ្វើស្រែតែមួយមុខ ហើយការធ្វើស្រែទៀតសោតក៏បានទិន្ន ផលទាប និងលក់មិនបានថ្លៃ។ ដើម្បីទទួលបានប្រាក់ចំណូលខ្ពស់ មានចំណីអាហារ​បរិភោគ​គ្រប់​គ្រាន់ និងធានាបានការងារគ្រប់រដូវនៅលើកសិដ្ឋាន គ្រួសារកសិករគួរតែបំប្លែងដីស្រែឲ្យក្លាយជា កសិដ្ឋានពុហុប្រយោជន៍ (ប្រយោជន៍ចំរុះ) ឬពហុផលតាមគោលការណ៍ «ស៤»។ នៅពេលដែលកសិករ​បំប្លែង​ដីស្រែជាកសិដ្ឋានពហុប្រយោជន៍ ផ្ទៃដីធ្វើស្រែមានទំហំតូចជាងមុន តែប្រាក់ចំណូលសរុបកើនឡើង​ច្រើន​ដងជាង​ពេលធ្វើតែស្រែមួយមុខ។​ ម្យ៉ាងវិញទៀតនៅលើដីតូចកសិករអាចទទួលបាន ផល​ស្រូវខ្ពស់​តាម​រយៈការអនុវត្ត ប.វ.ស. ឲ្យបានល្អ ប្រើពូជសុទ្ធល្អ និងមានប្រព័ន្ធបញ្ចេញបញ្ចូលទឹកល្អ (ពេលអត់ទឹកយក​ទឹក​ពីស្រះ ពេលមាន​ទឹក​ច្រើនរំដោះទឹកចូលមកស្រះវិញ)។ ដើម្បីឲ្យបានចំណូលខ្ពស់ថែមទៀតពីការ​ធ្វើស្រែ​នៅ​លើដីតូច កសិករ​គួរធ្វើស្រូវដែលលក់បានតម្លៃថ្លៃ ឬផលិតពូជស្រូវលក់។ ការមានស្រះទឹកដែលមានទឹកគ្រប់​គ្រាន់ និងមានដី​ទួល​អាចបង្កលក្ខណៈងាយស្រួលដល់កសិករក្នុងការដាំបន្លែសរីរាង្គសំរាប់លក់មកកាន់ទីផ្សារ ដែលជាមុខរបរមួយឆាប់ទទួលបានប្រាក់ចំណូលខ្ពស់ ស្របពេលនឹងស្ថានភាពបច្ចុប្បន្នទីផ្សារបន្លែកាន់តែធំទៅៗដោយសារប្រជាជនរស់នៅទីក្រុង និងទីប្រជុំជនកាន់តែកើន និងអ្នកទេស ចរណ៍បរទេសកាន់តែកើនឡើង​ជាប់ជានិច្ច។

ការផលិតស្រូវ បន្លែ ឈើហូបផ្លែ និងផលិតផលដំណាំផ្សេងៗបានជោគជ័យទាមទារឲ្យមានជីធម្មជាតិគ្រប់គ្រាន់ ជី លាមកសត្វ (គោ ក្របី មាន់ ទា…) ជាពិសេសកាកសំណល់ឡជីវឧស្ម័ន។ ជីធម្មជាតិមិនត្រឹមតែជួយឲ្យយើងផលិតបានផលខ្ពស់ទេ គឺថែមទាំងជួយឲ្យដីមានជីជាតិយូរអង្វែង និងកាត់បន្ថយនូវចំណាយច្រើនដែល​នាំឲ្យកសិករទទួលបានប្រាក់ចំណេញខ្ពស់ និងយូរអង្វែង។

ដើម្បីទទួលបានជោគជ័យយូរអង្វែងក្នុងការអភិវឌ្ឍកសិដ្ឋាន យើងគួរយកចិត្តទុកដាក់លើទ្រឹស្តី «ស៤» ដែលមានដូចខាងក្រោម៖

ស១-ស្រះ. មានស្រះទឹកសំរាប់ស្តុកទឹកស្រោចស្រពគ្រប់រដូវ ជួយរំដោះទឹក និងជាកន្លែងចិញ្ចឹមត្រី។

ស២-សួន. សួនដំណាំបន្លែ ឈើហូបផ្លែ សួនដំណាំធ្វើចំណីសត្វ សួនដើមឈើពហុប្រយោជន៍ ដំណាំឱសថ។

ស៣-ស្រែខ្លឹម. ជាស្រែផលិតស្រូវតាម ប.វ.ស. (ប្រព័ន្ធប្រពលវប្បកម្មដំណាំស្រូវតាមគោល ការណ៍ធម្មជាតិ) បានទិន្នផលខ្ពស់ និងមានដាំដំណាំផ្សេងៗមុន និងក្រោយពេលធ្វើស្រូវ ឬបើមានទឹកគ្រប់គ្រាន់អាចធ្វើស្រែបាន ២ដងក្នុងមួយឆ្នាំ។ ស្រែក៏អាចជាកន្លែងចិញ្ចឹមកង្កែប និងត្រីនាំមកនូវចំណូលខ្ពស់ផងដែរ។

ស៤-សត្វ. ជាពិសេសសត្វគោ ក្របី ចិញ្ចឹមយកកូនលក់ និងលាមកសំរាប់ធ្វើជាជី និងផលិតជាជីជីវឧស្ម័ន។ កាកសំណល់ឡជាជីធម្មជាតិដ៏ល្អបំផុត ហើយបើប្រើលាយជាមួយធ្យូងអង្កាមធ្វើឲ្យដីមានជីជាតិល្អយូរអង្វែង។

  • ការចិញ្ចឹមគោក្របី៖ លក់សត្វ + ជីបង្កើនផលដំណាំ
  • ការចិញ្ចឹមជ្រូក៖ លក់ជ្រូក កូនជ្រូក + ជីបង្កើនផលដំណាំ
  • ការចិញ្ចឹមមាន់ទា៖ លក់សត្វ លក់កូន លក់ស៊ុត + ជីបង្កើនផលដំណាំ៕

បណ្ឌិត យ៉ង សាំងកុមារ

សហគមន៍សម្បូរសប្បាយ

Loading...

អំពី sambosabay

សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

លោកអ្នកដែលចូលចិត្តបរិភោគទុរេន អាចមានឱកាសទិញទុរេនខ្មែរបានក្នុងតម្លៃ១២០០០/១គីឡូ

ដោយមើលឃើញពីនិន្នាការប្រជាពលរដ្ឋខ្មែរភាគច្រើនចូលចិត្តបរិភោគទុរេន ប៉ុន្តែទុរេនធម្មជាតិនៅលើទីផ្សារមានតម្លៃខ្ពស់ ដែលធ្វើឱ្យប្រជាពលរដ្ឋខ្មែរអ្នកចូលចិត្តបរិភោគទុរេន ពុំមានលទ្ធភាពក្នុងការទិញយកមកបរិភោគបាន។