Home / ការកែច្នៃកសិផល / សារៈប្រយោជន៍ និងរបៀបធ្វើទឹកសណ្តែក

សារៈប្រយោជន៍ និងរបៀបធ្វើទឹកសណ្តែក

សណ្តែកសៀងមានសារធាតុចិញ្ចឹមដូចអាហារសាច់ដែរ ប៉ុន្តែវាងាយស្រួលរំលាយ និងមានតម្លៃថោកជា​ង​​។ សណ្តែកសៀង គឺសំបូរសារធាតុចិញ្ចឹមច្រើនបំផុតក្នុងចំណោមពពួកសណ្តែកទាំងអស់។ ទឹកសណ្តែកសៀង ឬទឹកសណ្តែកស ដែលចំអិនរួចមួយពែងកាហ្វេមានសារធាតុចិញ្ចឹមស្មើនឹងស៊ុតមាន់ចំនួន២ ឬស្មើនឹងសាច់ជ្រូកចំនួន ១ខាំ (១០០ក្រាម)។

ខាងក្រោមនេះ គឺជាតម្លៃនៃសារធាតុចិញ្ចឹមដែលមាននៅក្នុងសណ្តែកសៀងចំនួន ១ខាំ (១០០ក្រាម)៖

សារធាតុចិញ្ចឹម

ចំនួន

សារធាតុចិញ្ចឹម

ចំនួន

ប្រូតេអ៊ីន ៣៤,១ ក្រាម កាល់ស្យូម ២២,៦ មីលីក្រាម
ជាតិដែក ៨,៤ មីលីក្រាម វីតាមីនបេអង (B1) ១,១ មីលីក្រាម
វីតាមីនបេដឺ (B2) ០,៣១ មីលីក្រាម ជាតិប្រេង ១៧,៧ ក្រាម
ការបូនអ៊ីដ្រាត ៣៣,៥ ក្រាម កាឡូរី ៤០៣

ខាងក្រោមនេះ គឺជារបៀបធ្វើទឹកសណ្តែកដែលជាភេសជ្ជៈមួយប្រភេទដ៏ល្អប្រសើរសំរាប់មនុស្ស។

លទ្ធផល​រូបភាព​សម្រាប់ សណ្តែកសៀង១. គ្រឿងផ្សំ

  • សណ្តែកសៀង ១ គីឡូក្រាម
  • ស្ករស ១ គីឡូក្រាម
  • ទឹក ១០ លីត្រ
  • អំបិល ១ ស្លាបព្រាកាហ្វេ។

យើងសូមបញ្ជាក់ថា សណ្តែក ១គីឡូក្រាម អាចផលិតទឹកសណ្តែកបាន ១០លីត្រ។

២-របៀបធ្វើ

  • អុំសំអាតធូលីចេញឲ្យអស់ពីគ្រាប់សណ្តែក រួចលាងសំអាតវាឲ្យបានស្អាតល្អ
  • ដាក់ត្រាំទឹក (គ្រាប់សណ្តែកដែលបានសំអាតរួច) រយៈពេល ១យប់ រហូតដល់គ្រាប់សណ្តែកឡើងទន់ បន្ទាប់មកបកសំបកចេញឲ្យអស់
  • កិនគ្រាប់សណ្តែកដែលបានបកសំបករួចនោះ បន្ទាប់មកយកម្សៅសណ្តែកនេះលាយជាមួយនឹងទឹក
  • ច្រោះម្សៅសណ្តែកលាយទឹកនេះដោយប្រើក្រណាត់ស្បៃដើម្បីយកទឹកសណ្តែក។ យើងយកតែទឹកសណ្តែកដែលបានច្រោះនេះ ចំណែកកាកគឺបោះចោល ឬទុកឲ្យចំណីជ្រូក មាន់
  • ប៉ុន្តែយើងអាចធ្វើវិធីម្យ៉ាងទៀតបានដោយ យកគ្រាប់សណ្តែកសៀងទៅហាលថ្ងៃឲ្យក្តៅ បន្ទាប់មកកិននឹងត្បាល់ឲ្យវាបែកសំបក ហើយអុំយកសំបកចេញ។ ធ្វើបែបនេះជួយឲ្យគ្រាប់សណ្តែកឆាប់រីក ងាយស្រួលលាង សំអាតយកសំបកចេញ ហើយកិនឆាប់ម៉ដ្ឋល្អ។
  • យកទឹកសណ្តែកឆៅនេះទៅដាំឲ្យពុះ ទុករយៈពេល ៥នាទី រួចដាក់ស្ករ និងអំបិលចូលជាការស្រេច។

យើងអាចពិសារទឹកសណ្តែកបានទាំងនៅក្តៅអ៊ុនៗ ឬទុកឲ្យត្រជាក់ដោយលាយជាមួយទឹកកក ឬក្លាស្សេ។

ដូចនេះយើងបានឃើញហើយថា ទឹកសណ្តែកដែលធ្វើពីសណ្តែកសៀង គឺជាភេសជ្ជៈមួយដ៏មានសារៈសំខាន់សំរាប់ផ្តល់អាហារូបត្ថម្ភ ឬសារធាតុចិញ្ចឹមដល់រាងកាយរបស់យើង ហើយវាមានលក្ខណៈល្អប្រសើរជាងអាហារសាច់ទៅទៀត ពីព្រោះវាងាយរំលាយអាហារ ដែលជួយសំរួល​ដល់ប្រព័ន្ធរំលាយអាហារទៀតផង​។ ម្យ៉ាងវិញទៀតវាងាយស្រួលធ្វើជាអាហារ និងមានតម្លៃថោកទៀតផង ដែលកសិករយើងអាចធ្វើបានសំរាប់បរិភោគក្នុងគ្រួសារ ឬក៏សំរាប់លក់យកប្រាក់ចំណូលកាន់​តែខ្ពស់ (បោះពុម្ពដោយការិយាល័យ កម្មវិធីប្រទេសថៃ)។

កត់សំគាល់

  • សូមប្រយ័ត្នទឹកសណ្តែកពុះ ផុលកំពប់ នៅពេលដាំលើភ្លើង ពីព្រោះវាមានពពុះច្រើន ដូច្នេះត្រូវនៅចាំមើលវា
  • ទឹកសណ្តែកនៅពេលត្រជាក់អាចរក្សាទុកបានប្រហែល ៣ម៉ោងដោយមិនបាច់ក្លាស្សេ តែបើសិនទុកយូរត្រូវ ដាក់ក្លាស្សេក្នុងទឹកកក បើមិនដូច្នេះទេវាឡើងជូរ ហូបលែងកើត។
  • ចូរកុំត្រាំគ្រាប់សណ្តែកសៀងយូររហូតដល់ ១ថ្ងៃ នាំឲ្យវាជូរខូចធ្វើទឹកសណ្តែកមិនបានល្អ៕

ដកស្រង់ចេញពីសៀវភៅស្តីពី ការកែច្នៃចំណីអាហារ របស់អង្គការសេដាក

សហគមន៍សម្បូរសប្បាយ

Loading...

អំពី sambosabay

សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

ផលប្រយោជន៍នៃស្រាអង្ករដល់សុខភាព

ជនជាតិខ្មែរយើង ក៏ដូចជនជាតិអាស៊ីផ្សេងទៀត និយមផលិត និងបរិភោគស្រាអង្ករ ដែលមានប្រវត្តិយូរអង្វែងណាស់មកហើយ។