បទពិសោធន៍ធ្វើស្រែខ្លឹម (កសិករ អ៊ុន គឹមសៀង)

លោកពូ អ៊ុន គឹមសៀង ជាកសិកររស់នៅក្នុងភូមិគោកអណ្តែត ឃុំស្រឡៅ ស្រុកបារាយណ៍ ខេត្តកំពង់ធំ។ គាត់បានសហការណ៍ជាមួយអង្គការសេដាក តាំងពីឆ្នាំ២០០៨មកម្លេះ។ នៅក្នុងឆ្នាំ២០១៤ គាត់បានដាក់ពាក្យ ប្រឡងប្រកួតអ្នកធ្វើស្រែខ្លឹមថ្នាក់ជាតិ និងជាប់បានពាន  រង្វាន់លេខ២ថ្នាក់ជាតិ សំរាប់កសិករដែលធ្វើស្រែខ្លឹមបាន ល្អជាងគេ។ ផ្ទៃដីស្រែដែលគាត់បានអនុវត្តមានចំនួន ៨៣អារ និងទទួលបានទិន្នផលប្រមាណ ២.៥១៥​គីឡូក្រាម​។ ចំពោះបច្ចេកទេសនៃការអនុវត្តមានបង្ហាញជូនដូចខាងក្រោម។

១-ការជ្រើសរើសពូជ

• ជ្រើសរើសពូជម្លិះក្រហមចំនួន ១០ គីឡូក្រាម
• ហាលគ្រាប់ស្រូវរយៈពេល ១ម៉ោងនៅពេលព្រឹកមុននឹងយកទៅត្រាំ
• លាងសំអាតគ្រាប់ឲ្យបានស្អាតដោយស្រង់យកគ្រាប់អណ្តែតចេញហើយទុកតែគ្រាប់ពេញល្អ
• ការសំអាតគ្រាប់ពូជមុនពេលសាប។

២-ការរៀបចំថ្នាលសំណាប

• ភ្ជួររាស់ដីចំនួន ២ដង ដើម្បីឲ្យដីម៉ដ្ឋល្អ
• លើកជារងចំនួន ៣ ដោយរងនីមួយៗមានទំហំទទឹង ១,២ម៉ែត្រ បណ្តោយ៤ម៉ែត្រ និងកំពស់ ១,៥តឹក
• ដាក់ជីកាកឡ និងធ្យូងអង្កាមទ្រាប់បាតចំនួន ៥០០គីឡូក្រាមនៅលើថ្នាលសំណាប
• យកគ្រាប់ពូជស្រូវទៅត្រាំ ១យប់ និងផ្អាប់ ២យប់ ទើបយកទៅសាប
• បន្ទាប់មក យកគ្រាប់ពូជដែលបានត្រៀមទុកមកសាបឲ្យស្ដើងៗនៅពេលព្រឹក និងពេលល្ងាច។

៣-ការស្ទូង និងការរៀបចំដី

   ភ្ជួរដីចំនួន ៣ដង

• លើកទី ១. លុបស្មៅ និងជញ្ជ្រាំងដែលនៅសល់ពីឆ្នាំមុន
• លើកទី ២. យកជីកាកឡ លាយជាមួយធ្យូងអង្កាមចំនួន ៥០០គីឡូក្រាមទៅបាចរួចភ្ជួរលុប
• លើកទី៣. ភ្ជួររាស់ពង្រាយដីឲ្យស្មើមុននឹងស្ទួង។

   ការស្ទូង

• សមាជិកក្នុងគ្រួសារស្ទូងតាមបច្ចេកទេសចំនួន ៤នាក់
• បញ្ចូចូលទឹកតិចៗងាយស្រួលក្នុងការវាស់ខ្សែស្ទូង
• ស្ទូងតែ ១ដើម ក្នុង ១គុម្ព
• ស្ទួងសំណាបអាយុ ១៥ថ្ងៃ
• ដកថ្នមៗឲ្យមានជាប់ដីខ្លះៗដាក់ចានដែកនិងកាធុន
• ដកភ្លាមស្ទូងភ្លាម យកតែសំណាបថ្លោសៗដែលមានសុខភាពល្អ
• ស្ទូងពេលត្រជាក់ពីម៉ោង ៧ព្រឹក ដល់ម៉ោង ១០ និង៣០នាទី និងល្ងាចចាប់ស្ទូងពីម៉ោង ២ ដល់ម៉ោង    ៥រៀល
• ស្ទូងជាជួររាក់ៗចន្លោះគុម្ព ២តឹក ទៅ ៣តឹក។

៤. ការថែទាំ

• បោចស្មៅលើកទី១ ក្រោយពេលស្ទូងបានចំនួន ១៥ថ្ងៃ
• បោចស្មៅលើកទី២ នៅពេលស្រូវអាយុបាន ១ខែ
• ស្រូវអាយុបាន ១ខែ គាត់បានដាក់ជីកំប៉ុស្ត លាយជាមួយជីកាកឡជីវឧស្ម័ន
• រក្សាទឹកទុកតិចៗក្នុងស្រែ ដើម្បីជំរុញដល់ការបែកគុម្ពរបស់ស្រូវ
• នៅពេលស្រូវមានអាយុ ១៥ថ្ងៃ ក្នុង១គុម្ព បែកបាន ៣-៥ដើម
• នៅពេលស្រូវមានអាយុ ១ខែ ក្នុង១គុម្ព បែកបាន ៥-១០ដើម។

៥. ការប្រមូលផល

នៅពេលសង្កេតឃើញស្រូវទុំបានចន្លោះពី ៨០ ទៅ ៨៥% គាត់ចាប់ផ្តើមធ្វើការច្រួតកាត់។ ក្នុងការធ្វើស្រូវ​នេះ គាត់ពុំបានចំណាយលើអ្វីទាំងអស់ ថ្លៃពូជ ភ្ជួររាស់ ដកស្ទូង និងជីកំប៉ុស្តផលិតដោយខ្លួនឯង ចំណាយតែ​កម្លាំង​​ពលកម្មប៉ុណ្ណោះ។ ចំពោះទិន្នផលស្រូវដែលគាត់ទទួលបាន ២.៥១៥គីឡូក្រាម។ គាត់លក់បាន ១.២០០​រៀលក្នុង ១គីឡូក្រាម គិតជាទឹកប្រាក់សរុបប្រមាណ ២.៩៣៤.០០០រៀល ដែលជាប្រាក់ចំណូលសុទ្ធ។

៦. ចំណាប់អារម្មណ៍

ក្រោយពីគាត់បានអនុវត្តតាមបច្ចេកទេស ប.វ.ស. (ប្រពលវប្បកម្មដំណាំស្រូវ) មក លោកពូ​សង្កេត​ឃើញ​ថា ស្រូវរបស់គាត់មានការលូតលាស់បានល្អ និងទទួលបានទិន្នផលខ្ពស់ជាងតាមទំលាប់ច្រើន។ ពិសេសបានកាត់​បន្ថយនូវការចំណាយជាច្រើនដូចជា ការជួលស្ទូង និងចំណេញពូជ។ គាត់ក៏បានផ្តាំផ្ញើទៅដល់កសិករ​ផ្សេងៗទៀត​ថា សូមចូលរួមធ្វើការអនុវត្តតាមបច្ចេកទេស ប.វ.ស. នោះបងប្អូននឹងបានចំណេញច្រើន៕

សយ សុភត្រា

សហគមន៍សម្បូរសប្បាយ