Home / កសិកម្ម / បច្ចេកទេសភ្ញាស់ពងមាន់ (កសិករ ម៉ុត ណូត)

បច្ចេកទេសភ្ញាស់ពងមាន់ (កសិករ ម៉ុត ណូត)

លោកពូ  ម៉ុត​  ណូត  រស់នៅភូមិត្រពាំងច្រាំង ​ ឃុំក្រឡាញ់ ស្រុកក្រឡាញ់​ ខេត្តសៀមរាប។ គាត់មានបទពិសោធន៍ជោគ ជ័យ​​ក្នុងការភ្ញាស់កូនមាន់។ ​នៅខែ វិច្ឆិកា​​ ឆ្នាំ២០១១ គាត់បានចូលរួមរៀន​ជាមួយអង្គការសេដាកនៅវគ្គខ្លីៗជាច្រើនលើក  ហើយក៏បានចេះបច្ចេកទេសជាច្រើនជាពិសេស ធ្វើទូរភ្ញាស់កូនមាន់។​ ពេលចាប់ផ្តើមចិញ្ចឹមដំបូងគាត់មានមេមាន់ ៧ក្បាល​ និងបា១ក្បាលប៉ុណ្ណោះ ហើយមិនសូវបានលក់ប៉ុន្មានទេ គឺគ្រាន់តែទុកហូប និងទុកពូជបនុ្ត តែប៉ុណ្ណោះ។ តែមកដល់ឆ្នាំ២០១៣ គាត់មានមាន់មេ ១៤, បា ២មាន់, សាច់​៥០ និងកូនតូច ៗ៧០ ក្បាល ក្នុងនោះគាត់ក៏បានធ្វើពិសោធន៍ភ្ញាស់ពងមាន់ដោយប្រើទូរ​ និងភ្ញាស់ដោយមេផ្ទាល់មួយណាល្អប្រសើរជាង? ជាលទ្ធផលគាត់សង្កេតឃើញថា កូនមាន់ដែលភ្ញាស់ដោយប្រើទូរញាស់បាន៧៥%-៨០% ចំណែកឯភ្ញាស់ដោយមេវិញគឺញាស់បាន ៥០% -៦០%​ប៉ុណ្ណោះ។​ ដូចនេះគាត់បានសម្រេចចិត្ត ធ្វើទូរភ្ញាស់កូនរហូតមក។ គាត់បញ្ជាក់ថារយ​​​​​​​​​​យៈពេល១ឆ្នាំ​  គាត់ទទួលបានពីការលក់កូនមាន់តូចៗ​ និងមាន់ធំប្រមាណ ២.០៣៥.៨០០រៀល លក់ទូរភ្ញាស់ និងទ្រុងបំបែកកូនបាន ២.១៣០.០០០រៀល​​ និងមាន់ដែលនៅសល់គិតត្រឹមថ្ងៃទី១៩ ​ខែ១២ ឆ្នាំ២០១៣ ​គឺមេ ៣៤ក្បាល, បា៥ក្បាល,​ មាន់សាច់ ៧៥ក្បាល​ និងកូនតូច​៥០ក្បាល ដើម្បីទុកចិញ្ចឹមបន្តក្នុងឆ្នាំ២០១៤។ ​ចំណែក បទពិសោធន៍ធ្វើទូរភ្ញាស់​ និងភ្ញាស់កូនមាន់ មានបង្ហាញដូចខាងក្រោម៖

១. ​សម្ភារៈសម្រាប់ធ្វើទូរភ្ញាស់

កេសស្នោដាក់ផ្លែឈើចំនួន២,  ស្កុត១ដុំ,  ដែកគោលអង្កាម១ខាំ, ​​ បំពង់ទីបដែកអ៊ីណុកទំហំ៥ហ៊ុនប្រវែង៥តឹក, សំណាញ់ជ័រ៥តឹក​, ចង្កៀងប្រេងកាតតូច១​​​, ក្រដាសអាលុយមីញ៉ូម ១ដុំធំ, ទែរម៉ូម៉ែត្រវាស់កំដៅ​ ១, ចានដាក់ទឹក២​ និងជំនៀរឈើតូចៗជំរាកស្តើងៗ។

២. របៀបធ្វើទូភ្ញាស់

ជាដំបូងគាត់បានយកកេសផ្លែឈើមកសម្អាត និងកាត់ឲ្យបានស្មើល្អជាងមុនសិន បន្ទាប់មកគឺយកក្រដាសអាលុយមីញ៉ូមបិតឲ្យជាប់នៅផ្ទៃខាងក្នុងនៃកេសឲ្យជិតល្អ ហើយចាប់ផ្តើមយកជំនៀរឈើតូចៗ មកដំគាបសំណាញ់ជ័រជុំវិញ ដែលមានទទឹង និងបណ្តោយតាមទំហំប្រវែងទូ និងទុកចោះប្រហោងចំកណ្តាលដើម្បីដាក់បំពង់ទីប។​ បន្ទាប់មកទៀត ចាប់ផ្តើមចោះទ្វារបិតបើក​ទូរទំហំប្រហែលជា ​១,២តឹក បួនជ្រុងចំនួន២ខាងលើ ១សម្រាប់ដាក់ពង និងទែម៉ូម៉ែត្រ ខាងក្រោមសម្រាប់ដាក់ទឹក​ និងចង្កៀង​ដុតកំដៅជាការស្រេច។

៣. របៀបដាក់ពងមាន់ភ្ញាស់

គាត់បានធ្វើទូសម្រាប់ភ្ញាស់ពងចំនួន ៣ទូ។ ចំពោះការភ្ញាស់គាត់បានយកពងមាន់ពីសម្បុកដែលមេកំពុងពង មកទុកឲ្យបានច្រើន ទើបចាប់ផ្តើមដាក់ក្នុងទូភ្ញាស់។ ទូរនីមួយៗដាក់បានចំនួន ៨០-៨៥គ្រាប់ ក្នុងទូពេលនោះគាត់ចាប់ផ្តើមអុចចង្កៀងឲ្យមានកំដៅត្រឹម ៣៧-៣៨ អង្សាសេ​ មិនឲ្យកំដៅខ្ពស់និងទាបជាងនេះទេ​ ហើយគាត់បានជួយបង្វិលពងរាល់ ៣-៤​ដងក្នុងមួយថ្ងៃនៅពេលថ្ងៃ និង ១-២ដងក្នុងមួយយប់​ នៅពេលយប់ការធ្វើបែបនេះរហូតដល់២០-២១ថ្ងៃទើបកូនមាន់ញាស់។

៤. ការថែទាំកូនមាន់

ពេលកូនមាន់ញាស់ គាត់បានចាប់ដាក់ចូលក្នុងទ្រុងបំបែកភ្លាម និងយកកូនមាន់ដាក់ហាលថ្ងៃឬក្នុងកេសដើម្បីឲ្យឆាប់ស្ងួតរោម និងដៃជើងឆាប់រឹងមាំ។ នៅពេលយប់ គឺគាត់បានធ្វើកេសដែលមានដាក់អង្កាមសម្រាប់ឲ្យកូនមាន់ចូលដេក និងដុតភ្លើងកំដៅក្នុងក្អមរាល់យប់ (ប្រើធ្យូងនិងចោះក្អមរន្ធតូចៗ)។

៥. ចំណី និងទឹក

មាន់តូចអាយុពី២-៤៥ថ្ងៃ ដាក់ចំណីទិញពីផ្សារឲ្យស៊ី ចំពោះមាន់ធំគាត់ដាក់ចំណីផ្សំចម្រុះលាយឲ្យស៊ីដែលរួមមានដូចជាកន្ទក់​​ ស្រូវត្រាំឲ្យដុះពន្លក ចុងអង្ករ បន្លែបៃតង (ស្ពៃ​ ផ្ទី កំប្លោក ចក ត្រកួន ដើមចេកជាដើម) ដោយបុកលាយច្របល់ជាមួយបបរក្បាលត្រី ដាក់ឲ្យមាន់ស៊ី ១ថ្ងៃ៣ដង (ព្រឹក ថ្ងៃត្រង់ និងល្ងាច) ព្រមទាំងដាក់ទឹកស្អាតឲ្យផឹកជាប្រចាំរាល់ថ្ងៃ។

៦. ការការពារ និងព្យាបាល

កូនមាន់ញាស់បានអាយុចន្លោះ ១-៧ថ្ងៃ​ បន្តក់វ៉ាក់សាំងញ៉ូកាសប្រភេទមេឌីវ៉ាក់ អាយុចន្លោះ១០-១៤ថ្ងៃជួសអុត អាយុចន្លោះ ២១-២៧ថ្ងៃបន្តក់រំលឹកវ៉ាក់សាំងញ៉ូកាស​ប្រភេទមេឌីវ៉ាក់ និងអាយុចន្លោះ ៣០-៤០ថ្ងៃ ទម្លាក់ព្រូនដោយប្រើថ្នាំឡឺវ៉ាមីសុល។

៧.​ទីតាំរៀបចំទ្រុង​ និងការរៀបចំទ្រុង

គាត់បានសង់ទ្រុងចិញ្ចឹមមាន់លើទីធ្លាទំហំ ១០មX៤០ម ដែលជាទីទួលមិនលិចទឹកនៅរដូវវស្សា និងនៅក្រោមដើមឈើធំៗកន្លែងមានម្លប់ និងប្រើសំណាញ់ហ៊ុមព័ទ្ធជុំវិញទីធ្លារចិញ្ចឹមមាន់។ ទ្រុងមាន់ដែលគាត់បានសង់ចំនួន​៣ទ្រុង ហើយរៀបចំឲ្យដាច់ពីគ្នា និងមានទំហំផ្សេងៗគ្នា៖

  • ទី១. ទ្រុងសម្រាប់មេពងធ្វើពីបង្គោលឈើ និងរនាបឫស្សី ដំបូលប្រក់ស្លឹកត្នោត​មានទំហំ ៤មX៦ម   កំពស់ ២,៥ម៉ែត្រ និងព័ទ្ធសំណាញ់ជុំវិញ
  • ទី២. ទ្រុងសម្រាប់មាន់សាច់ ធ្វើអំពីបង្គោលឈើ រនាបឫស្សី ដំបូលប្រក់ស្លឹកត្នោត​ មានទំហំ​ ៣មX៤ម​កំពស់​២,៥ម៉ែត្រ និងព័ទ្ធសំណាញ់ជុំវិញ
  • ទី៣. ទ្រុងបំបែកកូនមាន់មាន ៦ទ្រុង​ធ្វើអំពីជំរាកឈើ និងហ៊ុមព័ទ្ធសំណាញ់ដែក បណ្តោយ ០,៥មទទឹង១ម ​កំពស់​០,៧ មាន២បន្ទប់។

៨. លទ្ធផលទទួលបាន

ក្រោយពីចាប់ផ្តើមភ្ញាស់កូនមាន់លក់មក គាត់សង្កេតឃើញថា ក្នុងឆ្នាំ២០១៣ មាន់របស់គាត់មិនដែលជួបបញ្ហាដូចជាក្រិន ឬឈឺងាប់ឡើយ​ ហើយសម្រាប់ប្រាក់ចំណូលវិញកើនឡើងហួសពីការស្មាន ហើយអ្វីដែលកាន់តែប្រសើរនោះ គឺគាត់មានឈ្មួញមកទិញកូនមាន់តួចៗ ទិញទូរសម្រាប់ភ្ញាស់ពង និងទ្រុងបំបែកកូនមាន់ដល់ៗផ្ទះ ដែលជួយបង្កើនប្រាក់ចំណូលបានកាន់តែច្រើនសម្រាប់គ្រួសាររបស់គាត់មួយកម្រិតទៀត។

ប្រាក់ចំណូលពីការលក់មាន់សាច់ និងកូនមាន់

ថ្ងៃ ខែ ​ឆ្នាំ

ចំណូលពីការលក់មាន់ (រៀល)

ចំណាយលើចំណី (រៀល)

 

 

 

 

 

ចំណេញពីការលក់មាន់

០៣/២០១៣

លក់មាន់សាច់ ១២៥.០០០

៧០.០០០៛

០៦/២០១៣

លក់មាន់សាច់

៧០.០០០

២១០.០០០៛

លក់កូន

៥៦០.០០០

០៧/២០១៣

លក់មាន់សាច់ ៣៦០.០០០ ៧២.០០០៛
លក់កូន

១៩២.០០០

០៨/២០១៣

លក់មាន់សាច់ ៤៤.០០០ ២៧០.០០០៛
លក់កូន

២៥៦.០០០

០៩/២០១៣

លក់មាន់សាច់ ៩៦.០០០ ៣០.០០០៛
លក់កូន

៣១១.៣០០

១១/២០១៣

លក់កូន ២០០.០០០
១២/២០១៣ លក់កូន

៧០.០០០

ចំណូល-ចំណាយ=​ចំណេញ

.២២១.៣០០ ៧០៧.០០០

.៥១៤.៣០០

ប្រាក់ចំណូលពីការលក់ទូភ្ញាស់ពងមាន់ និងទ្រុងកូនមាន់

សម្ភារៈ

ចំណូល (រៀល) ចំណាយ (រៀល) ចំណេញ (រៀល)

ធ្វើទូភ្ញាស់ ៣០

៣០ X ១២០.០០០

= ៣.៦០០.០០០

៣០ X ៦៥.០០០

= ១.៩៥០.០០០

១.៦៥០.០០០

ធ្វើទ្រុងបំបែកកូនមាន់​ ២៤

២៤ X ៤៥.០០០

= ១.០៨០.០០០

២៤ X ២៥.០០០​

= ៦០០.០០០

៤៨០.០០០

សរុប .៦៨០.០០០ .៥៥០.០០០

.១៣០.០០០

៩. ចំណាប់អារម្មណ៍

បន្ទាប់ពីគាត់បានធ្វើការបូកសរុបចំណូលចំណាយប្រចាំ ឆ្នាំមក ​គាត់សង្កេតឃើញថា ការដែលធ្វើទូភ្ញាស់ពងមាន់វាមានភាពងាយស្រួល  និងញាស់បានច្រើនជាងភ្ញាស់ដោយមេផ្ទាល់ ហើយចំណុចដែលល្អទៀតនោះ គឺការលក់កូនតូចៗចំណេញជាងការលក់មាន់ធំ ពីព្រោះការដែលយើងលក់មាន់តូច ចំណាយអស់ចំណីតិចដោយលក់បានតម្លៃ ៤.០០០រៀលក្នុងមួយក្បាល (កូនមាន់ធ្វើវ៉ាក់សាំងរួច)  ធៀបនឹងមាន់ធំដែលលក់បានតម្លៃ ១៣.០០០-១៥.០០០រៀល ១គីឡូក្រាម។ ដូចនេះនៅឆ្នាំក្រោយ​គាត់នឹងខិតខំអនុវត្តការភ្ញាស់កូនមាន់សម្រាប់លក់​ ព្រមទាំងជួយផ្សព្វផ្សាយនូវបច្ចេកទេសបន្តដល់កសិករ ដែលនៅជុំវិញគាត់ឲ្យចេះភ្ញាស់ពងមាន់ និងលក់កូនដូចគាត់ដែរ។

សរុបបច្ចេកទេសភ្ញាស់ពងមាន់

  • រៀបចំទូភ្ញាស់ពីកេសស្នោ ពីឈើ និងពីអាលុយមីញ៉ូម
  • រៀបដាក់ពងមាន់ភ្ញាស់ក្នុងមួយទូចំនួន ​៨០ ទៅ ៨៥គ្រាប់
  • ផ្តល់កំដៅក្នុងទូដោយមានដាក់ចង្កៀង
  • ជួយបង្វិលពងមាន់បន្ថែម ​៣ ទៅ ៤ដង ក្នុងមួយថ្ងៃ
  • ថែទាំកូនមាន់ញាស់ដោយចាប់ដាក់ទ្រុងបំបែកភ្លាមៗ ក្រោយពេលភ្ញាស់
  • យកកូនមាន់ទើបនឹងញាស់ដាក់នៅក្នុងកេសដើម្បីផ្តល់កំដៅ
  • ផ្តល់ចំណីដល់កូនមាន់ក្រោយពេលញាស់បាន ១ថ្ងៃ
  • រៀបចំទ្រុងសំរាប់មាន់ធំ ដោយមានបង្គងសំរាប់ជាន់សមស្រប
  • ផ្តល់ចំណីទៀងទាត់ដល់មាន់ឲ្យឆាប់ធំ៕

ឈឿង ចាន់ថុល

សហគមន៍សម្បូរសប្បាយ

Loading...

អំពី sambosabay

Avatar
សហគមន៍សម្បូរសប្បាយ (ស៣) គឺជាសហគមន៍ដែលមានប្រជាពលរដ្ឋនៅមូលដ្ឋានចេះសហការរួបរួមជួយគ្នាទៅវិញទៅមកឲ្យចេះដាំដុះ និងចេះផលិតដើម្បីទប់ស្កាត់ផលិតផលនាំចូលពីខាងក្រៅរួចឈានទៅរកការនាំចេញទៅក្រៅប្រទេសវិញធ្វើឲ្យសកម្មភាពសេដ្ឋកិច្ច សង្គមកិច្ច កសិ​-កម្ម សិប្បកម្ម ពាណិជ្ជកម្ម វប្បធម៌និងបរិស្ថាននៅមូលដ្ឋានរស់រវើក និង មានការអភិវឌ្ឍនៅមូលដ្ឋានប្រកបដោយភាពរុងរឿង។ ​

អត្ថបទពាក់ព័ន្ធ

បទពិសោធន៍ដាំសណ្តែកកួរដោយគ្របថង់ប្លាស្ទិក

លោកពូ ស៊ាង ថន ជាកសិករសហការជាមួយអង្គការសេដាក រស់នៅភូមិក្រសាំងទង​ ឃុំអង្គររាជ្យ ស្រុកព្រះស្តេច ខេត្តព្រៃវែង។ គាត់ជាមនុស្សដែលស្រឡាញ់ការដាំដុះ​ហើយគាត់តែងតែសាកល្បងនូវគំនិតថ្មីជានិច្ច។នៅពេលនេះយើងសូមលើកយកបទពិសោធន៍ដាំសណ្តែកកួរដោយប្រើថង់ប្លាស្ទិក មកបង្ហាញជូនដែលជាគំនិតសាកល្បងរបស់គាត់ដែលបានទទួលពីស្ថានីយពិសោធន៍ពូជបន្លែនៅក្បាលកោះ។