ថ្នាំស្នេហ៍ (សម្លាប់) សត្វស្រាំង

សត្វស្រាំង គឺជាសត្វល្អិតមួយប្រភេទដែលមានជើង៦ និងមាន​ស្លាប​ពីរហើរ​បាន។ សត្វនេះបើសិនវាទៅទិច​ផ្លែឈើ ព្រមទាំងផ្លែដំណាំ​មួយចំនួន គឺ​ផ្លែ​នោះ​នឹងស្អុយ រួចមានដង្កូវជាមិនខានឡើយ។ ផ្លែទាំងអស់នោះ មានដូច​ជា ផ្លែ​ស្វាយ ផ្លែម្ទេស ផ្លែម្រេះ… ធ្វើឱ្យយើងខាតបង់ផលដំណាំ ជាពិសេស​​ចំពោះ​​ប្រជាកសិករ។ សត្វស្រាំង គឺមានរូបរាងដូចបង្ហាញនៅក្នុងរូបភាពនៅ​ខាង​ស្តាំ​នៃ​អត្ថបទ​នេះ។

ដើម្បីកាត់បន្ថយ ឬបំបាត់សត្វស្រាំងចង្រៃនៅក្នុងសួនដំណាំរបស់លោកអ្នក មានថ្នាំគីមីមួយប្រភេទដែលមានឈ្មោះ​ថា VIZUBON-D ជាផលិ​តផលរបស់ប្រទេសវៀតណាម មួយ​ប្រអប់មានពីរកូនដប ដូចបានបង្ហាញនៅក្នុងរូបទី៣ខាងក្រោមនេះ (រាប់ពី​ឆ្វេង​ទៅស្តាំ) ដែល​កសិ​ករ​ខ្មែរ និងអ្នកលក់ថ្នាំនេះហៅថា ថ្នាំស្នេហ៍ស្រាំង។ ថ្នាំស្នេហ៍ស្រាំងនេះក៏អាចប្រទេសផ្សេងៗទៀតផលិតផងដែរ។

លោក កឹម ផុន ជាកសិកររស់នៅភូមិស្វាយតាភ្ល ឃុំបាសាក់ ស្រុកស្វាយជ្រំ ខេត្តស្វាយរៀង ដែលបានប្រើថ្នាំនេះ បានឱ្យដឹងថា នៅ​ពេលគេបំពុលសម្លាប់​សត្វ​ស្រាំង គឺគេយកទឹកថ្នាំទាំងពីរដបនេះមកលាយជាមួយគ្នាទៅតាមតម្រូវការតិច ឬ​ច្រើន បន្ទាប់ មកយកសំឡី ឬចំរៀកក្រណាត់តូចៗមកជ្រលក់ទឹកថ្នាំដែលបានលាយរួចនោះ ហើយយក​ទៅ​ដាក់​នៅបាតដបប្លាស្ទិកដែលកាត់ពាក់កណ្តាល ឬដបប្លាស្ទីកដែលបានចោះរន្ធចាប់ពីពីរឡើងទៅល្មមឱ្យសត្វស្រាំងចូលបាន។ យកល្អគឺព្យួរសំឡី ឬក្រណាត់នោះ នៅក្នុងដបផ្នែកខាងលើ (សូមមើលរូបភាពខាងក្រោម) រួចហើយ​យកដបប្លាស្ទិកនោះទៅដាក់នៅក្បែរ ឬក៏ចងព្យួរនៅនឹង មែកដើមឈើ ​ឬដំណាំ ឬបង្គោលឈើនៅក្បែរ​ដំណាំនោះក៏បាន​។ ថ្នាំ​នេះមានប្រសិទ្ធភាពណាស់ គឺក្លិនរបស់វាទាក់ទាញដូចដាក់ស្នេហ៍ឱ្យសត្វស្រាំងមក ហើយវាហើរចូលទៅក្នុងដបប៊ឺតជញ្ជាក់យករសជាតិថ្នាំនេះ រួចវានឹងងាប់នៅក្នុងដបប្លាស្ទិកនោះជាមិនខានឡើយ។ សូមបញ្ជាក់ជាថ្មីថា ថ្នាំស្នេហ៍ស្រាំងនេះ គឺគេមិនយកទៅបាញ់នៅលើដើមឈើ ឬ/និងដំណាំនោះទេ គេ​យកសំឡី ឬក្រណាត់ មកជ្រលក់ល្បាយថ្នាំស្នេហ៍ស្រាំង រួចហើយយកទៅដាក់នៅក្នុងដបប្លាស្ទិក បន្ទាប់មកយកដបប្លាស្ទិកនោះទៅដាក់ ឬចងនៅក្បែរដើមឈើ ឬបង្គោលនៅក្បែរដំណាំ។ ដូច្នេះជាតិពុលនៃថ្នាំពុលគីមីនេះ មិនប៉ះពាល់ដល់ផ្លែឈើ និងដំណាំទេ។ ថ្នាំនេះមានលក់នៅកន្លែងលក់សំភារៈកសិកម្មមួយចំនួន៕

ដោយលោក ប៉ោ សេដ្ឋា

សហគមន៍សម្បូរសប្បាយ