Home / កសិកម្ម / បទពិសោធន៍ចិញ្ចឹមមាន់ (កសិករ រិន សារិទ្ធ)

បទពិសោធន៍ចិញ្ចឹមមាន់ (កសិករ រិន សារិទ្ធ)

ទិដ្ឋភាពទ្រុងចិញ្ចឹមមាន់

កសិករ រិន សារិទ្ធ រស់នៅភូមិប្រវ៉ាល់ ឃុំតាយ៉ែក ស្រុកសូទ្រនិគម ខេត្តសៀមរាប។ គាត់មានបទពិសោធន៍ល្អក្នុងការចិញ្ចឹមមាន់ទទួលបានជោគជ័យ។ គាត់គឺជាកសិករសហការម្នាក់ ដែលបានចូលរួមរៀនសូត្រវគ្គខ្លីៗជាមួយអង្គការសេដាក ចាប់ពីឆ្នាំ២០១១ មកម្លេះ។ ដំបូងឡើយគាត់មានមេមាន់ត្រឹមតែ ២ និង បា១ក្បាល​ប៉ុណ្ណោះ។ សម្រាប់ប្រាក់ចំណូលពីការលក់មាន់ គឺមិនដែលបានលក់ សូម្បីតែហូបក៏មិនបានគ្រប់គ្រាន់ដែរ​។ ដោយសារខិតខំព្យាយាមមក​ដល់ដើមឆ្នាំ២០១៣ គាត់មានមាន់មេ ៥៥ និង បា ៩ក្បាល​។ ចំពោះបច្ចេក ទេសចិញ្ចឹមមានបង្ហាញជូនដូចខាងក្រោម៖

១. ការជ្រើសរើសទីតាំង

គាត់បានសាងសង់ទ្រុងចិញ្ចឹមមាន់ នៅលើទីធ្លាទំហំ ៣០x៣០ម ដែលជាដីទួលខ្ពស់មិនលិចទឹកនៅរដូវ​​វស្សានិង​ក្រោមដើមឈើធំៗ ជាកន្លែងមានខ្យល់ចេញចូលគ្រប់គ្រាន់ ហើយប្រើសំណាញ់ហុំព័ន្ធជុំវិញទីធ្លាចិញ្ចឹម។

២. ការសាងសង់ទ្រុង

ទ្រុងមាន់ដែលគាត់បានសង់ រៀបចំឲ្យនៅជាមួយគ្នាប៉ុន្តែខណ្ឌដាច់ពីគ្នា លើកលែងតែទ្រុងបំបែកកូនមាន់តូច​ៗ។

  • ទ្រុងធំ ១ (សម្រាប់មាន់ដេកនិងពង) ធ្វើអំពីបង្គោលឈើដំបូលប្រក់ដែកស័ង្កសី និងបិទបាំងទ្រុងដោយជំរៀកក្តារដែលមានបណ្តោយ ១៤ម, ទទឹង ៦ម, កំពស់ ៣.៥ម
  • ទ្រុងបំបែកកូនចំនួន ១២ទ្រុង ដែលធ្វើអំពីជំរៀកឈើ និងហុំព័ន្ធដោយសំណាញ់ជុំវិញ បណ្តោយ ១.៥ម, ទទឹង ១ម, កំពស់ ០.៥ម សម្រាប់ដាក់កូនមាន់។

៣​​. ការជ្រើសរើសពូជមាន់ចិញ្ចឹម

មាន់ដែលគាត់ជ្រើសរើសមកចិញ្ចឹមមានលក្ខណៈ មេពណ៌ចម្រុះ ជើងពណ៌លឿង មានទំងន់ចាប់ពី ១.៥គក្រឡើងទៅ ប្រវត្តិមិនធ្លាប់មានជំងឺ ពងច្រើន ពូកែថែកូន ស៊ីចំណីមិនរើស (ពូជមាន់ក្នុងស្រុក) ចំពោះបាវិញ គឺទិញពីខាងក្រៅភូមិ ដើម្បីការពារកុំឲ្យជាន់ឈាម មានទំងន់ ២.៥គក្រ រហ័សរហួន ពូកែជាន់មេ មានសុខភាពល្អ និងមិនមានប្រវត្តិឈឺ។

៤. ចំណី

  • មាន់តូចអាយុ ២-៣០ថ្ងៃ ដាក់ចំណីទិញពីទីផ្សារ
  • មាន់មានអាយុបាន ៣០ថ្ងៃឡើង និងមាន់មេ គាត់ដាក់ចំណីផ្សំចំរុះលាយឲ្យស៊ីមានដូចជា កន្ទក់ ស្រូវ​ត្រាំ ចុងអង្ករ អំបិល សំបកខ្ចៅខ្យង បន្លែបៃតង (ស្ពៃ ផ្ទីរ កំប្លោក ចក ត្រកួន) បុកលាយច្របល់ជាមួយ ក្បាលត្រីស្ងោរដាក់ឲ្យស៊ីរាល់ថ្ងៃ ១ថ្ងៃ៣ដង (ព្រឹក ថ្ងៃត្រង់ និងល្ងាច)។

៥. ការថែទាំ និងអនាម័យ

គាត់ឧស្សាហ៍បោសសំអាតទ្រុង មិនថាកន្លែងដេក សំបុកពង ទ្រុងបំបែកកូន គឺបោសសំអាតគ្រប់កន្លែង ក្នុងទីធ្លារាល់១អាទិត្យម្តង និងបង្វិលពងមាន់ពេលមេឃក្តៅខ្លាំងឲ្យបាន ១ថ្ងៃម្តង ព្រមទាំងធ្វើការស្រោចទឹកនៅលើទីធ្លាទ្រុងមាន់រាល់២ថ្ងៃម្តងដែរ ដើម្បីឲ្យត្រជាក់សម្រាប់មាន់ដើរលេង។ មិនតែប៉ុណ្ណោះ គាត់បានចាប់កូនមាន់ទើបញាស់ពីមេមកដាក់ក្នុងទ្រុងបំបែកភ្លាម និងមិនឲ្យស៊ីចំណីរយៈពេល២៤ម៉ោង ដាក់តែទឹកស្អាតឲ្យផឹក​។ ជាទូទៅគាត់បានយកកូនមាន់ដាក់ដេកក្នុងកេសពេលមេឃត្រជាក់ឃ្លាំង ដោយមានក្រាលអង្កាម និងដាក់ហាលថ្ងៃកូនមាន់ពេលព្រឹករយៈពេល ៣ម៉ោង (៧-១០ព្រឹក) ដើម្បីឲ្យមាន់លូតលាស់ និងធំលឿន។

៦. ចំណូលនិងចំណាយ

ថ្ងៃ ខែ ឆ្នាំ

ចំណូលពីការលក់មាន់ (រៀល) ចំណាយលើចំណី (រៀល)

ចំណេញសរុប (រៀល)

២៨/០៤/១៣ ៨.៥០០.០០០ ៥.៥១៤.០០០ ២.៩៨៦.០០០
០៦/០៦/១៣ ៨០០.០០០ ស៊ីចំណីចាស់ ៨០០.០០០
២០/០៨/១៣ ៩.៨០០.០០០ ស៊ីចំណីចាស់ ៩.៨០០.០០០
១០/០៩/១៣ ៣.៥៥០.០០០ ស៊ីចំណីចាស់ ៣.៥៥០.០០០
១០.២០១៣ ចំណាយធ្វើទ្រុងថ្មី

៤.៤០០.០០០

២២.៦៥០.០០០ ៩.៩១៤.០០០ ១២.៧៣៦.០០០
ចំណេញសរុប = ១២.៧៣៦.០០០

៧. ចំណាប់អារម្មណ៍

ចាប់ពីចិញ្ចឹមមាន់មកគាត់សង្កេតឃើញថា គ្រួសាររបស់គាត់ មានជីវភាពធូរធាជាងមុនឆ្ងាយណាស់ដោយសារគាត់អាចរកប្រាក់បានពីការលក់មាន់ទាំងនេះ គឺគិតត្រឹមថ្ងៃទី១១ ឆ្នាំ២០១៣ ដោយទទួលបាន ១៧.១៣៦.០០០រៀល និងចំនួនមាន់នៅសល់សម្រាប់ចិញ្ចឹមបន្តមាន មេចំនួន ៥៥ក្បាល, បា៩ក្បាល, មាន់សាច់៣០ក្បាល, មាន់តូច៦០ក្បាល។ ជារៀងរាល់ថ្ងៃគាត់មានការងារធ្វើច្រើនណាស់ ហើយឈប់ទៅរកស៊ីឈ្នួលគេដូចកាលមុនៗទៀត មិនតែប៉ុណ្ណោះគាត់ឈប់ព្រួយបារម្ភរឿងខ្វះម្ហូបដូចកាលពីមុនទៀត។ ចំពោះការលក់មាន់ទាំងតូច ទាំងធំ គឺគាត់មិនដែលយកទៅលក់ខ្លួនឯងទេ ពីព្រោះមានឈ្មួញគេមកទិញដល់ផ្ទះ ហើយជាពិសេសសម្រាប់លាមកមាន់វិញ គឺគាត់អាចយកទៅដាក់ដាំបន្លែសម្រាប់ហូប ឬដាក់លាយឲ្យមាន់ស៊ី និងយកទៅដាក់ស្រែបានយ៉ាងច្រើនថែមទៀត។

ដូចនេះនៅថ្ងៃខាងមុខ គាត់នឹងមានគម្រោងពង្រីកការចិញ្ចឹមមាន់ឲ្យមានទ្រង់ទ្រាយធំជាងនេះទៅទៀត ដើម្បីជួយបង្កើនប្រាក់ចំណូលបន្ថែមដល់គ្រួសាររបស់គាត់ឲ្យរិតតែមានជីវភាពប្រសើរឡើង ហើយជួយបង្រៀនដល់កសិករឲ្យចេះចិញ្ចឹមមាន់ និងរកប្រាក់ចំណូលបានដូចគាត់ដែរ។

សរុបបច្ចេកទេសសំខាន់ៗក្នុងការចិញ្ចឹមមាន់មាន៖

-ធ្វើរបងព័ន្ធទីធ្លាសម្រាប់ឲ្យមាន់ដើរ និងពង

-សង់ទ្រុងនៅក្នុងទីធ្លាសម្រាប់មាន់ដេក ពង និងទ្រុងបំបែកកូនមាន់

-ជ្រើសរើសពូជមាន់ចិញ្ចឹមឲ្យមានមេពណ៌ចំរុះ ជើងពណ៌លឿង ទំងន់ ១.៥គក្រ មិនមានជំងឺ

ពងច្រើន ពូកែថែកូន

-មាន់តូចឲ្យស៊ីចំណីផ្សារ មាន់ធំស៊ីចំណីចំរុះដែលផលិតខ្លួនឯង (ស្រូវ អង្ករ សំបកខ្យងខ្ចៅ និងបន្លែបៃតង)

– ថែទាំបោសសំអាតទ្រុង ស្រោចទឹកទីធ្លាមាន់ដើរ និងឧស្សាហ៍បង្វិលពងឲ្យឆាប់ញាស់ លាងស្នូកទឹក ស្នូកចំណី និងឧស្សាហ៍ប្តូរទឹកចេញ៕

ឈឿង ចាន់ថុល

សហគមន៍សម្បូរសប្បាយ

Loading...

អំពី

អត្ថបទពាក់ព័ន្ធ

បទពិសោធន៍ស្ទូងស្រូវ​ ប.វ.ស. ដោយគ្របចំបើង

បងស្រី វ៉ាត សុភី ជាកសិកររស់នៅភូមិដំរីឆ្លង ឃុំខ្នារពោធិ៍ ស្រុកសូត្រនិគម ខេត្តសៀមរាប។ គាត់បានសហការជាមួយអង្គការហ្រ្គេត នៅដើមឆ្នាំ២០១០ ទៅលើបច្ចេកទេស ប.វ.ស. នៅលើផ្ទៃដី ៨១អារ​ដោយប្រើពូជស្រូវផ្ការំដួលចំនួន១២គីឡូក្រាម។