Home / អាហារ និង សុខភាព / គុណប្រយោជន៍ត្រយូងចេក

គុណប្រយោជន៍ត្រយូងចេក

ត្រយូងចេក មានផ្ទុកសារធាតុហ្វាវូណូអ៊ីត ដែលជាសារធាតុសំខាន់ និងមានគុណប្រយោជន៍ ជាពិសេសសម្រាប់សុខភាពខ្លាំងណាស់។ ត្រយូងចេកត្រូវបានប្រជាពលរដ្ឋនៅអាស៊ី អាស៊ីអាគ្នេយ៍ អាស៊ីខាងត្បូង តំបន់កោះ យកមកប្រើប្រាស់ធ្វើជាមុខម្ហូបច្រើនមុខមាន ស្ងោរ ឆា ចំហុយ ហូបឆៅ…និងដោយសារតែភាពសម្បូរបែបផ្នែកអាហារូបត្ថម្ភ ត្រយូងចេកត្រូវបានពលរដ្ឋប្រទេសខ្លះ ប្រើជាឱសថធម្មជាតិ។ តាមទស្សនាវដ្តី បច្ចេកវិទ្យាជីវសាស្ត្រអាហ្វ្រិក គឺត្រយូងចេក ១០០ក្រាម (១ខាំ) មានផ្ទុក៖

– ថាមពល       ៥១ kcal                   – ហ្វូស្វ័រ           ៧៣,៣ មីលីក្រាម

– ប្រូតេអ៊ីន      ១,៦ ក្រាម               – ដែក             ៥៦,៤ មីលីក្រាម

– ជាតិខ្លាញ់     ០,៦ ក្រាម                – ស្ពាន់ធ័រ        ១៣ មីលីក្រាម

– ជាតិស្ករ        ៩,៩ ក្រាម                – ប៉ូតាស្យូម     ៥៥៣,៣ មីលីក្រាម

– សរសៃ          ៥,៧ fgof                  – ម៉ាញេស្យូម    ៤៧,៧ មីលីក្រាម

– កាលស្យូម    ៥៦ មីលីក្រាម           – វីតាមី E ១,០៧ មីលីក្រាម។

ត្រយូងចេក មានគុណប្រយោជន៍ជាច្រើនដូចជា សម្រួលរដូវស្រ្តី បង្កើនទឹកដោះ ព្យាបាលជំងឺខ្វះឈាម ជំងឺដំបៅក្រពះ ធានារ៉ាប់រងជួយតម្រងនោម សម្រួលការទល់លាមក បញ្ចុះសម្ពាធឈាម ពង្រឹងស្បូន…។

. ត្រយូងចេក និងស្ត្រី

សារធាតុបន្សំដ៏សម្បូរបែបរបស់ត្រយូងចេក អាចជួយបង្កើន និងបំប៉នសមត្ថភាពនៃក្រពេញទឹកដោះឱ្យ  ផលិតទឹកដោះក្នុងបរិមាណច្រើនជាងមុនដើម្បីបំបៅកូន។

ទទួលទានត្រយូងចេកឆ្អិនជាមួយទឹកដោះគោជូរ ឬហ្រ្វូម៉ាស្រស់១កែវក្នុងមួយថ្ងៃ នោះរដូវរបស់អ្នកនឹងធ្លាក់ក្នុងកំរិតសមរម្យ គឺមិនច្រើនហួសហេតុ ព្រោះត្រយូងចេកមានសារធាតុម៉្យាងដែលបង្កើនអ័រមូនប្រូស្ហេស្តេរ៉ូននេះឯង ដែលមានឥទ្ធិពលកាត់បន្ថយការចេញឈាមការធ្លាក់រដូវ។

ជាមួយនឹងសមត្ថភាពជួយបង្កើនជាតិអ័រមូនប្រូស្ហេស្តេរ៉ូន គឺត្រយូង​ចេកក៏ធ្វើឱ្យសុខភាពស្បូនរបស់ស្ត្រីមានភាពរឹងមាំ និងបញ្ចៀសមិនឱ្យមានរោគសញ្ញាដុះ Kyste (គីស) ហៅជាភាសាបច្ចេកទេសថា SOPK នៅក្នុងស្បូនបានទៀត។

. ត្រយូងចេក និងទឹកនោមផ្អែម

បើតាមការសិក្សាពិសោធន៍លើសត្វកណ្តុរ ផ្សាយក្នុងទំព័រកាសែត «Phytotherapy Research» កាលពីឆ្នាំ២០០០ ការទទួលទានសម្រង់សារធាតុត្រយូងចេក បានជួយកាត់បន្ថយកំរិតជាតិស្ករក្នុងឈាម និងបានបង្កើនកំរិតឈាមក្រហម។ អ្នកវិទ្យាសាស្ត្របានពន្យល់ថា មកពីត្រយូងចេកមានផ្ទុកសារធាតុដែកយ៉ាងច្រើនសន្ធឹកសន្ធាប់ ៥៦,៤ក្រាម ក្នុងត្រយូងចេក ១០០ក្រាម។ ដូច្នេះការទទួលទានត្រយូងចេកអាចជួយយើងក្នុងការទប់ស្កាត់​ជំងឺខ្វះឈាម។

ការសិក្សាមួយទៀតបានបង្ហាញថា កំរិតអាំងស៊ុយលីនរបស់អ្នកជំងឺទឹកនោមផ្អែម បានធ្លាក់ចុះគួរឱ្យកត់សំគាល់នៅពេលអ្នកជំងឺនោះទទួលទានសារធាតុចម្រាញ់ចេញពីត្រយូងចេក។ ថ្វីបើពេលនេះគេត្រូវការសិក្សាឱ្យបានស៊ីជម្រៅបន្ថែមទៀត ដើម្បីផ្តល់ជាភស្តុតាងបែបវិទ្យាសាស្ត្រត្រឹមត្រូវ ក្រុមអ្នកស្រាវជ្រាវបានលើកទឹកចិត្ត និងផ្តល់អនុសាសន៍ឱ្យអ្នកជំងឺទឹកនោមផ្អែមទាំងអស់ឧស្សាហ៍ និងជ្រើសរើសទទួលទានត្រយូងចេកជាអាហារឱ្យកាន់​តែញឹកញាប់តាមដែលអាចធ្វើទៅបាន។

. ត្រយូងចេក និងការបង្ការរោគ

ទល់លាមកជាបញ្ហាដែលមនុស្សគ្រប់រូប គ្រប់វ័យ​ អាចជួបប្រទះ។ ជាអាការៈដែលលំបាកបរិយាយ​​បំផុត ហើយបើចំពោះស្រ្តីមានផ្ទៃពោះវិញ ការទល់លាមកអាចជាបញ្ហាដ៏ធ្ងន់ធ្ងរខ្លាំង។​ ដូច្នេះសូមទទួលទានត្រយូងចេក ព្រោះវាជាជំនួយអាចការពារប្រព័ន្ធរំលាយអាហារ។ សារធាតុសរសៃដ៏សម្បូរបែបរបស់ត្រយូងចេក ជាសារធាតុដ៏សំខាន់និងចាំបាច់សម្រាប់សុខភាពរំលាយអាហារ ពោលគឺ សម្រួលការបន្ទោរបង់ ការបត់ជើងតូច បត់ជើងធំ។ត្រយូងចេកក៏អាចជួយយើងផងដែរ​ក្នុងការប្រយុទ្ធប្រឆាំង និងបង្ការជំងឺដោយការបង្ករោគ។ បើតាមការសិក្សាមួយចុះផ្សាយលទ្ធផលនៅក្នុងទស្សនាវដ្តី Journal of Chemical and Pharmaceutical Search សារធាតុចម្រាញ់ចេញពីត្រយូងចេកមានផ្ទុកបន្សំជាតិអេតាណុល អាចស្រូបយករាល់គ្រប់ពពួកបាក់តេរី ដែលពូកែឆ្លងនិងពង្រីកខ្លួននៅពេលចូលទៅក្នុងខ្លួនមនុស្សដូចជាពពួកបាក់តេរី E.Coli, Bacillus cereus និងBacillus subtilis ជាដើម​មានន័យថា ត្រយូងចេកអាចមានសមត្ថភាពការពារកុំឱ្យមានការបង្ករោគ អាចព្យាបាលដំបៅ ឬការរលាកនៅក្រពះ ពោះវៀន ដែលបង្កឡើងដោយមេរោគ។

ត្រយូងចេកក៏មានផ្ទុកយ៉ាងច្រើននូវសារធាតុម្យ៉ាងទៀត ដែលមានឈ្មោះថា ផ្លាវ៉ូនណូអីត។​ សារធាតុនេះ ជាអង់ទីអ៊ុកស៊ីដង់ ដ៏មានសក្តានុពលប្រយុទ្ធប្រឆាំងនឹងពពួកកោសិកាសំយោគ រប៉ាត់រប៉ាយអនាថា Radicaux  libre និងអាចជួយការពារកោសិកាខ្លួនប្រាណយើង ប្រឈមនឹងពពួកកោសិកាសំណល់ឯកាទាំងនោះ។

សូមបញ្ជាក់ថា ពពួកកោសិកាសំយោគនោះ ជាសំណល់ម៉ូលេគុលគីមីគ្មានលំនឺង ដែលវាសកម្មខ្លាំង   ណាស់។ ប្រតិកម្មខ្លះអាចបំផ្លាញកោសិកាល្អៗក្នុងខ្លួនយើងផង។ ប្រសិនបើមានពពួកកោសិកាសំយោគនេះច្រើន នៅក្នុងសរីរាង្គកាយ ឥទ្ធិពលរបស់វាអាចបង្ហាញឱ្យឃើញដោយផ្ទាល់ភ្នែក ដោយមនុស្សនោះនឹងឆាប់ចាស់ ស្បែកឆាប់ជ្រីវជ្រួញ។ ចំណែកឥទ្ធិពលមើលមិនឃើញផ្ទាល់ភ្នែកវិញ គឺកោសិកាសំយោគជាភ្នាក់ងារបង្កជំងឺដ៏កាចសាហាវ ដូចជាជំងឺមហារីក ជំងឺបេះដូង ជំងឺប្រព័ន្ធប្រសាទធ្លាក់ចុះខ្សោយ ​ជំងឺវង្វេងវង្វាន់​ ឬងាយមានប្រតិកម្មពុលនឹងថ្នាំពេទ្យ។

ហេតុដូច្នេះហើយ បានជាការទទួលទានត្រយូងចេកច្រើន អាចជួយការពារអ្នកពីជំងឺមហារីក ពីជួយបញ្ចុះសម្ពាធឈាមខ្ពស់ឱ្យមកនៅទាប។ ជាចុងក្រោយជាមួយនិងកំរិតជាតិម៉ាញេស្យូមជាង ៤៧,៧ក្រាមក្នុងត្រយូង​ចេក ១០០ក្រាម ត្រយូងចេកក៏អាចមានឥទ្ធិពលល្អលើអារម្មណ៍របស់អ្នក។ ត្រយូងចេកជាអាហារដ៏ប្រពៃ​សម្រាប់​អ្នកមានជំងឺធ្លាក់ទឹកចិត្ត ឬចង់មានអារម្មណ៍ធូរស្បើយ។

. ការទទួលទានត្រយូងចេក

សូមអស់លោក អ្នកនាង ទទួលទានត្រយូងចេកតាមការចូលចិត្ត ស្ងោរ ឆា ម្ជូរ ញាំភ្លា តាមទម្លាប់ប្រពៃណី ឬតាម​បែប​បរទេស ជាការី ជាល្បាយជាមួយទឹកដោះគោជូរ កាន់តែញឹកញាប់គឺកាន់តែប្រសើរ៕

លោក ប៉ោ សេដ្ឋា

សហគមន៍សម្បូរសប្បាយ

Loading...

អំពី

អត្ថបទពាក់ព័ន្ធ

របៀបធ្វើ តាប៉ែខ្មៅ

តាប៉ែ គឺជាបង្អែមមួយប្រភេទ ដែលប្រជាជនខ្មែរមួយចំនួនចេះធ្វើ និងចូលចិត្តហូបតាំងពីយូរយារណាស់មកហើយ។ តាប៉ែ គឺមានតាប៉ែខ្មៅដែលធ្វើពីអង្ករដំណើមខ្មៅ និងតាប៉ែសដែលធ្វើពីអង្ករដំណើម​ស។ ស្ត្រីវ័យកណ្តាលម្នាក់ដែលធ្វើតាប៉ែលក់នៅរាជធានីភ្នំពេញឈ្មោះ រស់ សាវី បានប្រាប់អំពីរបៀបធ្វើតាប៉ែខ្មៅដូចខាងក្រោម។