បទពិសោធន៍ដាំប៉េងប៉ោះ

កសិករ ប្រាក់​ ច្រេស  រស់នៅភូមិតាសួន ឃុំត្រពាំងធំខាងជើង ស្រុកត្រាំកក់ ខេត្តតាកែវ គាត់មានបទពិសោធន៍ដាំប៉េងប៉ោះបានផ្លែច្រើន។ បទពិសោធន៍នេះបង្ហាញជូនដូចខាងក្រោម៖

ក. ការរៀបចំគ្រាប់ដាំ

មុនសាបគ្រាប់ គាត់ធ្វើការបណ្តុះគ្រាប់ជាមុនដោយយកគ្រាប់ទៅខ្ចប់ក្រណាត់ក្របួចឱ្យជាប់ ហើយដាក់ត្រាំទឹករយៈពេល ១យប់ និងផ្អាប់​១យប់ ដើម្បីឱ្យគ្រាប់បឺតទឹក ទើបយកគ្រាប់ទៅបណ្តុះក្នុងថ្នាល។

ខ. ការរៀបចំដីដាំ និងការដាំ

ក្នុងការរៀបដី គាត់ភ្ជួររាស់ ឬកាប់បំបែកដីឱ្យម៉ដ្ឋ ទើបរៀបចំលើកជារង។ ក្នុងការរៀបចំដីដាំនេះវាអាស្រ័យទៅតាមរដូវ។ នៅរដូវវស្សា គាត់រៀបចំរងដែលមានទទឹង០,៥ម៉ែត្រ ​និងបណ្តោយទៅតាមស្ថានភាពដី។ នៅលើរងគាត់កាប់ដីជារណ្តៅចុះក្រោមពី ២ ទៅ ៣ចប បន្ទាប់មកពូនជារាងខ្នងអណ្តើកទើបយកចបជីកដាំ។ ចន្លោះពីដើមមួយទៅដើមមួយកន្លះម៉ែត្រ និងចន្លោះពីរងមួយទៅរងមួយ ៨តឹក។

រដូវប្រាំង គាត់លើករងដាំដូចនៅរដូវវស្សាដែរ ប៉ុន្តែការជីករណ្តៅដាំខុសគ្នាដោយជីកជារាងកំពែង(មានជីកចង្អូរជុំវិញ ដាំសំរាប់ឱ្យទឹកដក់នៅពេលស្រោច)។ នៅចន្លោះដើមប៉េងប៉ោះ គាត់ដាំដំណាំចម្រុះផ្សេង​ៗទៀតដូចជា ម្រះព្រៅ ស្លឹកខ្ទឹម ជីនាងវង និងផ្កាដែលមានពណ៌ស្រស់ៗ ដើម្បីទាក់ទាញសត្វមានប្រយោជន៍ដូចជាឃ្មុំជាដើម។ មុននឹងគាស់កូនប៉េងប៉ោះពីថ្នាលដាំ គាត់ស្រោចទឹកលើថ្នាលឱ្យជោគសិន។ការគាស់កូនដាំត្រូវធ្វើនៅពេលល្ងាចដើម្បីកុំឱ្យអន់ដើម។

គ. ការប្រើគំរបគ្របគល់ដំណាំ

បន្ទាប់ពីស្ទូងកូនហើយ​​ គាត់ប្រើគំរបគ្របលើគល់ដំណាំទាំងនៅរដូវប្រាំងនិងរដូវវស្សា។ ចំពោះរដូវ​វស្សា​ គាត់ប្រើគំរបដើម្បី ការពារដំណក់ទឹកភ្លៀងខ្ទាតដីមកលើបណ្តូលប៉េងប៉ោះ ធ្វើឱ្យបណ្តូលរួញ។ ប៉ុន្តែត្រូវឧស្សាហ៍ប្រមូលគំរបចេញនៅពេលមានពន្លឺថ្ងៃ ដើម្បីកុំឱ្យដំណាំជាំទឹកខ្លាំង ដែលអាចបណ្តាលឱ្យមានជំងឺផ្សិត។ ចំណែករដូវប្រាំង គាត់ប្រើគំរបគ្របគល់ដំណាំ ដើម្បីរក្សាសំណើមក្នុងដី។

ឃ. ​ការដាក់ជី

ចំពោះការដាក់ជី គាត់បានយកប្រភេទជីដែលបានពុកផុយរលួយដូចជាជីកំប៉ុស្ត ជីលាមកសត្វពុកផុយ និងជីដែលនៅស្រទាប់ដីផ្នែកខាងលើដាក់លាយបញ្ចូលគ្នា។ ​នៅពេលដាំ គាត់ដាក់ជី ១បង្គីសំរាប់ ៣  រណ្តៅ ជីបំប៉នគាត់ដាក់ក្រោយពីដាំបានរយៈពេល ២០-២៥ថ្ងៃ ដោយជ្រុំគល់ដាក់ជីបន្ថែម ដើម្បីជួយដល់ ការលូតលាស់របស់ដំណាំ ដោយ១គុម្ពដាក់កន្លះបង្គី។ លុះដល់ប៉េងប៉ោះអាយុ ៥០ថ្ងៃ គាត់ជ្រុំគល់ដាក់ជី មួយសារទៀតសំរាប់ជំនួយដល់ការលូតលាស់របស់ផ្លែឱ្យថ្លោសធំល្អ និងមានរសជាតិឆ្ងាញ់។

ង. ​ការស្រោចទឹក

      រដូវប្រាំងត្រូវស្រោចទឹកមួយថ្ងៃ២ដង​ ព្រឹក និងល្ងាច។ ចំពោះរដូវវស្សាយើងស្រោចម្តងៗនៅពេលគ្មានភ្លៀង (រាំង)។ ជាពិសេសនៅពេលប៉េងប៉ោះចេញផ្កាត្រូវផ្តល់ទឹកឱ្យបានគ្រប់គ្រាន់ ដើម្បីឱ្យមានផ្លែច្រើន និងធំល្អ។

ច.ការដោតជ្រលង់

គាត់ប្រើឫស្សី​ ដើមអង្គារដីតូចៗ ធ្វើជាជ្រលង់ដោត នៅពេលដែលប៉េងប៉ោះមានអាយុ ​២០ថ្ងៃ ក្រោយពីដាំដើម្បីទប់ដើមកុំឱ្យដួលនៅពេលប៉េងប៉ោះផ្លែ គឺជៀសវាងការខាតបង់ទិន្នផល។ យើងបន្តធ្វើការថែទាំរហូតដល់ប៉េងប៉ោះអាយុ ៣-៤ខែ ពេលនោះប៉េងប៉ោះនឹងមានផ្លែរហូត ប៉ុន្តែទំហំផ្លែតូចជាងមុន។

ឆ. ការថែរក្សាទុកពូជ

ពូជដែលគាត់ដាំនេះ​មានប្រភពទិញមកពីផ្សារ ដោយគាត់ទិញផ្លែប៉េងប៉ោះដែលទុំ​និងធំល្អមករក្សាទុកដាំបន្តរហូត។ ​នៅពេលទុកពូជ​​  គាត់ជ្រើសរើសយកប្រភេទផ្លែដែលទុំនៅសារទី២​  ដោយរក្សាទុកឱ្យទុំ​ នៅនឹងដើមចាំបេះវាយកមកទុក។ ការទុកដាក់នៅពេលបេះមក គាត់ច្របាច់យកតែគ្រាប់​លាងទឹកឱ្យស្អាត ហាលថ្ងៃឱ្យស្ងួត (ថ្ងៃស្រទន់) ទើបខ្ចប់ក្រណាត់ចងព្យួរថែរក្សាទុក។

ជ.ការប្រមូលផល

ការប្រមូលផល គាត់ចាប់ផ្តើមតាំងពីប៉េងប៉ោះអាយុ​១ខែឡើងទៅ។​គាត់ប្រមូលផលបាន​៥សារក្នុងមួយសារៗបានពី ៣០​ទៅ៣៥គីឡូក្រាម នៅលើផ្ទៃដី ៥០ម៉ែត្រការ៉េ។ ផលដែលបានមក ក្រៅពីទុកហូបចុកក្នុងគ្រួសារ​គាត់លក់នៅទីផ្សារ។

សរុបមក បទពិសោធន៍ល្អៗក្នុងការដាំប៉េងប៉ោះមាន៖

• មុនសាប បណ្តុះគ្រាប់ ដោយយកក្រណាត់ក្របួចចងឱ្យជាប់ ដាក់ត្រាំទឹក១យប់ ផ្អាប់១យប់
• ភ្ជួរដីឱ្យបានផុស និងជ្រៅល្អ
• រដូវវស្សា ជីករណ្តៅដាំជាកំពែងជុំវិញ ដើម្បីឱ្យទឹកដក់នៅពេលស្រោច
• មុនគាស់កូនប៉េងប៉ោះពីថ្នាលសាប ត្រូវស្រោចទឹកលើថ្នាលឱ្យជោគសិន
• ការគាស់កូនដាំ ត្រូវធ្វើនៅពេលល្ងាច ដើម្បីកុំឱ្យអន់ដើម
• ដាំដំណាំចំរុះ​ ដែលមានក្លិននៅចន្លោះដើមប៉េងប៉ោះ ដូចជា ម្រះព្រៅ ស្លឹកខ្ទឹម ជីនាងវង ផ្កា ដើម្បីទាក់ទាញសត្វល្អិត​ដូចជា ឃ្មុំ​ និងបណ្តេញសត្វចង្រៃផង
• ប្រើគំរបគ្របគល់ដំណាំទាំងរដូវប្រាំង​ និងរដូវវស្សា
• ប្រើជីធម្មជាតិ ដូចជា កំប៉ុស្ត​​ លាមកសត្វពុកផុយ និងជីដែលនៅស្រទាប់ដីផ្នែកខាងលើ​​ ដាក់នៅពេលដាំ​ និងដាក់បំប៉ន
• នៅរដូវប្រាំងផ្តល់ទឹកឱ្យបានគ្រប់គ្រាន់ ជាពិសេស​ នៅពេលប៉េងប៉ោះចេញផ្កា
• ប្រើជ្រលង់ដោតនៅពេលប៉េងប៉ោះមានអាយុ ២០ថ្ងៃ​ក្រោយពីដាំ
• ធ្វើការថែទាំដាក់ជីរហូតដល់ប៉េងប៉ោះមានអាយុ ៣-៤ខែ ដើម្បីឱ្យផ្លែមានបន្តរហូត៕

សហគមន៍សម្បូរសប្បាយ