Home / កសិកម្ម / ស្វែងយល់អំពីស្រឹងជញ្ជក់ទឹកដោះ

ស្វែងយល់អំពីស្រឹងជញ្ជក់ទឹកដោះ

ដំណាំស្រូវ តែងជួបប្រទះការបំផ្លាញដោយស្រឹងជញ្ជក់ទឹកដោះ ជាពិសេស នៅវគ្គស្រូវដាក់ទឹកដោះ។ដូច្នេះយើងគួរដឹងអំពីវដ្តជីវិត​ រោគសញ្ញា​ ការបំផ្លាញ និងវិធានការណ៍ការពារមួយចំនួនដើម្បីទប់ទល់ទៅលើវា។

១.វដ្តជីវិត  ស្រឹងពេញវ័យតែងតែមានពណ៌ត្នោត ដងខ្លួនរបស់វារាងទ្រវែង ហើយមានជើងវែង និងអង់តែនក៏វែងដែរ។ ពងរបស់វារៀបគ្នាជាជួរស្ថិតនៅលើស្លឹក និងកួររបស់ស្រូវ​។ សត្វស្រឹងមានក្លិនពិបាកទ្រាំណាស់ ព្រោះក្លិនរបស់វាឆ្អេះឆ្អាបខ្លាំង។ មេស្រឹង១ក្បាលពងបានពី១០-២០ ក្នុងមួយលើកៗ។ ជាទូទៅ កូនស្រឹងទើបញាស់មានពណ៌បៃតងខ្ចី​​​​ និងមេចំណាស់របស់វា មានរាងទ្រវែងពណ៌បៃតងចាស់នៅផ្នែកខាងក្រោម និងផ្នែកខាងលើមានពណ៌បៃតងត្នោត។

 

២.រោគសញ្ញាបំផ្លាញ  ជាទូទៅ​សត្វស្រឹងជញ្ជក់ទឹកដោះ វាចាប់​ផ្តើមបំផ្លាញនៅពេលព្រឹកព្រលឹម និងពេលថ្ងៃរសៀលជាពិសេសនៅ  ​​ពេលមេឃត្រជាក់។ ការបំផ្លាញវា​ធ្វើឲ្យគ្រាប់ស្រូវស្កក ហើយនៅលើគ្រាប់ស្រូវ យើងអាចសង្កេតឃើញស្នាមបំផ្លាញរបស់វាដូចគេយកម្ជុលមកចាក់ ហើយតាមស្នាមនោះមានពណ៌អុចខ្មៅ។

៣.លក្ខណៈបំផ្លាញ  កូនទើបញាស់វា បឺតជញ្ជក់រុក្ខរសដើមស្រូវនិងស្លឹកស្រូវ។  មេចំណាស់របស់វា ស៊ីបំផ្លាញដោយចុចជញ្ជក់គ្រាប់ស្រូវនៅដំណាក់កាលដាក់ទឹកដោះ    ត្រង់ថ្នេរប្រសព្វរវាងសំបកខ្នង និងសំបកពោះ   ធ្វើឲ្យគ្រាប់ស្រូវមិនអាចដាក់គ្រាប់​ពេញ ។​  បើ​សិនសិនណាវាបំផ្លាញនៅដំណាក់កាលដាក់ម្សៅ គឺវាមិនអាចធ្វើឲ្យប៉ះពាល់ដល់ទិន្នផលស្រូវទេ តែវាអាចធ្វើឲ្យ​គ្រាប់​​អង្ករខូចគុណភាព។

៤.វិធានការណ៍ការពារ  និងទប់ស្កាត់ចាំបាច់មួយចំនួន

  • ប្រើស្បៃមុងអូស ដោយដើរតា​​​​​​​មទទឹងស្រែយឺតៗ ហើយឲ្យស្បៃមុងប៉ះជាមួយចុងស្រូវ ដើម្បី​បង្អើល បង្អើល​ឲ្យស្រឹងហើរចូលទៅក្នុងមុង។ បន្ទាប់មក យើងអាចប្រមូលសត្វស្រឹង ដែលនៅក្នុងមុងទៅ  ​​បុកលាយជាមួយនឹងទឹកសាប៊ូ រួចហើយបាញ់​ទៅលើស្រែវិញ
  • យកសំបកកង់ឡានគ្រប់ប្រភេទ ដុតបង្ហុយជុំវិញស្រែដោយឈរនៅខាងលើទិសខ្យល់បក់ ដើម្បីបណ្តេញ​​​សត្វស្រឹងឲ្យហើរចេញ
  • យកសាប៊ូក្រអូបលាយជាមួយទឹកបាញ់ទៅលើស្រូវ
  • យកម្ទេសហិល ១ កំប៉ុងទឹកដោះគោ បុកលាយជាមួយទឹក ១៧លីត្រ បាញ់ទៅលើស្រូវ
  • យករបស់ដែលមានក្លិន​ស្អុយ ឆ្អេះ ឆ្អាប ទៅចងព្យួរក្នុងស្រែ ដើម្បីទាក់ទាញវាអោយទៅស៊ីរបស់ទាំងនោះដូចជា មាន់ងាប់ ក្បាលត្រី។ល។

 

ប្រភព លឹម សុគន្ធដារុណ (អង្គការសេដាក) សត្វល្អិតបំផ្លាញដំណាំស្រូវសំខាន់ៗ ២០០៨

អំពី សេង រង្សី

សេង រង្សី
ខ្ញុំបាទ សេង រង្សី ជាអ្នករចនាគេហទំព័រ សហគមន៍សម្បូរសប្បាយ (ស៣) ហើយក៏ជាអ្នកសរសេរអត្ថបទសម្រាប់ការចែករំលែកនៅលើគេហទំព័រផងដែរ។

អត្ថបទពាក់ព័ន្ធ

ការធ្វើជីទឹកពីផ្លែឈើ

នៅពេលនេះ សហគមន៍សម្បូរសប្បាយ ផ្សព្វផ្សាយពីរបៀបធ្វើជីទឹក និងរបៀបប្រើប្រាស់ជីនេះ។ វត្ថុធាតុដើមដែលធ្វើជីទឹកនេះគឺផ្សំឡើងពីផ្លែឈើ និងមើមរុក្ខជាតិមានរសជាតិផ្អែម មានខ្លឹមសារដូចខាងក្រោម។