Home / កសិកម្ម / ជីវិត និងស្នាដៃរបស់កសិករ ផ្តើមចេញពីជីវិតនៅលើចុងគរ ឆ្ពោះទៅសេដ្ឋីស្រុកស្រែ

ជីវិត និងស្នាដៃរបស់កសិករ ផ្តើមចេញពីជីវិតនៅលើចុងគរ ឆ្ពោះទៅសេដ្ឋីស្រុកស្រែ

ការចូលរួមវគ្គបណ្ដុះបណ្តាផែនការ យុទ្ធសាស្ត្រស្វ័យហិរញ្ញវត្ថុ ២០១២-២០២២

ព្រៃកំពោង ជាឈ្មោះភូមិមួយរបស់ឃុំកាហែង ស្រុកសំរោងទង ខេត្តកំពង់ស្ពឺ ដែលមានចំងាយប្រមាណ ៥៦គីឡូម៉ែត្រពីទីក្រុងភ្នំពេញ។ ភូមិនេះមានសមាគមមួយឈ្មោះថា សមាគមពន្លឺរស្មីពេជ្រ កើតឡើងនៅថ្ងៃទី១៥ ខែសីហា ឆ្នាំ២០០៥ ដែលមានការគាំទ្រដំបូងពីអង្គការសេដាក។ ទោះ​បីគម្រោងអង្គការសេដាកបានបញ្ចប់តាំងពីឆ្នាំ២០០៩ក្តីយើងសង្កេតឃើញថា សមាគមកាន់តែរីកចម្រើនជាងមុនទៅទៀត​។តារាងខាងក្រោម បង្ហាញពីគម្លាតនៃភាពរីកចម្រើនរបស់សមាគមការចាប់ផ្តើមដំបូង និងបច្ចុប្បន្ន។ សមាគមការចាប់ផ្តើមដំបូង និងបច្ចុប្បន្ន។

 

 

ល.រ.

ចំណុចវាស់វែង

ការចាប់ផ្តើមដំបូង

ស្ថានភាពបច្ចុប្បន្ន

កំណត់សម្គាល់

ចំនួនគ្រួសារចូលសន្សំ

១៥គ្រួសារ

៧៥គ្រួសារ គ្រួសារក្នុងភូមិចូលសន្សំក្នុងសមាគមទាំងអស់

ចំនួនសមាជិកសន្សំ

១៥នាក់

៨៣នាក់

ទុនសន្សំសរុប

១៥០.០០០៛

១១.០០០.០០០៛

ទុនទ្រទ្រង់ ១០.០០០៛ ១២.០០០.០០០៛

ទុនទ្រទ្រង់ជាទុនរួមរបស់សមាគមប្រើប្រាស់សម្រាប់ផលប្រយោជន៍របស់សមាជិក

សមាគមអាចរីកចម្រើនបាន អាស្រ័យទៅលើធនធានមនុស្ស ជាពិសេសអ្នកជំហរនៅក្នុងភូមិដែលចេះសហការធ្វើការចង់ឲ្យភូមិខ្លួនឯងមានបម្រែបម្រួលជាវិជ្ជមាន ជាងនេះទៀត បុគ្គលដែលជាអ្នកដឹកនាំទាមទារនូវភាពជាគំរូចំពោះសមាជិករបស់ខ្លួន និង ការតាំងចិត្តខ្ពស់ឆ្ពោះទៅ​អនាគត ដែលប្រសើរជាងជីវភាពសព្វថ្ងៃ។

ឆ្លៀតឱកាសនៃការជួបជុំជាមួយតំណាងសមាគមកសិករនៅខេត្តកំពង់ស្ពឺ    ខ្ញុំបានឆ្លៀតពេលដើម្បី ជួបសំណេះសំណាលជាមួយបងប្រុស គច់ សាន ដែលជាប្រធានសមាគមពន្លឺរស្មីពេជ្រ។ គាត់បញ្ជាក់ថា ពេលនេះគាត់មានអាយុ ៥៣ឆ្នាំ មានកូន ៦នាក់ (បច្ចុប្បន្នកូន៣នាក់បានរៀបការរួច ហើយនៅសល់៣នាក់ទៀតក្នុងបន្ទុក)។ គាត់បានរៀបរាប់ពីការលំបាកមុនរៀបចំជាសមាគមថា ពីរនាក់ប្តីប្រពន្ធមានការលំបាកវេទនាក្នុងជីវភាពណាស់ មួយថ្ងៃៗជិះកង់ឌុបគ្នារកទិញផ្លែគរ។ ពេលថ្ងៃត្រង់ប្តីនៅលើចុងគរបេះផ្លែគរ ប្រពន្ធនៅក្រោមដើមគរដើម្បីជួយប្រមូលផ្លែគរច្រកបាវ។ មុខរបរនេះបានចំណូលតិចតួចបំផុត ហើយនឿយហត់ ហើយមានភាពប្រថុយប្រថានគ្រោះថ្នាក់ខ្ពស់។ គាត់ប្រកបមុខរបរនេះរយៈពេលពីរឆ្នាំ។

ការចែករំលែកបទពិសោធន៍ និងភាពរីក ចម្រើនសមាគមដល់កសិករខេត្តកំពង់ស្ពឺ

ដោយហេតុតែចង់មាន និង ការឈឺចាប់ការលំបាកក្នុងជីវិត គាត់បានចាប់អារម្មណ៍លើការផ្សព្វផ្សាយ និងបណ្ដុះ​ បណ្តាលពីការសន្សំប្រាក់របស់អង្គការសេដាក ដោយបបួលឲ្យអ្នកភូមិចូលរួម។ គាត់ពីរនាក់ប្តីប្រពន្ធឌុបគ្នាដោយកង់ចំងាយ ៣០គីឡូម៉ែត្រ ដើម្បីរៀនយកចំណេះធ្វើដូចម្តេចអាចសន្សំប្រាក់បាន? ធ្វើដូចម្តេចសន្សំប្រាក់ជាក្រុមបាន? ធ្វើដូចម្តេចសល់ប្រាក់ច្រើនសម្រាប់ទ្រទ្រង់ជីវភាព? ដោយបានយកនូវអ្វីដែលរៀនយកមកអនុវត្ត និងការកែលម្អជាប្រចាំធ្វើឲ្យសមាគមរីកចម្រើនដូចសព្វថ្ងៃ។ បងប្រុស គច់ សាន បានបញ្ជាក់ថា ភាពជោគជ័យរបស់សមាគម គឺបានមកពីការគ្រប់គ្រង និងដឹកនាំ ជាពិសេសការចូលរួមពីសមា-ជិក។ ដើម្បីឲ្យមានការចូលរួមពីសមាជិក យើងជាប្រធានត្រូវធ្វើគំរូល្អៗជានិច្ច។

តើគាត់បានធ្វើគំរូល្អៗដល់សមាជិកអ្វីខ្លះកន្លងមក?

  • ចូលរួមប្រជុំប្រចាំខែរៀងរាល់ខែមិនដែលខាន (លើកលែងតែករណីចាំបាច់ និងបន្ទាន់បំផុត)។ គាត់តាំងចិត្តថា  ជាសមាជិកយ៉ាងហោចណាស់ចូលរួមប្រជុំឲ្យបានទៀងទាត់  ដើម្បីបានដឹងពីការ

រីកចម្រើនរបស់សមាគម ដឹងអ្វីគួរធ្វើ និងអ្វីមិនគួរធ្វើ។

  • រៀនសូត្រនូវគំនិតថ្មីៗ រួចយកមកអនុវត្តឲ្យបានល្អ បន្តផ្សព្វផ្សាយដល់សមាជិកពេលប្រជុំ ឬផ្សព្វផ្សាយជាបុគ្គល។ តាមរយៈទង្វើនេះហើយ ដែលធ្វើឲ្យកសិករក្នុងភូមិគ្រប់គ្រួសារចូលជាសមាជិកសមាគម។
  • សន្សំទៀងទាត់ច្រើនជាងសមាជិក ដើម្បីបង្ហាញជំនឿដល់សមាជិក។ បើប្រធានសន្សំច្រើនមិនខ្លាចបាត់បង់ប្រាក់ ហេតុអ្វីសមាជិកមិនហ៊ានចូលសន្សំ?
  • អនុវត្តនូវបច្ចេកទេស បវស ជាគំរូសម្រាប់ប្រជាជនក្នុងភូមិ។ ពីមុនគ្រួសារកាត់មានដី ២ហិកតា ទទួលបានផលស្រូវសរុប ២,៣តោន ប្រើប្រាស់ហូបចុកសម្រាប់គ្រួសារមិនគ្រប់ទេ។ បច្ចុប្បន្នគាត់ទិញដីបន្ថែមពង្រីកបាន ៤ហិកតា កែប្រែគុណភាពដីដោយមិនប្រើជីគីមីទាល់តែសោះ ពេលនេះផលស្រូវកើនបាន ៩,៥តោន។
  • ខំធ្វើឲ្យបាន ទោះបីនរណានិយាយអ្វីមិនល្អនូវអ្វីដែលយើងកំពុងធ្វើសូមកុំបាក់ទឹកចិត្ត សំខាន់យើងគិតថា អ្វីដែលយើងកំពុងធ្វើវាពិតជាល្អ វាពិតជាជួយខ្លួនយើង ជួយអ្នកភូមិយើងឲ្យមានជីវភាពធូរធា។ ការតាំងចិត្តធ្វើឲ្យសម្រេច គឺជាចំណុចពិសេសសម្រាប់យើងម្នាក់ៗ ដើម្បីឈានសម្រេចជោគជ័យ។
  • ពេលបានជោគជ័យហើយត្រូវជួយអ្នកនៅជុំវិញឲ្យទទួលបានជោគជ័យដែរ ជាក់ស្តែងសមាគមភូមិ គាត់បានប្រមូលផ្តុំសមាគមផ្សេងៗឲ្យជួបជុំរៀងរាល់ខែ ដែលមាន ៩ភូមិ, ១៦ក្រុម ដើម្បីចែករំលែកពីភាពរីកចម្រើន ជួយកែលម្អ ពង្រឹង និងពង្រីកក្រុមសន្សំ និងសមាជិកសន្សំបន្ថែមទៀត។

ជាចុងក្រោយ គាត់តាំងចិត្តអនុវត្តឲ្យបានក្លាយជាសេដ្ឋីស្រុកស្រែ ដោយរកចំណូលពីកសិកម្មឲ្បបានយ៉ាងតិច ១០០លានរៀលក្នុង១ឆ្នាំ សន្សំប្រាក់យ៉ាងតិចឲ្យបាន ១០០លានរៀល និងផ្តល់ការងារឲ្យអ្នកមូលដ្ឋានផ្នែកកសិកម្មឲ្យបាន ៥នាក់។

ជាសរុបមកយើងឃើញថា ភាពជោគជ័យក្នុងជីវិត គឺបានមកពីការខិតខំប្រឹងប្រែងជំនះរាល់ការលំបាក ស្វែងរកចំណេះ ប្រើចំណេះដែលបានរៀនយកមកអនុវត្តឲ្យបានល្អ ជាពិសេសការធ្វើអ្វីមួយជាគំរូល្អក្នុងនាមជាអ្នកដឹកនាំ គឺជាកត្តាមួយក្នុងចំណោមកត្តាផ្សេង​ៗ ឈានទៅរកជីវភាពជាសេដ្ឋីស្រុកស្រែ៕

អ្នកក្រ                ខ្ញុំក្រព្រោះឪពុកម្តាយខ្ញុំក្រ

អ្នកមាន            ខ្ញុំត្រូវតែមានព្រោះឪពុកម្តាយខ្ញុំក្រ

អ្នកក្រ               ធ្វើការរំពឹងលើព្រះអាទិត្យលិច

អ្នកមាន            ធ្វើការរំពឹងព្រះអាទិត្យរះ

រ៉ូប៉ឺតធីគីយ៉ូសាគី (Robert. T. Kiyosaki)

ឪពុកអ្នកមាន ឪពុកអ្នកក្រ

វត្តស្រង់អង្គស្នោ, ថ្ងៃទី២៨ ខែកុម្ភៈ ឆ្នាំ២០១២

តាត់ សុខ

អំពី khmercms

Avatar

អត្ថបទពាក់ព័ន្ធ

ការធ្វើជីទឹកពីផ្លែឈើ

នៅពេលនេះ សហគមន៍សម្បូរសប្បាយ ផ្សព្វផ្សាយពីរបៀបធ្វើជីទឹក និងរបៀបប្រើប្រាស់ជីនេះ។ វត្ថុធាតុដើមដែលធ្វើជីទឹកនេះគឺផ្សំឡើងពីផ្លែឈើ និងមើមរុក្ខជាតិមានរសជាតិផ្អែម មានខ្លឹមសារដូចខាងក្រោម។