Home / កសិកម្ម / បទពិសោធន៍ដាំស្ពៃក្រញ៉ាញ់

បទពិសោធន៍ដាំស្ពៃក្រញ៉ាញ់

អ៊ុំស្រី យ៉េក អាយុ៥៥ឆ្នាំ ជាកសិកររស់នៅភូមិអូវែង ឃុំកាហែង ស្រុកសំរោងទង ខេត្តកំពង់ស្ពឺ។ គាត់មានវិធីសាស្ត្រល្អក្នុងការដាំស្ពៃក្រញ៉ាញ់ទទួលបានទិន្នផលខ្ពស់។ ចំពោះវិធីសាស្ត្រនៃការដាំស្ពៃយើងសូមបង្ហាញជូនដូចខាងក្រោម៖

១. ការរៀបចំថ្នាលនិងការសាប

ថ្នាលសម្រាប់សាបគ្រាប់ស្ពៃមានទំហំ ២,៥ម៉ែត្រការ៉េ។ គាត់បានកាប់ជ្រុំដីឲ្យម៉ដ្ឋ និងយកជីកំប៉ុស្តចំនួនមួយអំរែក ទៅបាចពីលើរួចជ្រុំឲ្យសព្វ។ បន្ទាប់ពីរៀបចំថ្នាលរួចគាត់បានយកគ្រាប់ស្ពៃទៅព្រួសលើថ្នាលស្តើង​ៗដើម្បីឲ្យស្ពៃដុះមកថ្លោសល្អ បន្ទាប់មកកាត់កំទេចចំបើងគ្របពីលើដើម្បីកុំឲ្យខ្ទាតគ្រាប់នៅពេលស្រោចទឹក។ ពេលដាំរួចហើយ គាត់ស្រោចទឹកមួយថ្ងៃពីរដង (ព្រឹក​និងល្ងាច)​ រហូតដល់កូនស្ពៃមាន​អាយុ ១០ថ្ងៃ ទើបដកយកទៅដាំនៅលើរង។

២. ការរៀបចំដីសំរាប់ដាំនិងការដាំ

ក្នុងការដាំអ្នកមីងបានកាប់ដីហាលរយៈពេល៧ថ្ងៃ ដើម្បីសម្លាប់មេរោគផ្សិត និងពងសត្វល្អិត។បន្ទាប់មកគាត់បានកាប់ដីត្រឡប់ជ្រុំឲ្យស្មើ និងលើកជារងសំរាប់ដាំ។ ដីសំរាប់ដាំស្ពៃមានទំហំបណ្តោយ ១១ម៉ែត្រ និងទទឹង ១,៥ម៉ែត្រ។ នៅលើរងគាត់ប្រើជីកំប៉ុស្តចំនួន​៣អំរែក។

គាត់ដកកូនស្ពៃយកទៅដាំនៅពេលល្ងាចត្រជាក់ ដាំក្នុងចន្លោះគុម្ព១តឹក។ មុនពេលដកកូនស្ពៃយកទៅដាំគាត់បញ្ឈប់ការស្រោចទឹក១ថ្ងៃ ដើម្បីកុំឲ្យកូនស្ពៃអន់ដើម។ ក្រោយពីដាំរួចត្រូវស្រោចទឹកឲ្យសើមជៀសវាងស្រោចជោគខ្លាំងនាំឲ្យកូនស្ពៃអន់ និងទន់ដើម។

៣. ការថែទាំកូនស្ពៃ

គាត់ធ្វើការថែទាំកូនស្ពៃនៅក្នុងរង ដោយស្រោចទឹកមួយថ្ងៃ​២ដង (ពេលព្រឹក និងពេលល្ងាច)។​ក្នុងមួយសប្តាហ៍ស្រោចទឹកជីកំប៉ុស្តទឹក និងថ្នាំផ្សំពីរុក្ខជាតិសំរាប់កំចាត់សត្វល្អិត២ដង។ ចំពោះវិធីផ្សំការ​ធ្វើជីកំប៉ុស្តទឹក និងថ្នាំសំលាប់សត្វល្អិតមានបង្ហាញជូនដូចខាងក្រោម៖

ក.កំប៉ុស្តទឹក

ធាតុផ្សំ

  • ទន្រ្ទានខែត្រចំនួន ៣គីឡូក្រាម
  • លាមកមាន់ ១គីឡូក្រាម
  • ស្លឹកអង្កាញ់ ១គីឡូក្រាម
  • ស្លឹកអង្គាដី ១គីឡូក្រាម
  • លាមកគោស្រស់ ១បង្គី
  • ទឹក ៥០លីត្រ។

របៀបផ្សំ

យកទន្ទ្រានខែត្រ ស្លឹកអង្កាញ់ អង្គាដី មកចិញ្ជ្រាំឲ្យល្អិត​ដាក់គរជាគំនរយកលាមកមាន់និងគោ​

មកច្របល់បញ្ចួលគ្នាឲ្យសព្វ រួចដាក់ចូលទៅក្នុងពាង និងចាក់ទឹកចូល។ រក្សាទុករយៈពេល១៥ថ្ងៃអាច​យក​ទឹកជីទៅប្រើបាន (ទឹកជីនេះអាចប្រើរហូតដល់អស់មិនខូច)។

របៀបប្រើ

នៅពេលប្រើគាត់ដួសទឹកជី ០,៥លីត្រ លាយជាមួយទឹកធម្មតា ១ធុងស្ពេត្រូ ស្រោចទៅលើបន្លែ។

ទឹកជីនេះគាត់ប្រើក្នុងមួយសប្តាហ៍ ២ដង។

ខ. ថ្នាំផ្សំពីរុក្ខជាតិ

ធាតុផ្សំ. ផ្លែស្លាក់ ផ្លែស្លែង ស្លឹកស្តៅបណ្តូលពេជ្រ ម្ទេស​ទុំ មើមរំដេង ផ្សំក្នុងបរិមាណស្មើៗគ្នាគឺ ០,៥គីឡូ​ក្រាមក្នុងមួយមុខ និងទឹកប្រមាណ៥លីត្រ។

របៀបផ្សំ. យកធាតុផ្សំទាំងអស់កាប់ចិញ្ច្រាំឲ្យល្អិត ឬដំឲ្យទក់ច្របល់បញ្ចូលគ្នាឲ្យសព្វ រួចដាក់ចូលទៅក្នុងពាងនិងចាក់ទឹកចូលត្រាំឲ្យលិចធាតុផ្សំ។ បន្ទាប់ពីផ្សំហើយរក្សាទុករយៈពេល១៥ថ្ងៃ គឺអាច​​យក​​ទឹកជីទៅប្រើបាន។

របៀបប្រើ. នៅពេលប្រើគាត់ដួសទឹកថ្នាំ ១កំប៉ុងទឹកដោះគោ ​លាយជាមួយទឹកធម្មតា ១ធុងស្ពេត្រូស្រោចទៅលើបន្លែ។ ទឹកថ្នាំនេះគាត់ប្រើក្នុងមួយសប្តាហ៍២ដង ហើយគាត់បានផ្អាកការស្រោចទឹក    រយៈ​ពេល ៥ថ្ងៃមុនប្រមូលផល។

៤. ការប្រមូលផល

ក្រោយពីដាំបានរយៈពេល ១ខែ ស្ពៃអាចប្រមូលផលបាន។ នៅលើផ្ទៃដី ១៥ម៉ែត្រការេ គាត់អាចប្រមូលផលស្ពៃបានចំនួន៥០គីឡូក្រាម។ មួយគីឡូក្រាមគាត់អាចលក់បានតម្លៃ៥.០០០រៀល។ ក្រោយពីដាំហើយអ្នកមីងមានប្រសាសន៍ថា ការដែលទទួលបានផលល្អបែបនេះ ដោយសារគាត់ប្រើថ្នាំពុលធម្មជាតិ និងជីកំប៉ុស្តសំរាប់ប្រើ​បំប៉នផង។ គាត់នឹងបន្តការដាំតាមវិធីសាស្រ្តខាងលើនេះទៀត។

ស៊ិន អង្គារសាធ និង វង្ស សាវឿន     

 

អំពី khmercms

Avatar

អត្ថបទពាក់ព័ន្ធ

ផលិតកម្មដំណាំលើវាលស្រែនៅរដូវប្រាំង

រដូវដាំដុះដំណាំផ្សេងៗនៅលើវាលស្រែនឹងមកដល់ បន្ទាប់ពីការច្រូតកាត់ស្រូវរដូវវស្សារួចហើយ​។ ដើម្បីជាជំនួយដល់កសិករ ដែលមានគំរោងធ្វើការដាំដុះនៅដើមរដូវប្រាំង យើងមានជាគំនិតមួយចំនួនជូន​ដូចខាងក្រោមនេះ៖